Ukən chuŋ da Yeso Kristo anji zənə Luk ŋwaʼanayn 9 - Aŋwaʼanayn Uso Fey

Yeso tom mbə məŋə-anó ma ighum cho bigə

¹ Yeso tiya mbə məŋə-anó ma ighum cho bigə inaʼ ikay abú úŋwən imə chiyə uzugə iboŋ ujum nə imə izwey ba.

² Wə tom úŋwən kwi uni yeŋ yə ghayn anó fon Nwiye yə zwey ba isɨgə.

³ Wə ghayn abú úŋwən kwi, “Umugə mbən mə ŋuw, mbən inum ngwen aghəy moʼ kə imbaŋ kə abam kə aghəy jəgi kə ukab. Ka mbən num ngwen ndwi chini.”

⁴ Mbən bə pey yə nyi ungɨŋ na moʼ, u bə num ngwən anji chuŋ, mbən chomo aba awu ungɨŋ na wu pey aney zənə mbən mə noʼo.

⁵ Mbən bə nyi asin moʼ u ki num ma ngwen anji chuŋ, mbən duw ungɨŋ asin wu. Umugə mbən mə duw, mbən koro imbuy umbən ughəw zigə ayi tey anwini kwi mbə ton ukən uchuŋ.

⁶ Umugə yə ghayn nigə, mbə məŋə-anó du iŋu chigə ungɨŋ usin nanaʼ yə ghayn ukən uchuŋ nibi yə zwey ba akə isɨgə.

Atəw Herod buw

⁷ Amaʼa zənə Herod nu yə mə tumə ba Galeli zəw unó ujum mbənə mbə́ mi duw, atəw ma buw damugə ba moʼ mə ghayn kwi Jon ŋunə yə́ mə́ naʼa une si zəmə.

⁸ Umoʼ mə ghayn kwi Elayija si wene zaʼa u chini ghayn kwi wa ukən Nwiye moʼ akaʼa umbi mey si gha zəmə.

⁹ Herod biri kwi, mə́ səg atəw Jon anóm ŋunə asi mə zəw unó mbəŋ da uŋwən amə ngiya? Wə́ mə́ kaba inji izən Yeso.

Yeso jəy ba ichuʼ itəŋ

¹⁰ Amaʼazənə ba tom wu wene zaʼa, mbə pey yi ghayn abú Yeso unó ujum mbənə mbə́ aghəy. Wə num úŋwən u ŋú asin moʼ umə tiya akə Betsayida.

¹¹ Amaʼazənə ikwiy ba zəw kwi umbə awu ungɨŋ, mbə́ ŋú aboʼo uŋwən. Wə num úŋwən anji chuŋ ni ghayn anó da anó ufon abú úŋwən. Wə zwey u mbənə mbə́ ŋú kwi u zwey úŋwən.

¹² Amaʼazənə injəʼ mə́ sə chəgə, mbə məŋə-anó ma ighum cho bigə ŋu ghayn abú uŋwən kwi, “Ghayn ikwiy ba zəŋ ŋuw ungɨŋ usin mbənə umə iyad iyad iŋu ungɨŋ imbayn ikab aghəy moʼ ijəg nə asin iney damugə asin zəŋ cha ba awu.”

¹³ Yeso ghayn abú úŋwən kwi, “Mbən naʼa aghəy moʼ abú úŋwən ujəg.” Úŋwen ywiri abú uŋwən kwi, “u aghəy ujum mbənə umə abú úŋwən aba ubimi ingəŋ ukara itiŋ nə su bigə. Ngwə mə kaba kwi mba ŋuw izon aghəy jəgi abú ikwiy ba zəŋ ujum?”

¹⁴ (Anom mbənə mbə́ mə́ awu amə ka ichuʼ itəŋ). Yeso ghayn abú mbə məŋə-anó ma kwi, “Mbən aghəy uchomo asiy akə ikwiyi ikwiyi ba mə akə ikwiy feyn ka ighum itəŋ.”

¹⁵ Mbə ghəy nigə anigə ba wu ujum chomo asey.

¹⁶ Amaʼazənə mbə́ chomo, Yeso num ubimi ingəŋ ukara wu itəŋ nə su bigə iney aneŋ Ichaʼara Nwiye. Wə bɨʼiri inaʼ abú mbə məŋə-anó ma kwi ughaba abú ba.

¹⁷ Mbə́ num ighaba anigə úŋwən uma ujum jəg ikod. Mbə məŋə-anó were ikəg tənə tə́ buʼe isugi ungɨŋ usəŋ ighum cho bigə.

Pita ghayn wa ŋunə Yeso mə uŋwən

¹⁸ Aney moʼ nu Yeso mə chaʼara Nwiye ma zeʼe, mbə məŋə-anó ma ŋu abú uŋwən. Anigə yə biri abú úŋwən kwi, “ba mə ghayn kwi amə ngwa?”

¹⁹ Mbə ywiri kwi, “Ba moʼ mbə ghayn kwi ngwə mə Jon ŋunə yə mə naʼa une, umoʼ ghayn kwi ngwə mə Elayija, uchini ghayn kwi ngwə mə wa ukən Nwiye moʼ akaʼa umbi imbey nu usi zəmə.”

²⁰ Umugə mbə ghayn nigə, yə biri abú úŋwən kwi, “Amə umbən mbən ghayn kwi amə ngwa?” Pita ywiri kwi, “Ngwə mə wa ŋunə Nwiye zoʼo.”

Yeso ghayn kwi iyi zəw ingəʼ iku

²¹ Anigə Yeso chere úŋwən kwi ka ughayn ma anó zəŋ abú wa moʼ.

²² Wə ghayn abú úŋwən kwi, “Ŋwə̂ Wa yi zəw ingəʼ, ba kyayn ungɨŋ abey, ba kyayn ambəŋ Nwiye ni mbə taʼa unoʼo umbi ton uŋwən. Umbi zwere uŋwən asə igun unəy ta Nwiye yi zəmə uŋwən.”

²³ Wə ghayn abú úŋwən uma ujum kwi, “Wa moʼ bə mə kaba izaʼa aboʼo inyi u ton unó mbənə inyə̂ inyo ma mə fəna beʼe azad baʼara ma niŋe inji injim unəy ujum.

²⁴ Mbə ghayn kwi wa moʼ ŋunə u mə kaba isiy itəni ma u yi isam ichomo wu. Wa moʼ ŋunə u sam itəni ma da aŋu u yi isiy itəni wu.

²⁵ Injim zənə wa mi jəg amə ngiya ighari umbə mə nə u ghəy ujum aki igun isəg anigə isam itəni ma?

²⁶ Atəw wa moʼ bə sə dere da aŋu foro da inyi inayn, atəw Ŋwə̂ Wa yi mə dere da uŋwən fən Amaʼazənə umi zaʼa nu ufon foro nə ika zənə Nwiye naʼa abú uŋwən nə iwumini zənə mbə angəd zayn zayn mi naʼ abú uŋwən.

²⁷ Ayə ghayn asiʼ inen kwi, ba moʼ mbə akəŋ nu cha umi iku pey aney zənə umi zən anó ufon Nwiye.”

Yeso beŋe sə məŋərə

²⁸ Uney ifeyn chigə Amaʼazənə Yeso ghayn unó mbəŋ, yə num Pita, Jon foro nə Jems mbə koʼ iŋu igun ugum iŋu chaʼara Nwiye.

²⁹ Umugə yə mə chaʼara Nwiye, ifigi ma kaba ndwi ma sə ifuw məŋərə.

³⁰ Asin sə ŋu naʼa, mbə zən anóm bigə umə inayn nə uŋwən. Mbə anóm wu mə Mose nə Elayija.

³¹ Mbə buw ni məŋərə ni unoʼo azobo mbə́ pey ni inayn nə Yeso umugə umi iku a Yerusanem anji zənə Nwiye tana isiy.

³² Pita nə ba mbənə mbə mə́ nə uŋwən fwayn ambuni. Amaʼazənə mbə́ noʼo, mbə́ zən umugə Yeso mə məŋərə nə anóm bigə mbənə mbə́ tən nə uŋwən.

³³ Amaʼazənə anóm wu siyn Yeso, Pita ghayn abú uŋwən kwi, “Masa yə boŋ umugə mba mə akəŋ. Mba yi chim usɨgə uta afeyn inigə afeyn abú Mose afeyn abú Elayija.” Wə ghayn ney anigə yə ki kyayn ma anó zənə yə mə ghayn.

³⁴ Amaʼazənə yə mə bugə inayn, ipaʼ moʼ zaʼa ikəbərə úŋwən mə məŋə-anó wu mə goro umugə ipa wu kəbərə úŋwən.

³⁵ Igəg moʼ du awu ungɨŋ ipaʼ ighayn kwi, “Amə uŋu ŋwə̂ ŋunə a choʼo mbən ni zəw anó zənə umə ghayn.”

³⁶ Amaʼazənə igəg wu inayn imara, mbə́ zən Yeso abəma zeʼe mbə́ chuʼizi akə unó mbəŋ. Amaʼa wu, cha mbə di ghayn ma anó zənə mbə zən abú wa moʼ.

Yeso fuw uzugə iboŋ ungɨŋ inyo ŋwə̂ moʼ

³⁷ Aney kuŋ umugə mbə́ mə́ swiʼi ugum wu, ikwiy ba kyayn ŋu kuw úŋwən.

³⁸ Wa moʼ kyay akaʼa ikwiy ba wu ighayn kwi, “Ataʼa unó mə boʼo ubugə inigə kwi ngwə ney uŋu ŋwə̂ anóm ayə aba nə uŋwən yugə!

³⁹ Azugə iboŋ ayə yimə uŋwən uni kyay akə ikay, ayə ibiya uŋwən itum asey ajəw ni duw uchəw ma Azugə wu ayə chow uŋwən akə ingəʼ cha amə beni ma isayn uŋwən.

⁴⁰ Mə si boʼo ubugə abú umə məŋə-anó kwi u chiyə Azugə zəŋ anigə cha u kyay uma umugə ichi.”

⁴¹ Yeso ghayn abú úŋwən kwi, “ba akə amaʼ zəŋ yimə cha mbən mə zi ngwen fiŋ inyo Nwiye, cha mbən mə aghəy unó ni ukəʼərə amə unun amaʼ ngiya ami mə nə umbən? Imə bə yimə fiŋ nə?” Amaʼazənə yə ghayn nigə, yə ghayn abú anóm wu kwi, “Num ungwə ŋwə̂ zaʼa akəŋ.”

⁴² Amaʼazənə ŋwə̂ wu mə iyeŋ ŋuw, Azugə iboŋ wu yimə uŋwən itum asey ni ŋeʼere uŋwən. Anigə Yeso kyay abú Azugə iboŋ wu izwey ŋwə̂ wu anigə inaʼa uŋwən abú mbaʼ ma.

⁴³ Ba mbənə mbə́ mə́ awu ujum yere umugə mbə zən ikay Nwiye. Umugə ba mə́ bugə məŋərə uma akə uyere unó ujum benə Yeso aghəy, yə ghayn abú mbə məŋə-anó ma kwi,

Yeso inayn ghari chini da iwu ma

⁴⁴ “Mbən zəw anó zənə amə iŋu ghayn inen izi ungɨŋ umbən utəw. Inayn wu amə kwi umbi fənə Ŋwə̂ Wa abú ba.”

⁴⁵ Mbə məŋə-anó ma zəw inayn zəŋ anigə cha utəw ma di zayn damugə Nwiye noy inayn wu abú úŋwən kwi ka úŋwən kyay uma anigə mbə mə́ goro uma ibiri inayn wu abú Yeso.

Wa ŋunə amə ukyayn kyayn

⁴⁶ Mbə məŋə-anó Yeso mə taŋa akə wa ŋunə amə ukyayn akaʼa uma.

⁴⁷ Yeso kyayn anó zənə mbə́ mə́ kono ungɨŋ fiŋ uma anigə yə num ŋwə̂ kuŋe isey iyad ma,

⁴⁸ ighayn abú mbə məŋə-anó ma kwi, “Wa ŋunə u num ŋwə̂ kuŋe uŋu anji chuŋ akə uŋu ukum, yə num aŋu anji chuŋ anigə wa ŋunə u num aŋu anji chuŋ yə num wa ŋunə yə cha aŋu anji chuŋ. Wa ŋunə amə ukuŋe injən kaʼa amə uŋwən mə ukyayn.”

Wa ŋunə cha uton ma ngwen u yə nə mbən

⁴⁹ Jon ghayn kwi, “Masa mba zən wa moʼ umə chiyə uzugə iboŋ akə ungwə ukum mba kaba ikən uŋwən da mugə cha uŋwən mə wa moʼ inja akaʼa.”

⁵⁰ Yeso ghayn abú uŋwən kwi, “Mbən kənə ngwen uŋwən damugə wa ŋunə cha uton ma ngwen uyə nə umbən.”

Ba asin moʼ Samariya ton i num Yeso

⁵¹ Amaʼ mə sə tinə nu Nwiye mi num Yeso azobo yə beni ungɨŋ fiŋ ma kwi iyi ŋu a Yerusanem.

⁵² Anigə yə cha ba ukən imbey ma kwi uŋuw asin moʼ Samariya itana u aghəy ujum abú uŋwən ki usə iŋuw.

⁵³ Anigə cha ba mbənə mbə́ mə́ num uma uŋwən anji chuŋ damugə mbə zən kwi uyə ŋuw ma a Yerusanem.

⁵⁴ Amaʼazənə Jems nə Jon zən anó zəŋ, mbə biri abú Yeso kwi, “Asɨyisəg ngwə waʼa kaba kwi mba ghayn Nwiye cha uwəd azobo u zaʼa itoŋ úŋwən nə?”

⁵⁵ Umugə mbə ghayn nigə, Yeso kyayn abú úŋwən.

⁵⁶ Anigə mbə chigə iŋu asin chini.

⁵⁷ Amaʼazənə Yeso nə mbə məŋə-anó ma mə iyeŋ iŋuw, wa moʼ ghayn abú Yeso kwi, “Ayi niŋe injə injim usin ujum mbənə ngwə mə iŋuw awu.”

⁵⁸ Yeso ghayn abú uŋwən kwi, “kyayn kwi isiyn tə nə ibəg inen tə nə ikəŋ anigə cha Ŋwə̂ Wa nə asin moʼ i niŋe atəw ma awu.”

⁵⁹ Wə ghayn abú wa chini kwi, “Niŋe inyi injim.” Anigə wa wu ghayn abú uŋwən kwi, “Masa səw adi ŋuw itwayn uŋu mba.”

⁶⁰ Yeso ywiri abú uŋwən kwi, “Siyn uwu ba u twayn uwu ba mbi. Amə́ akə ungwə, ngwə ŋuw sə ghayn ukən uchuŋ da anó ufon Nwiye.”

⁶¹ Wa chini ghayn abú Yeso kwi, “Ayi niŋe injə injim Asɨyisəg anigə siy a ŋuw chaʼara uŋu unebey.”

⁶² Yeso ghayn abú uŋwən kwi, “Cha wa ŋunə u yimi asugə mə faʼa ni gha ma ney anjim ukəʼərə inyi ungɨŋ anó ufon Nwiye.”