Ukən chuŋ da Yeso Kristo anji zənə Luk ŋwaʼanayn 24 - Aŋwaʼanayn Uso Fey

Yeso si zəmə

¹ Amə aney sonde Afəfəb nə isəg idiy, ayey mbəŋ a num ungəd nyoʼoro nyoʼoro mbənə mbə́ tana iŋu awu atəw isey.

² Mbə pey yi zən kwi mbə si biŋ itey zənə mbə́ kən uchəw isey awu ichi.

³ Asɨmə umugə mbə́ nyi ungɨŋ, cha mbə zən uma awu Asɨyisəg Yeso.

⁴ Utəw ma buwə akə anó zəŋ. U sə ŋu zən anóm bigə uzi ndwi fuw ni itəni utəm iyad uma.

⁵ Igoro yimə mbə́ ayey wu u guni utəw ma asey. Mbə́ anóm wu biri abú úŋwən kwi, “Mbən mə kaba wa nu umə ikiʼe akaʼa uwu ba da ngiya?

⁶ Chama uŋwən akəŋ. Mbən kono anó zənə yə ghayn inen Amaʼazənə yə mə Galeli. Wə ghayn kwi,

⁷ ‘Umbi yimə Ŋwə̂ Wa inaʼ abú ba mbənə umə aghəy unó iboŋ. Ba wu umbi kon uŋwən azad baʼara asə akə unəy ta u yi zəmə.’”

⁸ Umugə mbə́ ayey wu zəw anó zəŋ, mbə́ kono inayn zənə Yeso ghayn abú úŋwən.

⁹ Umugə mbə́ wene akə asin zəŋ, mbə́ ghayn unó mbəŋ ujum abú mbə məŋə-anó ma ighum cho feyn foro abú ba mbi ujum.

¹⁰ Ayey mbənə mbə́ ghayn anó wu abú ba tom Kristo amə, Mari Magdalen, Jowana, Mari ingwo Jems nə ayey chini ni mbə mə aboʼo úŋwən

¹¹ Ba-tom wu zəw unó mbənə ayey wu ghayn, cha mbə di beni anó wu chomo abú úŋwən uma ujum ni anó ibuw anigə cha mbə́ di beni

¹² [Anigə Pita noro iŋú awu atəw isey pey yi guni ma asey iney awu ungɨŋ. Wə ney nigə zən aba ndwi zənə mbə́ fid uŋwən awu. Wə zən nigə ighəy wene iŋu unuʼ sə məŋərə ma akə anó zənə yə aghəy].

Mbə́ məŋə-anó Yeso bigə zən uŋwən nu mbə́ mə́ ŋuw Emmayus

¹³ Aba aney wu, mbə məŋə-anó Yeso moʼ mə́ ŋuw asin moʼ umə tiya akə Emmayus. Emmayus mə ka ukilometa ighum cho feyn inoʼo Yerusanem.

¹⁴ Mbə́ mə́ yeŋ yə tumə igan akə unó ujum mbənə mbə́ duw.

¹⁵ Umugə mbə́ mə́ yeŋ yə tumə igan nigə, Yeso zaʼa ibumə úŋwən anigə mbə́ mə́ yeŋ ŋuw akə unóŋ.

¹⁶ Mbə́ məŋə-anó wu zən Yeso cha ukyay ma kwi amə uŋwən.

¹⁷ Yeso biri abú úŋwən kwi, “Mbən mə yeŋ yə tumə igan ghayn kwi ngiya?” Mbə bi si təm ichuʼ izey, ifigi ma tey kwi akənə sugi ungɨŋ fiŋ uma.

¹⁸ Wa feyn akaʼa úŋwən nu ukum ma mə Clopas biri abú uŋwən kwi, “Aba ngwə mə wa isoʼ a Yerusanem nu uki kyay ma unó mbənə u duw awu unəy mbənə?”

¹⁹ Yeso biri abú úŋwən kwi amə unó ngiya? Mbən ywiri abú uŋwən kwi, “Amə unó da Yeso wa Nazared. Uŋwen mbə wa ukən Nwiye akə uyere unó mbənə yə mə itey nə aghəy, amə amede wa ifigi Nwiye nə ifigi ba ujum.

²⁰ Umba ba kyayn ambəŋ Nwiye nə utəw kyayn abú ba ibiya uŋwən naʼ abú gomen kwi u sob kwi u zwere uŋwən anigə mbə́ komo uŋwən azad abaʼaray.

²¹ Mba niŋi ita ikono inyo ma kwi, amə uŋwən mi iziya atəw ba Izre. Akə̂choŋ amə unəy ta nu unó mbəŋ aduw.

²² Iŋu imbey, mbə ayey moʼ inja akaʼa ghəy mba buwə. Mbə ŋu awu atəw isey akə afəfəb nə imbiri,

²³ Anigə cha udi zən uma awu ma. Umugə mbə́ wene zaʼa pey ighayn ina kwi mba zən angəd akə ukaŋ u ghayn ina kwi yə si zəmə.

²⁴ Ba moʼ akaʼa inja ŋu awu atəw isey pey yi zən unó mbəŋ aba anji zənə mbə ayey wu ghayn anigə cha mbə zən ma uŋwən.”

²⁵ Yeso zəw nigə ighayn abú úŋwən kwi, “Mbən mə uneŋ mbən num amaʼ ki ibeni unó jim mbənə ba ukən Nwiye ghayn.

²⁶ Wə waʼa ki kəʼə ma kwi wa ŋunə Nwiye zoʼo zən ingəʼ akə unó mbəŋ boʼo inyi ungɨŋ anó ufon ma?”

²⁷ Umugə yə ghayn nigə, yə toʼoro abú úŋwən unó mbənə Aŋwaʼanayn Nwiye ujum ghayn da uŋwən. Iti akə aŋwaʼanayn zənə Mose ŋwaʼanayn iŋu pey akə u mbənə ba ukən Nwiye ujum ŋwaʼanayn.

²⁸ Amaʼazənə mbən mə́ iyad Abey zənə mbə́ mə́ iŋú awu, yə aghəy ni kwi u yə chigə Abey wu iŋu imbey.

²⁹ Anigə mbə yimə uŋwən ighayn abú uŋwən kwi, “Chomo nə umba maʼ si chigə usin mbə sə fire” yə nyi ŋú chomo abú úŋwən.

³⁰ Amaʼazənə yə chomo ijəg aboʼo úŋwən, yə num abɨʼe ingəŋ ukara ichaʼara Nwiye ibɨʼiri naʼ abú úŋwən.

³¹ Umugə yə ghəy nigə, aghɨ uma fəʼə ukyay uŋwən anigə yə nim ma ifigi ma.

³² Mbə mə ghayn akaʼa uma kwi, “Aka chomo ni kwi iwuʼi sugi ita fiŋ Amaʼazənə yə mə yeŋ anji yə ghayn unó mbənə aŋwaʼanayn Nwiye mə ighəy ina?”

³³ Mbə́ noʼ aba ighari wu wene iŋu Yerusanem. Mbə pey yi zən mbə məŋə-anó ighum cho feyn ufire asin feyn ni ba mbənə mbə́ mə aboʼo úŋwən.

³⁴ Mbə ghayn abú anóm bigə wu kwi, “Amə asiʼ kwi Asɨyisəg si zəmə! Wə si tey inyo ma abú Sayimon!”

³⁵ Anom bigə wu ghayn anó zənə yə duw anji. Bə́ ghayn umugə mbə kyay uŋwən Amaʼazənə yə bɨʼiri ingəŋ ina abú uŋwən.

Yeso duw ifigi mbə məŋə-anó ma

³⁶ Amaʼazənə mbə́ mə́ ghayn anó zəŋ, Yeso ma amboŋ zaʼa itəm akaʼa ma anigə ighayn abú úŋwən kwi, “Mbən chomo akə aborobod.”

³⁷ Mbə təm ibuw igoro yimə úŋwən uni kono kwi amə uzəg afəb umə zənə.

³⁸ Anigə Yeso ghayn abú úŋwən kwi, “Anó zəŋ mə toboro ngwen da ngiya itən fiŋ mə məŋərə ma da ngiya?”

³⁹ Mbən ney umbəŋ ubugə nə umbəŋ ughəw mbən yi zən kwi akə asiʼ amə umugə. Mbən bira aŋu mbən yi zən kwi akə asiʼ amə umugə. Cha uzəg afəb uma ni nyə̂ inyo anji zənə mbən zən kwi iyi ineŋ.

⁴⁰ Amaʼazənə yə ghayn nigə, yə tey ubugə ma nə ughəw ma abú úŋwən.

⁴¹ Amaʼazənə yə tey abú úŋwən, cha mbə di beni anigə iwuʼi sugi afiŋ uma uni məŋərə uma azəd. Yeso biri abú úŋwən kwi, “Ghəy moʼ mə akəŋ inen amə aghəy a jəgə?”

⁴² Mbə naʼ akwere su a tə́ abú uŋwən.

⁴³ Wə num kəd ifigi ma.

⁴⁴ Wə aghəy nigə ighayn abú úŋwən kwi, “Amə unó mbəŋ mə́ ghayn inen Amaʼazənə mə́ mə nu umbən. Mə ghayn unó ujum mbənə mbə́ ŋwaʼanayn da aŋu ungɨŋ ikɨy Mose, ungɨŋ aŋwaʼanayn Psalm ayi du akə asiʼ.”

⁴⁵ Amaʼazənə yə ghayn nigə, yə fəʼi fiŋ ma kwi ukyay Aŋwaʼanayn Nwiye utəw ma zayn.

⁴⁶ Wə ghayn abú úŋwən kwi, “Ayə ungɨŋ Aŋwaʼanayn Nwiye kwi, wa ŋunə Nwiye zoʼo uyi zəw ingəʼ anigə unəy sə ŋú pey uta u yi zəmə.

⁴⁷ Anigə ba mbi mə yeŋ yi ghayn inayn Nwiye akə ukum ma inoʼ a Yerusanem iŋu pey ungɨŋ ubey ujum kwi ba beŋe fiŋ ma Nwiye wa unó iboŋ uma.

⁴⁸ Mbən yi mə uzənə akə unó mbəŋ anigə imə ghayn abú ba.

⁴⁹ Mbən zən ayi cha aghəy zənə uŋu mbaʼ kaʼa inen anigə mbən yi chomo a Yerusanem pey aney zənə Nwiye mi naʼa ikay inen.”

Nwiye num Yeso azobo

⁵⁰ Yeso num mbə məŋə-anó ma du ŋú Bethany. Wə pey awu beʼere ubugə ma aneŋ izi aborobod igun úŋwən.

⁵¹ Amaʼazənə yə mə izi aborobod wu nigə, yə sayn úŋwən Nwiye num uŋwən azobo.

⁵² Mbə́ wumini uŋwən iwene ŋú a Yerusanem. Iwuʼi sugi ungɨŋ fiŋ uma.

⁵³ Mbə́ mə́ ŋuw ambəŋ Nwiye akə umaʼ ujum ŋuw yere Nwiye.