Ukən chuŋ da Yeso Kristo anji zənə Luk ŋwaʼanayn 2 - Aŋwaʼanayn Uso Fey

Unó da mugə mə ibə́ Yeso

¹ Amaʼa wu, ufon kyayn Roman nu umə tiya akə Ugostus sob kwi ba jum mbənə umə́ ungɨŋ ubey mbənə umə aton Rom u ŋuw ŋwaʼanayn ikum ma ungɨŋ aŋwaʼanayn Rom.

² Amə ighari imbey itaŋ ba amaʼazənə gobuna Kwirinius mə́ tumə abey Sira.

³ Anigə ba ujum noʼ iŋú ŋwaʼanayn ikum ma ungɨŋ asin zənə mbə ibə́ úŋwən awu.

⁴ Yesep noʼo Nazared aba abey Galeli ikoʼ iŋú á Betrehem aba abey Judeya asin zənə mbə́ ibə́ ufon Dafid. Yesep ŋú awu damugə yə́ mə́ aghaŋ unebey ufon Dafid.

⁵ Yə́ ŋú iŋwaʼanayn ukum awu nə Mari damugə amə́ ayey mbə́ sí kaʼ abú uŋwən. Mari mə́ ni ibum.

⁶ Amaʼazənə mbə́ mə́ a Betrehem, amaʼ kəʼ abú Mari ibə́

⁷ yə bə́ ŋwə̂ anóm ŋwə̂ imbey uma. Wə fed uŋwən akə uba ndwi ineŋ ungɨŋ uku ŋunə nyə̂ mə́ jəgə ungɨŋ damugə amə́ chama asin abú úŋwən ungɨŋ na ba isoʼ.

Mbə́ Angəd ŋú abú mbə nəmə injəg

⁸ Akə afəb wu, mbə nəmə injəg moʼ mə́ igun ugum aba abey wu nəmə injəg uma.

⁹ Angəd Asɨyisəg du ifigi uma anigə uzayn uzayn Asɨyisəg bigə akaʼa úŋwən igoro ibiya úŋwən azəd.

¹⁰ Angəd wu ghayn abú úŋwən kwi, “Mben mə́ goro ngwen mə́ zaʼa nə ukən uchuŋ inen ukən wu yi aghəy kwi iwuʼi sugi ungɨŋ fiŋ ba ujum

¹¹ Akə̂choŋ ungɨŋ abey Dafid mbə́ bə́ wa ŋunə umi chi ba angəʼ. Uŋwen amə Asɨyisəg Kristo!

¹² Anwini zənə mbən mi zən amə kwi mben yi zən ŋwə̂ bo ufed akə uba ndwi ineŋ ungɨŋ uku ŋunə nyə̂ mə jəgə ungɨŋ.”

¹³ Aba ighari wu, Angəd chini nanaʼ swiʼi azobo iŋu foro uyi imbey wu usə kyugwa ukyi yere Nwiye ghayn kwi,

¹⁴ “Mba wumini Nwiye ŋunə umə azobo Aborobod ma a nyi igun ba mbənə u ghuʼi úŋwən Aki igun isəg!”

¹⁵ Amaʼazənə mbə́ angəd wu sayn úŋwən noʼ ŋú azobo, mbə́ nəmə injəg wu ghayn akaʼa uma kwi mba ŋúw Betrehem ŋú zən anó zənə aduw nu Asɨyisəg ghayn kwi mba kyayn.

¹⁶ Mbə́ noʼ iŋú amaramad pey yi zən Mari, Yesep foro ŋwə̂ bo nu u ineŋ ungɨŋ uku ŋunə umə ijiy nyə̂ awu ungɨŋ.

¹⁷ Amaʼazənə mbə nəmə injəg zən ŋwə̂ wu mbə́ ghayn anó zənə mbə Angəd ghayn abú úŋwən da ŋwə̂ wu

¹⁸ Ba ujum mbənə mbə́ zəw yere anó zənə mbə nəmə injəg ghayn abú úŋwən.

¹⁹ Anigə Mari siy unó mbəŋ afiŋ ma bə kono.

²⁰ Mbə nəmə injəg wene ŋú sə kyugwa ukyi yere Nwiye damugə unó ujum mbənə mbə zəw ni zən mbə du aba anji zənə angəd ghayn abú úŋwən.

Mbə chəw ukum abú ŋwə̂

²¹ Amə́ akə unəy ifeyn mbə ney ikad ŋwə̂ wu ichəw ukum ma akə Yeso ukum ni Angəd chəw abú uŋwən ki Mari sə aghəy ibum ma.

Mbə num Yeso iŋú imbəŋ Nwiye

²² Amaʼ kəʼ abú Yesep nə Mari isəw inyo uma izayn umugə ikɨy mose mə ghayn, mbə num Yeso koʼ ŋú a Yerusanem iŋú itey úŋwən abú Asɨyisəg.

²³ Mbə́ aghəy nigə damugə ú ŋwaʼanayn ungɨŋ ikɨy Asɨyisəg kwi “umbi naʼ ŋwə̂ imbey ŋunə amə ŋwə̂ anóm abú Asɨyisəg.”

²⁴ Mbə ŋú inaʼ u aghəy ifa umugə uŋwaʼanayn ungɨŋ ikɨy Asɨyisəg kwi, “Umbi naʼ ubuŋ aka ubigə kə ubuŋ unuʼ ubigə.”

²⁵ Amaʼa wu, anóm moʼ mə́ a Yerusanem ni ukum ma mə simeon. Yə́ mə aghəy anó ni akəʼərə, yə zi fiŋ ma inoy Nwiye yə mə nəmə aney zənə Nwiye mi chi ba izreal angəʼ anigə Azugə zayn zayn mə ni uŋwən.

²⁶ Azugə zayn zayn si tey abú uŋwən kwi cha umi ku ni cha u di zən ma wa ŋunə Nwiye zoʼo.

²⁷ Azugə zayn zayn beʼere uŋwən u ŋú inyi ungɨŋ imbəŋ Nwiye Amaʼazənə umbaʼ Yeso num uŋwən ŋú imbəŋ Nwiye ighəy abú uŋwən anji zənə ikɨy itey

²⁸ Simiyon num ŋwə̂ wu yimi ubugə ma iyere Nwiye ghayn kwi,

²⁹ “Asɨyisəg akə kinine ngwə si siy inja akaʼa Sayn ungwə wa afaʼa ku akə aborobod.

³⁰ Mə si zən nə inyi aghɨ umugə ngwə chi umbə ba angəʼ

³¹ Anji zənə ngwə tana ifigi Ba ujum.

³² Uŋwen amə Uzayn Zayn ŋunə umi ghə kwi ba mbənə akəma ba Jû u kyayn Nwiye. Uyi ghə kwi ba wumini ba Israel ni amə umbə ba.”

³³ Mbaʼ ni ingwo mbi Yeso mə meŋere uma akə unó mbənə simeon ghayn da uŋwən

³⁴ Simeon zi aborobod igun úŋwən anigə ghayn abú Mari ingwo ma kwi “ŋwə̂ ŋunə yi ghə ba nanaʼ u gow u yi nibi beʼere ba nanaʼ ungɨŋ Israel uŋwən amə anwini Nwiye naʼa nu cha ba nanaʼ mi beni,

³⁵ u yi ghə ba kyayn unó nanaʼ mbənə ba mə kono ungɨŋ fiŋ ma akənə ayi zum fiŋ uma nu ubey ambere nya nya.”

³⁶ Wa ukən Nwiye moʼ ni amə ayey mə awu ungɨŋ. Ukum ma mə Ana amə ŋwə̂ Fanuel ungɨŋ unebey Asha. Wə si nun yə nam ichomo ni unom ma akə ituʼ ghum cho sambigə unom ma ku.

³⁷ Wə chomo akə ayey uti iŋu pey akə ituʼ ighumi ifəŋi cho ikyugə. Cha yə mə duw ma ungɨŋ imbeŋ Nwiye. Wə mə wumini Nwiye injəy ni chara Nwiye afəb ni ingom

³⁸ Ama zənə simeon mə́ nay nigə yə pey naʼ uyaka abú Nwiye ighayn anó da ŋwə̂ wu abú ba ujum mbənə mbə́ mə́ nəmə kwi Nwiye ziya ba Yerusanem.

Josef ni Mari mbə wene iŋu Nazared

³⁹ Amaʼazənə Josef ni Mari ghə unó ujum mbənə umə ungɨŋ ikɨy Asɨyisəg mbə wene iŋu Nazared aba abey Galeli ni amə asin zənə umə chomo awu.

⁴⁰ Anigə ŋwə̂ awu kweyi ni ika iwé sugi atəw ma ichuŋ Nwiye mə ni uŋwən.

Yeso ŋú nyi ungɨŋ imbəŋ Nwiye

⁴¹ Ituʼ ujum umbaʼ Yeso mə́ ŋuw a Yerusanem iŋú jəg ufere izaʼara chigə igun.

⁴² Amaʼazənə Yeso mə ituʼ ighum cho bigə mbə́ koʼ iŋú a Yerusanem umugə mbə́ mə́ bə ŋúw.

⁴³ Amaʼazənə mbə́ jəg ufere imara imə wene iŋuw unuʼ, Yeso ni amə ŋwə̂ kuŋe tənə ma a Yerusanem. Anigə cha umbaʼ ma di kyayn ma kwi yə tənə ma anjim.

⁴⁴ Mbə mə́ kono kwi u yə aboʼo ikwiy ba zənə yə mə yeŋ ŋúw. Amaʼazənə mbə́ yeŋ akə aney feyn feyn cha u zən uma uŋwən, u ti ni kaba uŋwən akaʼa unya ma nə akaʼa uzi ma.

⁴⁵ Umugə cha mbə di zən ma uŋwən, mbə wene iŋú a Yerusanem ni yeŋ yə kaba uŋwən.

⁴⁶ Amaʼazənə unəy chigə uta, mbə zən uŋwən ungɨŋ imbəŋ Nwiye yə chomo akaʼa mbə́ ataʼa ba. Wə mə zwaray unó mbənə mbə́ mə́ ighay nə biri unó abú úŋwən.

⁴⁷ Ba ujum mbənə mbə́ zəw unó mbənə yə́ mə́ ighay yere inji zənə yə́ kyayn unó wu iyere umugə yə́ mə́ iywiri unó.

⁴⁸ Amaʼazənə umbaʼ ma zən uŋwən, mbə́ yere. Anigə ingwo ma ghayn abú uŋwən kwi “ŋwə̂ amə ukudu anó ngiya uŋunə ngwə aghəy ina ney? Zən umugə a si zən ingəʼ ni ungwə mbaʼ imə́ iyeŋ kaba ayə.”

⁴⁹ Wə ywiri abú úŋwən kwi, “Mben mə kaba aŋu da ngiya? Mben ki kyayn ŋwen kwi ayi mə ungɨŋ na uŋu mbaʼ?”

⁵⁰ Asɨmə cha mbə́ kyayn uma aton akə anó zənə u ghayn abú úŋwən.

⁵¹ Anigə Yeso swiʼi iŋú nə úŋwən a Nazared. Wə pey ni wumine úŋwən. Ingo ma siy unó mbəŋ ungɨŋ fiŋ ma.

⁵² Yeso mə́ ikwey akə nyə̂ inyo, iwe ni bə kwey zaʼa. Nwiye wuʼ uŋwən ba ni bi wuʼ uŋwən fən.