Ukən chuŋ da Yeso Kristo anji zənə Luk ŋwaʼanayn 18 - Aŋwaʼanayn Uso Fey

Inayn maʼa da ayey uti nə asob usaʼa

¹ Yeso ghayn inayn maʼa abú mbə məŋə-anó ma itey abú úŋwən kwi uni chaʼara Nwiye ka umə ibo ma.

² Wə ghayn abú úŋwən kwi, “Asob usaʼa moʼ mə ungɨŋ abey moʼ nu cha yə mə goro ma Nwiye kə iwumini wa moʼ.

³ Ayey uti moʼ mə ungɨŋ abey wu nu yə mə iŋuw abú uŋwən pey yi ghayn kwi ywere aŋu isaʼ uŋu saʼa nə uŋu wa abana.

⁴ Asob usaʼa wu ton iywere ayey wu akə amaʼ sa. Anigə yə nwi ghayn ungɨŋ fiŋ ma kwi, ‘ka nə cha amə goro Nwiye kə wumine ba,

⁵ anigə da ingəʼ zənə ayey uti ŋunə umə zaʼa naʼa iniŋ, ayi saʼ usaʼa ma nji cha umi beni kwi a zwere anji zənə umə duw zaʼa.’”

⁶ Asɨyisəg ghayn kwi, “Mbən zəw anó zənə asob usaʼa iboŋ wu ghayn,

⁷ Asob usaʼa iboŋ wu bə ghayn nigə nji Nwiye waʼa ki saʼa ma usaʼa inaʼ abú ba ma mbənə umə dey abú uŋwən? Umi num amaʼ ki si ywere uŋwən?

⁸ Ayə ghayn inen kwi, uyi yabi saʼa inaʼ abú úŋwən anigə aney zənə Ŋwə̂ Wa mi zaʼa u waʼa mi zən umugə ba ungɨŋ isəg zi fiŋ inyo ma?”

Inayn maʼa da wa Farasay nə wa ŋunə yə́ mə́ fere ukab tag

⁹ Yeso nibi ghayn inayn maʼa zəŋ abú ba moʼ mbənə umə iney kwi, umbə aghəy anó nu akəʼə anigə sə iney ba mbi nə u aghəy ibuw.

¹⁰ “Wə ghayn kwi anóm bigə moʼ koʼ ŋú ungɨŋ imbəŋ Nwiye iŋu chaʼara Nwiye. Wa feyn amə wa Farasay, ufeyn amə wa yə́ mə́ fere ukab tag.

¹¹ Umugə mbə́ ŋú nigə, wa Farasay wu təm atey ma zeʼe ighayn kwi, ‘Nwiye mə na uyaka inigə damugə cha amə aghəy aŋu ni ba mbənə umə numə u aghəy abú ba akə ikay, cha amə aghəy aŋu unó mbənə uki koro ma kə cha amə niŋe aŋu uyey wa chini kə mə aŋu ni wa uwi aba zi ŋunə umə fere ukab tag.

¹² Ayə jiyə injəy ighari bigə igun ika anigə ighaba u ghəy mbənə umə iniŋ akə uba ighum i naʼ aba feyn inigə.’

¹³ Anigə afere ukab tag wu təm agha sa, cha yə di beʼere ma atəw ma aneŋ azobo. Wə niŋe ubugə ma afiŋ ma ighayn kwi, ‘Nwiye kənə akə aŋu wa unó iboŋ!’”

¹⁴ A yə ghayn asiʼ inen kwi, “Amaʼazənə a fere ukab tag wu wene ŋu unuʼ, yə aghəy anó nu akəʼərə ifigi Nwiye chigə ma akə wa Farasay wu. Mbən kyay kwi wa ŋunə umə beʼere inyo Nwiye yi swiʼiri uŋwən asey anigə wa ŋunə umə swiʼiri inyo ma asey Nwiye yi beʼere uŋwən.”

Yeso zi aborobod igun buŋ kuŋe

¹⁵ Ba moʼ num buŋ kuŋe ŋú abú Yeso kwi u bira uŋwən. Amaʼazənə mbə məŋə-anó ma zənə ney, mbə nya ba wu.

¹⁶ Anigə Yeso tiya buŋ a wu ighayn abú mbə́ məŋə-anó ma kwi, “Mbən sayn buŋ kuŋe mbigə u zaʼa iniŋ mbən kən ngwen úŋwən damugə amə ba mbənə umə nə úŋwən umi jəg anó ufon Nwiye.

¹⁷ Ayə ghayn asiʼ inen! Cha ma wa moʼ ŋunə uki beni ma anó fon Nwiye ni ŋwə̂ kuŋe umi nyi ma ungɨŋ anó fon wu.”

Inayn maʼa da wa ŋunə umə nə imbon

¹⁸ Anom kyayn moʼ abú ba Jû biri abú Yeso kwi, “Ataʼa ba chuŋ ami aghəy ngiya kwi jəgə itəni zənə cha imi noʼo imey?”

¹⁹ Yeso ywiri abú uŋwən kwi, “Ngwə tiya aŋu kwi wa chuŋ da ngiya? Cha wa moʼ awu amə wa chuŋ chigə akə Nwiye ma zeʼe.

²⁰ Ngwə kyay ikɨy tənə ighayn kwi, ‘iniŋe ayə uyey wa chini, i zwere yə wa i ji yə izi yə usaʼa ibuw atəw wa wumini ungwə mbaʼ nə ungwə ingwo.’”

²¹ Anom wu ghayn kwi, “Ayə isiy ikɨy təŋ ujum iti amaʼazənə mə́ mə ŋwə̂ kuŋe.”

²² Amaʼazənə Yeso zəw anó zəŋ yə ghayn abú uŋwən kwi, “Ano feyn yə bugə awu ni ngwə mi aghəy. Fənə u aghəy mbənə umə inigə inaʼ ukab wu abú ba kwaŋ anigə ngwə yi mə wa imbon aney azobo. Ngwə bə aghəy nigə, ngwə zaʼa iniŋe inyi injim.”

²³ Amaʼazənə anóm wu zəw anó zəŋ, yə kənə azəd damugə yə mə nə imbon nanaʼ.

²⁴ Yeso zən kwi yə kənə anigə ighayn abú uŋwən kwi, “Ayə ika abú ba imbon inyi ungɨŋ anó ufon Nwiye!

²⁵ Ayə zaba abú kamel ichigə ubəg isaʼ chigə ma akə mugə wa imbon mi inyi ungɨŋ anó ufon Nwiye.”

²⁶ Ba mbənə mbə zəw anó wu biri kwi, “Abə mə́ nigə inji amə ngwa umi du angəʼ?”

²⁷ Yeso ywiri kwi, “Anó zənə achigə ba cha ami chigə ma Nwiye.”

²⁸ Pita ghayn kwi, “Zən mba sayn ita inuʼ iniŋe injə injim.”

²⁹ Yeso ghayn abú uŋwən kwi, “Aŋ, ayə ghayn asiʼ inen kwi, cha wa moʼ awu nu u sayn unuʼ kə uyey kə unya anóm kə mbaʼ kə buŋ da anó ufon Nwiye

³⁰ nu cha umi mə nə u aghəy nanaʼ akə amaʼ zəŋ ni itəni zənə cha imi imey akə ama zənə ami zaʼa.”

Yeso ghayn iŋú pey akə ighari ta da iwu ma

³¹ Yeso num mə məŋə-anó ma ighum cho bigə iyad ighayn abú úŋwən kwi, “Mbən zən mba yə́ koʼo iŋuw a Yerusanem anigə unó ujum mbənə ba ukən Nwiye ŋwaʼanayn da Ŋwə̂ Wa umbi du akə asiʼ.

³² Umbi yimi uŋwən i naʼ abú ba mbənə akaʼa ma ba Jû, umbi chiʼ uŋwən, jəmə uŋwən chad amira inyo ma.

³³ Umbi som uŋwən izwere uŋwən asɨmə asə akə uney uta yi zəmə.”

³⁴ Mbə məŋə-anó zəw unó mbəŋ anigə cha utəw ma di zayn. Nwiye noy aton akə inayn zəŋ abú úŋwən. Cha mbə di kyay uma anó zənə yə mə ghayn.

Yeso zwey ufəg ni yə mə biyə u aghəy

³⁵ Amaʼazənə Yeso nə mbə məŋə-anó ma mə sə tinə iyad Jeriko, ufəg moʼ nu amə anóm chomo iyad inji ni biyə u aghəy.

³⁶ Amaʼazənə yə zəw ikwiy ba mə chigə, u biri kwi, “Amə anó ngiya?”

³⁷ Mbə́ ghayn abú uŋwən kwi, “Amə Yeso wa Nazared umə chigə.”

³⁸ Amaʼazənə ufəg wu zəw nigə, u kyay akə ikay ghayn kwi, “Yeso ŋwə̂ Dafid kənə akə aŋu!”

³⁹ Ba mbənə mbə́ chigə imbey nya uŋwən kwi u chuʼi izi anigə yə mə bə kyayn ghayn kwi, “Ŋyə̂ Dafid kənə akə aŋu.”

⁴⁰ Yeso təm ighayn kwi u num ufəg wu zaʼa na abú uŋwən. Amaʼazənə yə si tinə izaʼa iyad, Yeso ghayn abú uŋwən kwi,

⁴¹ “Ngwə mə kaba kwi aghəy anó ngiya inigə?” Wa wu ywiri kwi, “Asɨyisəg aghəy kwi a zən usin.”

⁴² Yeso ghayn abú uŋwən kwi, “Anigə ti ni zən usin! Inji ibeni fiŋ aghəy yə ngwə boro.”

⁴³ Aba ighari awu, wa wu ti ni zən usin. Anigə yə noʼ inigə anjim Yeso ni yeŋ yə yere Nwiye. Ba ujum mbənə mbə́ zən anó wu, mbə́ yere Nwiye.