Ukən chuŋ da Yeso Kristo anji zənə Luk ŋwaʼanayn 3 - Aŋwaʼanayn Uso Fey

Ano da Jon ŋunə yə́ mə́ naʼa une

¹ Amə akə ituʼ ighum cho itɨŋ ni Tiberus mə ufon kyayn Roman Pontus paled mə́ gobuna Judeya, Herod mə tumə Galeli unya anóm ma Filip mə́ tumə aba abey Ituriya foro Trakontis, Lisanias mə tumə Abilene.

² Anas nə Kayifas amə utəw kyayn ambəŋ Nwiye. Nwiye cha ukən abú Jon ŋunə amə́ ŋwə̂ Zakariya Amaʼazənə yə́ mə́ ambayn zomo.

³ Anigə Jon ŋú ungɨŋ ubey ujum mbənə umə́ iyad ugwi Jodan ni yə́ ghayn inayn Nwiye kwi ba beŋe fiŋ ma i num une da Nwiye nyaba unó iboŋ ma.

⁴ Anó zəŋ num usin abá anji zənə wa ukən Nwiye Azaya Ŋwaʼanayn kwi, “Wa moʼ yə kyay ungɨŋ imbayn zomo ghayn kwi mben tana inji abú Asɨyisəg mben tana inji abú uŋwən itəm.”

⁵ Umbi swiy impəʼeri ujum i swiʼiri igum kyayn ni igum kukuŋe ujum. Ighəy kwi buŋe nji itənə igara item, iswiy ibɨg ujum kwi inji nura.

⁶ Ba jum mbi zən umugə Nwiye chi ba angəʼ

⁷ unoŋ ba zaʼa kwi Jon naʼa une abú úŋwən anigə Jon ghayn abú úŋwən kwi, “Mbən mə́ ijugə iboŋ amə́ ngwa para ngwen kwi mbən noro idu akə ingəʼ zənə imə zaʼa

⁸ mbən aghəy unó mbənə umi tey kwi mben si beŋe itən fiŋ. Mbən imə ghayn ngwen injən akaʼa kwi mba mə buŋ akə aghaŋ Abraham. Ayə ghayn inen kwi Nwiye kyay umugə inum atey zəŋ beŋe akə buŋ Abraham.

⁹ Kaba akinine, Nwiye si siy ijɨŋ iwa ighaŋ azad anigə u yi wa uzad ujum mbənə cha umə ikuw ma itɨŋ chuŋ i maʼ ungɨŋ uwəd.”

¹⁰ Ikwiy ba wu biri abú uŋwən kwi “Abə́ mə nigə mba si ighini ngiya.”

¹¹ Wə́ ywiri abú úŋwən kwi, “Wa ŋunə umə ni ndwi bigə u naʼa feyn abú wa ŋunə cha ndwi abú uŋwən wa ŋunə umə nə aghəy jəgi u nibi aghəy nigə.”

¹² Mbə ywere ukab tag níbí ŋú kwi u naʼa une abú úŋwən. Mbə pey yi biri abú uŋwən kwi “Ataʼa ba mba ghini ngiya?”

¹³ Wə ghayn abú úŋwən kwi “Mbən inum ngwen ukab chigə uŋunə ughayn kwi mbən num.”

¹⁴ Usogwi moʼ níbí biri abú uŋwən kwi, “Amə umba mba si ghini ngiya?” Wə ghayn abú úŋwən kwi “Ka mbən, mbən num ngwen ukab abú wa moʼ akə ikay kə ifigə unó da wa moʼ. Beni kwi ukab ŋunə umə neʼe ngwen awu yə kəʼ”

¹⁵ Umugə ba jum mə́ nəmə kwi wa ŋunə Nwiye zoʼo uyə zaʼa, mbə́ kono ungɨŋ fiŋ ma kwi ighari moʼ Jon mə wa ŋunə Nwiye zoʼo.

¹⁶ Jon ywiri abú úŋwən uma ujum kwi “A yə naʼa une inen anigə wa ŋunə umə zaʼa inyi injim yə kwey chigə ma akə aŋu cha adi kəʼ aŋu iza iniʼ utabay ma. U yi naʼ amə Azugə zayn zayn nə uwəd inen.”

¹⁷ U yə́ nə achikere abú uŋwən i koro ijob ichi aboʼo ikwi. Ubə koro, u yi wyere ikwi ma cha ángən si tuŋ ijob ungɨŋ uwəd ni cha umi noʼo nimə.

¹⁸ Jon mə itey unó abú ba akə ikudi nji nanaʼ. Wə mə bə ghayn ukən uchuŋ abú úŋwən

¹⁹ Jon nya Herod nu amə gobuna damugə yə nam Herodiyas nu amə uyey unya anóm Herod. Wə nibi nya uŋwən damugə yə́ mə́ ighəy unó iboŋ nanaʼ

²⁰ izwey akə unó iboŋ ma Herod ibiya Jon izi adəŋ.

Yeso num une

²¹ Amaʼazənə Jon si naʼ une abú ba wu ujum, yə níbí naʼ une abú Yeso. Amaʼazənə Yeso mə́ chaʼara Nwiye azobo fəʼə

²² Anigə Azugə zayn zayn swiʼi zaʼa igun ma ni buŋ. Igəg moʼ gham azobo ighayn kwi “Ngwə mə uŋu ŋwə̂ aka unun. Inyi fiŋ yə wuʼe ma nə ungwə.”

Umbaʼ Yeso imbey

²³ Yeso ti afaʼa ma amaʼazənə yə mə́ ituʼ ighumi ita. Ba mə kono kwi uŋwən mə ŋwə̂ Yesep nu amə ŋwə̂ Heli

²⁴ nu amə ŋwə̂ Matat, nu amə ŋwə̂ Levi, nu amə ŋwə̂ Meki nu amə ŋwə̂ Janai nu amə ŋwə̂ Yesep

²⁵ nu amə ŋwə̂ Matatias nu amə ŋwə̂ Amos nu amə ŋwə̂ Nayum nu amə ŋwə̂ Esni nu amə ŋwə̂ Nagar

²⁶ nu amə ŋwə̂ Mat, nu amə ŋwə̂ Matatias, nu amə ŋwə̂ Semən, nu amə ŋwə̂ Josef, nu amə ŋwə̂ Joda

²⁷ nu amə ŋwə̂ Joanan, nu amə́ ŋwə̂ Resa, nu amə́ Zerubabe, nu amə ŋwə̂ Sheatie nu amə ŋwə̂ Neri

²⁸ nu amə ŋwə̂ Meki, nu amə ŋwə̂ Adi nu amə ŋwə̂ Kosam nu amə ŋwə̂ Elmadam nu amə ŋwə̂ Er

²⁹ nu amə ŋwə̂ Josua, nu amə ŋwə̂ Elisa nu amə ŋwə̂ Jorim nu amə ŋwə̂ Matat nu amə ŋwə̂ Levi

³⁰ nu amə ŋwə̂ Simiyon, nu amə ŋwə̂ Judas, nu amə ŋwə̂ Yesep, nu amə ŋwə̂ Jonam, nu amə ŋwə̂ Eliakim

³¹ nu amə ŋwə̂ Melea, nu amə ŋwə̂ Mena, nu amə ŋwə̂ matata, nu amə ŋwə̂ Defid

³² nu amə ŋwə̂ Jese, nu amə ŋwə̂ Oberd, nu amə ŋwə̂ Boaz, nu amə ŋwə̂ Salmon, nu amə ŋwə̂ Nashon

³³ nu amə ŋwə̂ Aminadab, nu amə ŋwə̂ Ram, nu amə ŋwə̂ Hezron, nu amə ŋwə̂ Peres, nu amə ŋwə̂ Judas

³⁴ nu amə ŋwə̂ Yakob nu amə ŋwə̂ Azik, nu amə ŋwə̂ Abraham, nu amə ŋwə̂ Tera, nu amə ŋwə̂ Naho

³⁵ nu amə ŋwə̂ serug, nu amə ŋwə̂ Nwi, nu amə ŋwə̂ Peleg, nu amə ŋwə̂ Eba, nu amə ŋwə̂ Shela

³⁶ nu amə ŋwə̂ Kainan, nu amə ŋwə̂ Afazad, nu amə ŋwə̂ Shem, nu amə ŋwə̂ Noa, nu amə ŋwə̂ Lamək

³⁷ nu amə ŋwə̂ Metusena, nu amə ŋwə̂ Enok, nu amə ŋwə̂ Jared, nu amə ŋwə̂ Mahalalil, nu amə ŋwə̂ kenan

³⁸ nu amə ŋwə̂ Enos, nu amə ŋwə̂ Set, nu amə ŋwə̂ Adam, nu amə Ŋwə̂ Nwiye.