Ukən chuŋ da Yeso Kristo anji zənə Luk ŋwaʼanayn 21 - Aŋwaʼanayn Uso Fey

Ghəy zənə ayey uti ture Nwiye awu

¹ Yeso ŋú ungɨŋ imbəŋ Nwiye, yə noʼ atey izən umugə ba imbon umə zi ukab ungɨŋ akubi zənə umə zi uturu Nwiye awu ungɨŋ.

² Wə nibi zən ayey ukwaŋ moʼ umugə yə zi ufraŋ bigə ungɨŋ akubi wu.

³ Wə ghayn nigə ighayn kwi, “Ayə ghayn asiʼ inen kwi ayey ukwaŋ uŋu zi ukab ungɨŋ akubi zəŋ chigə ma akə ba mbənə ujum.

⁴ Damugə ba umbi ujum naʼ ukab amə akə u nanaʼ ŋunə umə abú úŋwən asɨmə ayey ukwaŋ koro abam ma zi ukab ujum ŋunə yə mə abú uŋwən.”

Yeso ghayn umugə u mə ŋú saʼa imbəŋ Nwiye

⁵ Mbə məŋə-anó ma moʼ mə inayn da umugə u chimi imbəŋ Nwiye nə atey zənə amə ika unun foro nə u aghəy mbənə umə ture Nwiye ungɨŋ. Yeso ghayn abú úŋwən kwi,

⁶ “umugə mbən mə zənə u aghəy mbəŋ, aney moʼ yi zaʼa nu cha itey moʼ mi chomo igun chini umbi tu atey zəŋ ujum asey.”

Ingəʼ yə abú ba mbənə unaga anjim Yeso

⁷ Mbə məŋə-anó Yeso biri abú uŋwən kwi, “Ataʼa unó amə akə amaʼ ngiya nu unó mbəŋ ngwə ghayn umi duw? Amə anwini ngiya ami itey kwi amaʼ si kəʼ abú unó wu iduw?”

⁸ Yeso ywiri kwi, “Mbən num azom nji wa moʼ yi ghəy mbən faba. Ba nanaʼ u mbi zaʼa inum uŋu ukum ini yeŋ yə ghayn kwi, ‘Amə uŋwən’ anigə ‘Amaʼ si kə’ mbən beni ngwən nu uŋwən.

⁹ Amaʼazənə mbən zəw kwi ubey mbə maʼa bêd, izəw kwi ubey mbə kyaba mbən goro ngwen damugə ukudu unó mbəŋ u mbi mə awu asɨmə cha adi itey ma kwi isəg yə sə ŋú nwi.”

¹⁰ Yeso ghayn abú uŋwən kwi, “Ubey mbi maʼa bêd nə ubey chini, ubey mbənə ifon mə tumə u mbi maʼa bêd nə ubey chini mbənə ifon mə tumə.

¹¹ Ichəw yi mə choʼo kwaʼa akə ingəʼ, ajəgə nə isɨgə iboŋ iyi du usin ujum, uyere unó umbi du azobo nu ba mi zən ni gəd.

¹² Anigə ki unó mbəŋ ujum sə ŋú du, u mbi ibiya gwen aghəy kwi mbən zəw ingəʼ, naʼa gwen kwi u saʼa ungɨŋ na bomi Izre, izi ngwen andəŋ. Umbi num ngwen iŋú ifigi ifon nə ifigi gobuna da aŋu.

¹³ Amə apan zigə inen ighayn ukən uchuŋ.

¹⁴ Mbən num ungɨŋ itən fiŋ kwi cha mbən mi mə tumə ngwen inyo ichi anó itən igun

¹⁵ damugə ayi naʼ inayn iwe inen nu cha wa moʼ akaʼa umbən ba abana umi taŋ kə iton inayn wu.

¹⁶ U mbən mbaʼ nə u mbən ingwo, u mbən unya ayey nə unya anóm, umbən ba unebey nə u mbən uzi u mbi naʼa ngwen abú mbə tumə ba anigə u mbi zwere ba moʼ injən akaʼa.

¹⁷ Ba jum mbi bana ngwən da aŋu.

¹⁸ Asɨmə cha inyoŋ moʼ igun umbən atəw mi nim.

¹⁹ Mbən təm akə asiʼ mbən yi jəg itəni.”

Yeso ghayn da umugə umi saʼa Yerusanem

²⁰ “Amaʼazənə mbən zən kwi akama usogwi si kad Yerusanem, mbən kyay kwi ama zənə u mi saʼa Yerusanem si tinə.

²¹ Anigə ba mbənə umə Judeya mbi noro ikoʼ ŋú igun ugum, u mbənə u mə ungɨŋ abey umbi du, u mbənə umə iyad iyad, cha umi nyi ungɨŋ abey.

²² Damugə ungɨŋ unəy awu, ‘Nwiye yi zi usaʼa igun ba’ da unó ujum mbənə mbə́ ŋwaʼanayn ungɨŋ inayn Nwiye duw akə asiʼ.

²³ Ingəʼ yi nyi igun ayey mbənə umə ni ibom foro igun u mbənə umə nə buŋ bó! Ungɨŋ unəy wu, ingəʼ iboŋ yi zaʼa igun isəg, Nwiye yi sə itəm abú ba Jû.

²⁴ Umbi zwere ba moʼ nə ibey bêd, u mbi num u moʼ nu ba ndəŋ iŋu ungɨŋ ubey ujum, ba mbənə ikwiy ba Jû u mbi təʼe Yerusanem pey ama zənə Nwiye si kwi unó mbəŋ u mbi du ami zaʼa.”

Nyə̂ wa yi wene izaʼa

²⁵ “Usoʼo unó mbi mə duw abú nyama chugi, úməg foro abú itəni. Ingəʼ yi nyi ungɨŋ ubey ujum akə igun isəg, utəw ba mbi mə bure umugə une iba mə gha swiʼe

²⁶ Ba mbi sə goro ifwayn kənə akə unó mbənə umi zaʼa igun isəg damugə Nwiye yi cha Azugə ma azaʼa azobo.

²⁷ Amə akə amaʼ wu nu mbən mi zən Ŋwə̂ Wa umə zaʼa ungɨŋ ipaʼ nə ikay zənə imə abú uŋwən foro nə iwumini zənə imə abú uŋwən.

²⁸ Uno mbənə bə sə aghəy, mbən beʼere umbən utəw aneŋ azobo damugə injən ma idu angəʼ si tinə.”

Anó ikweme abú azad fig

²⁹ Yeso ghayn inayn maʼa zəŋ abú úŋwən kwi, “Mbən ney azad fig nə uzad mbi ujum.

³⁰ Mbən bə zən ama zənə ifuʼ fey mə duw, mbən kyay kwi uchi si tinə.

³¹ Amə ichin ichin, mbən bə zən ama zənə unó mbəŋ si aghəy, mbən kyay kwi anó ufon Nwiye si tinə.”

³² “Ayə ghayn asiʼ inen kwi, cha ingwaʼ ba zəŋ ujum mi ku nu cha unó mbəŋ ujum mi si du.

³³ Azobo nə isəg ayi chigə asɨmə cha inyi inayn mi noʼo chigə.”

Wə boŋ ichomo ikyiʼi

³⁴ “Mbən num azom, mbən izi ngwen itən fiŋ akə anó ni mə jəgə azəd kə akə anó ni mə nugə azəd kə imə tumə inyo akə u aghəy ungɨŋ isəg nji aney wu yi saʼa zaʼa yi ibiya ngwen numugə atam mə ibiya nyə̂.

³⁵ Damugə aney wu yi zaʼa yi ibiya ba jum mbənə umə igun isəg.

³⁶ Mbən chomo ikyiʼi akə umaʼ ujum ni chaʼara Nwiye kwi u naʼa ikay kwi mbən chigə unó mbənə umə iŋu du igha chaʼara kwi amə aghəy mbən təm ifigi Ŋwə̂ Wa.”

³⁷ Yeso num unəy wu ujum ni yə tey unó ungɨŋ imbəŋ Nwiye. A sə afəb, u yə koʼo ŋuw igun Ugum Olif.

³⁸ A sə afəfəb ni mbiri, ba ujum mbə ŋuw kuw uŋwən ungɨŋ imbəŋ Nwiye, iŋú zəw unó mbənə u mə ghayn.