Ukən chuŋ da Yeso Kristo anji zənə Luk ŋwaʼanayn 22 - Aŋwaʼanayn Uso Fey

Mbə́ tana únaŋ izwere Yeso

¹ Amaʼ si tinə akə ufire ijəg ingəŋ chá afuro yimə umə tiya ufere wu akə izaʼara chigə igun.

² Ba kyayn ambəŋ Nwiye nə ba mbənə mbə́ mə́ ataʼa ba akə unoʼo mə́ kaba inji izwere Yeso anjim mə jim. Mbə́ mə kaba izwere uŋwən anjim mə anjim damugə nə mbə́ mə goro kwi ba mbə kyay umbi bəw indum.

Judas beni ifənə Yeso

³ Satan inyi ungɨŋ fiŋ Judas nu úmə nibə tiya uŋwən akə Iskariyod. Uŋwen amə́ wa ufeyn akə mbə́ məŋə-anó Yeso ighum cho bigə.

⁴ Anigə yə noʼ iŋú kuw ba kyayn imbəŋ Nwiye nə utəw kyayn u mbənə mbə́ mə́ nəmə imbəŋ Nwiye u tana inji zənə umi fənə Yeso abú úŋwən.

⁵ Mbə́ zəw anó zəŋ iwuʼ anigə u beni inaʼ ukab abú uŋwən.

⁶ Judas bəni inum ukab wu anigə ini kaba apan inaʼ Yeso abú uŋwən yimə chá wa ikyi ba wu.

Yeso tana inyo ijəg ijəgə izaʼara chigə igun

⁷ Aney zaʼa ijəgə ingəŋ cha afuro amaʼazənə umi kyeme ŋwə̂ injəg akə ijəgə izaʼara chigə igun.

⁸ Yeso tom Pita nə Jon ghayn kwi, “Mbənə ŋú tana ijəg izaʼara ichigə igun mba mi ijəg.”

⁹ Mbə́ biri abú uŋwən kwi, “Ngwə mə kaba kwi mba ŋu tána akayn?”

¹⁰ Wə ywiri abú úŋwən kwi, “umugə mben mi inyi Yerusanem mben yi bomo nə anóm moʼ u beʼe ikɨŋ uné, mben ŋú aboʼo uŋwən ungɨŋ na zənə umi inyi ungɨŋ

¹¹ mben ghayn abú wa akə na kwi, ‘Ataʼa unó biri kwi atəw na zənə umbugə nə umbəŋ məŋə-anó mba mi jəgə ijəg izaʼara ichigə igun ungɨŋ a zayn.’

¹² U yi tey atəw na kyayn aneŋ inen yimə u si zi u aghəy ujum awu ungɨŋ mbən táná u aghəy jəgi awu ungɨŋ.”

¹³ Mbə ŋú pey izənə unó ujum aba anji zənə Yeso ghayn abú uŋwən anigə mbə́ tana ijəg wu awu.

Inji zənə itari Asɨyisəg ti

¹⁴ Amaʼ ijəgə ufere izaʼara ichigə igun zaʼa kú, Yeso chomo igun agayi nə mbə́ məŋə-anó ma.

¹⁵ Wə ghayn abú úŋwən kwi mə́ si kab azəd ijəg ijəgə izaʼara chigə igun nə umben ki mi si zəw ingəʼ.

¹⁶ Anigə ayə ghayn inen kwi chá ami noʼo ighá jəgə aŋu ijəgə təŋ ighari chini pey aney zənə aton akə ijəg təŋ ami zaʼa du akə asiʼi.

¹⁷ Umugə yə ghayn nigə yə num itoʼ unoʼ inaʼ uyaka abú Nwiye ighayn kwi, “Mben num unoʼ mbəŋ ighaba injən akaʼa.

¹⁸ Ayə ghayn inen kwi inoʼ akə choŋ imə ŋú chá amə ghayi nugə unoʼ vine pey Amaʼazənə anó ufon Nwiye ami zaʼa.”

¹⁹ Umugə yə́ ghayn nigə, yə́ num abɨʼ ingəŋ inaʼ mə bene yə abú Nwiye ibɨʼiri inaʼ abú úŋwən ghayn kwi, “Zəŋ amə inyi inyo amə naʼa da ngwen sə́ aghəy mbən ni ikono aŋu ighari ujum tənə mbən mə́ jəgə.”

²⁰ Umugə mbə́ jəg imara, yə́ num itoʼ unoʼ ighayn kwi unoʼ mbəŋ amə usəw fey Nwiye səŋi nə umben nə inyi anəm, zənə yə deŋe da ngwən.

²¹ “Ayə ghayn inen! Wa uŋunə ufənə aŋu uyə akə igun agayi jəgə nə umbugə!

²² Ŋwə̂ Wa yi ku umugə Nwiye si sɨy anigə ingəʼ yimə igun wa uŋunə u fənə uŋwən!”

²³ Mbə́ mə́ biri akaʼa uma kwi amə ngwa inja akaʼa umə kaŋa ighəy ukudu anó uŋunə.

Anó da wa ŋunə amə ukyayn

²⁴ Mbə́ məŋə-anó Yeso mə taŋa akaʼa uma akə wa uŋunə amə́ ukyayn kyayn akaʼa uma.

²⁵ Yeso zəw ighayn abú úŋwən kwi, “Ifon abú ba mbənə akaʼa ba Jû umbə́ tumə úŋwən nə ikayi anigə ba mbənə umə́ nə ikay itumə ba umbə bene ukum kwi, ‘izi abú ba.’

²⁶ Chá ami ma nigə nə umbən, wa uŋunə amə ukyay injənə akaʼa u yi num inyo ma ni ŋwə̂ kuŋe wa uŋunə amə atəw injən akaʼa u yi mə nə wa afaʼa.

²⁷ Amə ngwa ukyay chigə. Amə wa uŋunə uchomo mə jəgə kə amə wa uŋunə umə naʼa aghəy jəgi? Ayə injən akaʼa ni wa afaʼa.”

²⁸ Mben mə́ ba mbənə umə́ inyi iyad amaʼazənə umə kwaʼara aŋu.

²⁹ Umugə uŋu mbaʼ si naʼa anó ufon iniŋ, amə nigə ami naʼ inen.

³⁰ Boʼo mben mi sə jəgə anigə inugə igun inyi agayi ungɨŋ inyi anó ufon, mben yi chomo igun utən ufon sə́ saʼa inebey Israel ighum cho bigə.

Yeso ghayn kwi Pita yi ton ayi

³¹ “Sayimon Sayimon! Zəw! Satan si biri abú Nwiye kwi u saŋa ngwen ukoro ngwen umugə umə koro ingəŋ.

³² Asɨmə kwi mə si chara Nwiye inigə Sayimon kwi inji ibeni fiŋ mə́ bó ma. Amaʼ zənə inji ibeni fiŋ mi ghari ika, ngwə təre ibeni fiŋ umbə́ unya anóm.”

³³ Pita ywiri abú uŋwən kwi, “Asiy isəg mə si táná inyi inyo iŋú adəŋ nə ngwə kábá iku nu ugwə!”

³⁴ Yeso ywiri abú uŋwən kwi, “Ayə ghayn inigə ungwə Pita kwi ki unóŋ ingɨ sə ŋu toŋ akə afəb ngwə yi ghayn ighari ta kwi cha ngwə di kyay yə aŋu. Yeso ghayn abú mbə məŋə-anó ma kwi u num utagayi, abam kə ubəy ambere.”

Utagayi, abam nə ubey ambere

³⁵ Yeso biri abú mbə məŋə-anó ma kwi, “Amaʼ zənə mə́ tom ŋwen ghayn kwi ka mben num ngwen utagayi, abam kə utabay, mben waʼa bəw aghəy moʼ?” Mbə ywiri kwi, “Ində.”

³⁶ Yə́ ghayn abú úŋwən kwi, “Akə kinine wa ŋunə umə nə utagayi u num wa uŋunə umə nə abam u num wa uŋunə cha ubey ambere abú uŋwən ufənə indwi ma izon ubey ambere.

³⁷ Ayə́ ghayn inen kwi inayn Nwiye zənə i ghayn kwi mbə́ foro uŋwən nə ba u mbənə umə aghəy unó iboŋ ayi zaʼa idu akə asiʼ da ŋu damugə unó ujum mbənə mbə ŋwaʼanayn da aŋu umbə ŋú dú akə asiʼ.”

³⁸ Mbə́ məŋə-anó ma ghayn kwi “Asɨyisəg ney ibey ambere bigə itəŋ.” Yeso ywiri kwi, “Tə akoʼ.”

Yeso ŋu chaʼara Nwiye igun Ugum Olif

³⁹ Yeso noʼ iŋú igun Ugum Olif, umugə yə mə́ bə ŋúw, mbə məŋə-anó ma niŋi anjim ma.

⁴⁰ Amaʼ zənə mbə́ pey asin awu, ughayn abú úŋwən kwi “Mben, chaʼara Nwiye kwi ka akwaʼara inyi ma itən inyo.”

⁴¹ Anigə yə noʼ isənə ma iyad uma iŋu ka nu mugə wa mi maʼa itey izum utəw inwi asey ichaʼara Nwiye ighayn kwi,

⁴² “uŋu mbaʼ ngwə bə wuʼ chi ingəʼ zəŋ inyi inyo aká kə inji zənə akabay amə kə inji zənə ngwə si kab.”

⁴³ Angəd noʼ aneŋ azobo zaʼa inaʼ ikayi abú uŋwən.

⁴⁴ Inyo mə izənə ingəʼ azəd u chara Nwiye akə ikayi anigə inimini mə́ deŋe inyo abú uŋwən ichomo nə mə anəm.

⁴⁵ Amaʼazənə yə́ mara ichaʼara Nwiye yə́ noʼ atey iŋú aboʼo mbə məŋə-anó ma, yə́ pey umə bunə yimə u sə boŋ akə akənə zənə yə sugi afiŋ uma.

⁴⁶ Wə aghəy nigə ighayn abú úŋwən kwi, “Mbən mə bunə da ngiya mbən noʼ atey ichaʼara Nwiye boʼo ka akwaʼara á nyi ma itən inyo.”

Ikwiy ba ŋú ibiya Yeso

⁴⁷ Umugə Yeso mə bugə inayn unóŋ ba zaʼa. Amə Judas wa ufeyn akaʼa mbə́ məŋə-anó Yeso ighum cho bigə yə́ chigə imbey. Wə chigə ŋu imbey Yeso isóro indəʼ ma.

⁴⁸ Anigə Yeso ghayn abú uŋwən kwi, “Judas amə anjim indəʼ isóro ngwə mi fənə Ŋwə̂ Wa?”

⁴⁹ Amaʼazənə mbə məŋə-anó mbi u mbənə mbə́ mə́ aboʼo Yeso zən anó zənə yə mə ŋú du, mbə́ biri abú uŋwən kwi, “Asɨyisəg mba zoŋo úŋwən nə ita ibey mbere?”

⁵⁰ Wa moʼ akaʼa úŋwən chi ubey isəg atoŋ aba abugə jəgi isob Atəw abú ba mbənə umə faʼa imbeŋ Nwiye ichi.

⁵¹ Anigə Yeso ghayn abú uŋwən kwi, “yə kəʼ nigə!” Umugə yə ghayn nigə, yə bira atoŋ wa wu amey.

⁵² Yeso ghayn abú ba kyayn ambəŋ Nwiye, utəw abú ba mbənə mbə mə́ nəmə imbəŋ Nwiye nə ba kyayn ungɨŋ abey kwi, “Mben sə zaʼa ibiya aŋu mben zaʼa nə utini u aghəy nə ibey ni kwi amə uji?

⁵³ Mə́ mə nə u mben ambəŋ Nwiye unəy ujum cha mben ibiya aŋwayn aŋu. Anigə injən amaʼ si kəʼ nə wa uŋunə umə́ tumə imbiri umi na ika inen?”

Pita ton Yeso

⁵⁴ Mbə ibiya Yeso num iŋu ungɨŋ na atəw abú ba mbənə mbə́ mə faʼa imbəŋ Nwiye. Pita mə nyaʼa yeŋ zaʼa jim aghá sáta.

⁵⁵ Mbə́ uchəw uwəd ungɨŋ ugha isami nu ba chomo mə zó. Anigə Pita ŋu chomo aboʼo úŋwən.

⁵⁶ Ŋwə̂ ayey afaʼa moʼ zən uŋwən umugə uwəd mə́ beŋe yə tóŋ ighɨ inyo ma ney uŋwən ighayn kwi, “Anom uŋu yə mə́ nə Yeso fən!”

⁵⁷ Anigə Pita ton ighayn kwi, “Ayey cha adi kyay aŋu uŋwən!”

⁵⁸ Asin sə ŋú naʼa wa moʼ zən Pita ghayn kwi, “Ngwə mə wa moʼ akaʼa úŋwən.” Pita ywiri kwi, “Anom! Akaʼa ŋu wa moʼ akaʼa uŋwən!”

⁵⁹ Asə ŋu si akə áwa ufeyn wa chini bə́ ghayn aki ikay kwi, “Cha wa mi taŋ kwi amə cha wa uŋu aboʼo Yeso damugə uŋwən ma ighara amə wa Galeli!”

⁶⁰ Pita ywiri kwi, “Anom chá adi kyay aŋu anó zənə ngwə mə ghayn!” Umugə yə mə bugə nayn unóŋ ingɨ toŋ.

⁶¹ Asiy isəg gha ma ney Pita aghɨ ma, anigə Pita kono anó zənə Asiy isəg ghayn abú uŋwən kwi, “ki unóŋ ingɨ sə ŋú toŋ akə̂choŋ ngwə yi ton aŋu ighari ta.”

⁶² Umugə yə kono nigə, yə ŋú isəg chwey isɨ azəd.

Mbə chiʼ Yeso isom uŋwən

⁶³ Anom mbənə mbə́ mə́ nəmə Yeso mə́ chuʼərə uŋwən isom uŋwən.

⁶⁴ Mbə kod aghɨ ma ibiri abú ŋwen kwi, “Toʼo wa uŋunə u bira yə́!”

⁶⁵ Mbə jəmə uŋwən ighayn unó iboŋ nanaʼ chini imə jəmə uŋwən.

Mbə num Yeso iŋú a na usaʼa

⁶⁶ Amaʼazənə isəg kyiʼi ba kyay, utəw kyay abú ba mbənə umə faʼa ambəŋ Nwiye nə ba mbənə umə ataʼa ba akə unoʼo zaʼa, bumə anigə u num Yeso zaʼa imbey mbə saʼa abey mbə biri abú uŋwən kwi,

⁶⁷ “Ngwə bə mə wa uŋunə Nwiye zoʼo ghayn ina.” Wə ywiri abú uŋwən kwi, “Abə ghayn inen cha mben mi ibeni.

⁶⁸ Anigə abə́ biri anó moʼ inen cha mben mi ywiri.

⁶⁹ Asɨmə kwi iti akinine imə ŋú imbey Ŋwə̂ Wa uwi chomo aba abugə jəgi Nwiye uŋunə umə nə ikay ijum.”

⁷⁰ Úŋwen uma ujum biri abú uŋwən kwi, “Anigə ngwə mə Ŋwə̂ Nwiye?” Wə ywiri abú uŋwən kwi, “Mben ghayn kwi amə uŋwən.”

⁷¹ Ba wu ujum ghayn kwi “Mba mə nə kaba izəw anó ngiya achini abú uzənə! Mba si zəw anó zənə a duw uchəw ma umba ujum!”