Ukən chuŋ da Yeso Kristo anji zənə Luk ŋwaʼanayn 15 - Aŋwaʼanayn Uso Fey

Inayn maʼa da injəg yə nimi

¹ Amə aney moʼ, mbə fere ukab tag nanaʼ nə ba mbənə mbə́ mə́ aghəy unó iboŋ ŋu fere iyad Yeso ni zwaray anó zənə yə́ mə́ ghayn.

² Ba Farasay nə mbə ataʼa ba akə unoʼo zən nigə ni zuʼe ghayn kwi, “Wa uŋu u yə numə ba mbənə umə aghəy unó iboŋ ni jəgə nə úŋwən.”

³ Amaʼazənə Yeso zəw anó zəŋ, yə́ ghayn inayn maʼa zəŋ abú úŋwən kwi:

⁴ “Wa moʼ injən akaʼa bə mə nə ukɨ injəg ifeyn bə nim aka umi sayn iti ighumə abəw iyad ugum iŋu kaba ifeyn zənə yə nimi pey aney zənə umi zən.

⁵ Amaʼazənə umi zən, uyi beʼe ambuʼ ubugə ni iwuʼi

⁶ Amaʼazənə ngwə bə pey na, ngwə yi tiya umbə uzi nə ba mbənə umə chomo inji iyad ighayn abú úŋwən kwi, ‘Mbən zaʼa mba wuʼe ngwa umugə a si zən inyi injəg zənə yə nimi.’

⁷ Ayə ghayn inen kwi amə nigə ami məŋi kwi iwuʼi yi mə azobo ighari wa unó iboŋ feyn bə beŋe fiŋ ma chigə ma akə umugə ba ighumi abəw nu umə aghəy unó nu ukəʼə nu cha umi beŋe fiŋ uma.”

Inayn maʼa da ukab yə nimi

⁸ “Kə ayey ŋunə umə nə ichuʼ ighum, ichuʼ ifeyn bə nim umi ghini ngiya? Aka umi chəw anam ifira na ni kab pey amaʼazənə umi zən.

⁹ Amaʼazənə umi zən, u yi tiya uzi ma nə ba mbənə umə chomo iyad ma ighayn kwi, ‘Mbən zaʼa mba wuʼe ngwa umugə a zən ə uŋu ukab ŋunə yə nimi.’

¹⁰ Ayə ghayn inen kwi amə nigə aməŋi. Mbə angəd Nwiye u mbə wuʼe uma Amaʼazənə wa feyn ŋunə umə aghəy unó iboŋ bə beŋe fiŋ ma.”

Inayn maʼa da ŋwə̂ anóm yə nimi

¹¹ Yeso ŋu imbey ighayn kwi, “Wa moʼ mə awu nu yə mə nə buŋ anóm ubigə.

¹² Ukukuŋe akaʼa buŋ wu ghayn abú mbaʼ uma kwi, ‘Uŋu mbaʼ ghaba u aghəy inaʼ inyi mə aba. Mbaʼ uma ghaba u aghəy ma abú buŋ bigə wu.’

¹³ Amaʼazənə unəy moʼ chigə, ŋwə̂ kukuŋe wu fənə u aghəy ujum mbənə mbaʼ ma naʼ abú uŋwən num ukab wu iŋu abey moʼ agha sa. Amaʼazənə yə pey awu, yə chiŋe ukab wu akə inji iboŋ.

¹⁴ Amaʼazənə ukab wu si mey, ajəgə kaka nyi awu ungɨŋ abey wu anigə yə ti ni zəw ingəʼ.

¹⁵ Anigə yə ŋu ni faʼa abú wa moʼ awu abey. Wa wu mə cha uŋwən ambayn kwi u ŋuw ijəy ingwey.

¹⁶ Wə kaŋa ikaba inji kwi ijəg aghəy jəgi zənə mbə mə ijəy ingwey wu awu anigə cha wa wu naʼa ma apan abú uŋwən kwi u jəg.

¹⁷ Anigə iwe ma wene zaʼa u ghayn ungɨŋ fiŋ ma kwi, ‘Ba faʼa uŋu mbaʼ ujum umbə jəgə abúʼé buʼe anigə a yə akəŋ iŋú iku injey!

¹⁸ Ayi noʼ iŋu abú uŋu mbaʼ pey yi ghayn abú uŋwən kwi, uŋu mbaʼ, mə aghəy anó iboŋ abú Nwiye nibi aghəy inigə.

¹⁹ Cha adi koʼ amə ghəy u tiya aŋu kwi amə ungwə ŋwə̂ num aŋu ni wa faʼa moʼ akaʼa u mbənə ngwə numi.’

²⁰ Wə kono nigə inoʼ ni ŋuw abú mbaʼ ma. Amaʼazənə yə mə bugə agha sa, mbaʼ ma zən uŋwən akənə sugi ungɨŋ fiŋ ma anigə yə nod iŋu ibiya uŋwən yimi isoto indəʼ ma.

²¹ Ŋwə̂ anóm wu ghayn abú mbaʼ ma kwi, ‘Uŋu mbaʼ mə si aghəy anó iboŋ abú Nwiye nibi aghəy inigə cha adi kəʼ amə aghəy u tiya aŋu kwi amə ungwə ŋwə̂.’

²² Wə ghayn nigə, anigə mbaʼ ma ghayn abú ba faʼa ma kwi, ‘Mbən yabi iŋu num ndwi zənə iboŋo ichigə iti ujum i zaʼa zi abú uŋwən izi indəŋ atugi ma izi utabay ughəw ma.

²³ Mbən num ipoŋ zənə isugi chigə iti zaʼa zwere mba kod ighəy iwuʼi.

²⁴ Damugə uŋu ŋwə̂ ŋunə ku akinine u yə ikay, yə nim akinine mba si zən uŋwən’ mbə ghəy nigə ni jəgə wuʼi.

²⁵ Amaʼazənə mbə́ mə́ wuʼe nigə, ŋwə̂ anóm imbey mə ambayn. Amaʼazənə yə mə zaʼa sə tinə iyad na, yə zəw umugə umə nugə ibine.

²⁶ Anigə yə tiya ŋwə̂ faʼa moʼ akaʼa buŋ faʼa wa wu ibiri abú uŋwən kwi, ‘Amə anó ngiya?’

²⁷ Ŋwə̂ faʼa wu ywiri abú uŋwən kwi, ‘U ngwə unya anóm si wene zaʼa anigə mbaʼ zwere ipoŋ kyayn zənə yə kwey chigə ipoŋ ti ujum damugə yə wene zaʼa anji chuŋ.’

²⁸ Unya kyayn wu sə itəm anigə iton kwi cha umi nyi ungɨŋ na. Mbaʼ ma ŋu boʼo ubugə abú uŋwən kwi u nyi a na.

²⁹ Wə ywiri abú mbaʼ ma kwi, ‘Zən ituʼ təŋ ujum ayə faʼa inigə ni sob. Cha adi si aghəy aŋu izəw inigə anigə cha ngwə di si noʼo naʼa kaba ŋwə̂ ibɨgi iniŋ kwi a aghəy iwuʼi awu nə umbəŋ uzi!

³⁰ Anigə ungwə ŋwə̂ ŋunə u zaʼa nu yə si jəgə umbə u aghəy ujum aboʼo mbə́ jəgə isəg ngwə zwere ipoŋ zənə ikwey chigə iti ujum abú uŋwən!’

³¹ Mbaʼ ma ywiri kwi, ‘inyi ajoŋ, ngwə yə nə umbugə ighari ujum u ghəy ujum mbənə umə́ iniŋ amə u mbigə.

³² Anigə yə kəʼ kwi mba aghəy iwuʼi damugə ungwə unya anóm ŋu ku anigə akinine u yə ikay, yə nim akinine mba si zən uŋwən.’”