Ukən chuŋ da Yeso Kristo anji zənə Luk ŋwaʼanayn 12 - Aŋwaʼanayn Uso Fey

Uchere da unó figi

¹ Aney moʼ ikwiy ba ichuʼ ni ichuʼ ŋu fere uma, mbə fere akə inji zənə ba moʼ mə itəʼə umbi. Yeso ni ghayn abú mbə məŋə-anó ma kwi mbən iwe ngwən da afuro ba Farasay ayə ghayn amə da unó ufigi uma.

² Cha aghəy moʼ ni u kəbərə nu cha umi ifiʼi kə unó mbəŋ umə noy ni cha ba mi kyay.

³ Anigə unó moʼ mbənə mbən mə ghəy ungɨŋ imbiri ba umbi zəw amaʼazənə usin mi zayn. Anigə anó zənə mbən jumi ungɨŋ atəw na ba mbi təm sə ghayn idəm na.

Wa ŋunə ba mi god

⁴ Yeso ŋu imbey imə ghayn kwi, “Umbəŋ uzi, ayə ghayn inen kwi mbən mə goro ngwən ba mbənə amə ghəy uzwere aba nyə̂ inyo anigə cha amə ghəy u ghəy anó chini chigə akə zigə.

⁵ Anigə ayi ghayn wa ŋunə amə uŋwən mbən god. Mbən goro Nwiye ŋunə amə ghəy uzwere ba mə nə ikay imaʼ úŋwən ungɨŋ uwəd iboŋ. A yə ghayn inen kwi mbən goro aba uŋwən!”

⁶ “Aka umə fənə ichey itəŋ akə upeni ubigə? Anigə cha Nwiye mə nyaba ma u moʼ.

⁷ Kaba inyoŋ tənə imə igun umbən atəw Nwiye si itaŋ ijum anigə mbən mə́ goro ngwən wa feyn chigə ma akə ichey nanaʼ ifigi Nwiye!”

Anó ni beni kə ni ton Kristo

⁸ “Ayə ghayn inen kwi wa ŋunə ubeni ifigi ba kwi uŋwən mə uŋu wa, Ŋwə̂ Wa yi beni ifigi mbə angəd Nwiye kwi yə kyay uŋwən.

⁹ Anigə wa moʼ bi ton ifigi ba kwi cha u di kyay ma aŋu, Ŋwə̂ Wa yi nibi ton ifigi mbə angəd Nwiye kwi cha adi kyay aŋu uŋwən.”

¹⁰ “Nwiye yi waʼ unó iboŋ wa ŋunə u ghayn anó iboŋ da Ŋwə̂ Wa anigə cha umi waʼ ma unó iboŋ wa ŋunə u ghayn anó iboŋ da Azugə zayn zayn.”

¹¹ “Anigə umbi num a ngwən iŋu saʼ ana ibumi ba Izre kə ifigi gobuna kə ifigi ba mbənə umə tumə abey. Mbən mə tumə ngwən inyo da anó zənə mbən mi ghayn kə anó zənə mbən mi ghayn da ichi anó injən atəw.

¹² Damugə Azugə zayn zayn ayi ghəy mbən kyay anó zənə mbən mi ghayn nu a koʼoro.”

Inayn maʼa da aneŋ wa ukab

¹³ Anom moʼ awu ungɨŋ ikwiy ba wu ghayn abú Yeso kwi, “Ataʼa unó ghayn abú uŋu unya anom kwi u ghaba u ghəy mbənə ungwa mbaʼ ku isey ina.”

¹⁴ Yeso ywiri abú uŋwən kwi, “Inyi azi amə ngwa u zi aŋu isaʼ ba kə nə wa ighaba u ghəy inen?”

¹⁵ Umugə yə ghayn nigə, ughayn abú ba wu kwi, “Mbən num azom ka mbən ghəy ngwən adey akə u ghəy wa kaba akə inji ngiya, cha wa mi mə ma nə ichomo chuŋ amə da u ghəy mbənə umə abú uŋwən ka nə u ghəy mə naʼa ughəy wu amə ngiya?”

¹⁶ Anigə Yeso ghayn inayn maʼa zəŋ abú úŋwən kwi, “Wa imbon moʼ mə nə imbayn nu u ghəy bira awu anji chuŋ.

¹⁷ Anigə wa wu kono ungɨŋ fiŋ ma kwi, ‘Amə yini ngiya nu cha asin amə ghəy ajaŋ ughəy mbəŋ isiy awu?’

¹⁸ Wə ghayn ungɨŋ fiŋ ma kwi, ‘Mə kyayn anó zənə ami ghəy, ayi saʼa itəŋ ingən ichim ikyayn yimə ami siy itəŋ ikwi nə ughəy mbi ujum awu ungɨŋ.

¹⁹ Abə ghəy nigə, ayi ghayn abú inyi inyo kwi inyi inyo ngwə yə nə ughəy nanaʼ ni umi num ayə akə atuʼ nanaʼ boro ayə sə jəgə nugə sə wuʼe ayə!’

²⁰ Anigə Nwiye ghayn abú uŋwən kwi, ‘Ngwə mə aneŋ!’ Ayi num inji itəni akə afəb anigə amə ngwa mi num u ghəy ujum mbənə ngwə tana isiy?”

²¹ Yeso nwi ghayn kwi, “Amə nigə ami məŋə ni ba mbənə umə were u ghəy isiy abə inyo ma ni aka wa umbon ifigi Nwiye.”

Anó ni zi fiŋ igun Nwiye

²² Yeso ghayn abú mbə məŋə-anó ma kwi Ayə ghayn inen kwi ka mbən mə tumə ngwən inyo kwi amə ngiya mbən mi ijəg kə itən inyi inyo kwi amə ngiya ma mi izi.

²³ Mbə ghayn kwi iteni chigə ma akə u ghəy jəgi, inyi inyo chigə ma akə indwi.

²⁴ Mbən nəy mbə abə́gəsaŋ cha umə kono uma ughəy cha umə ijəŋa uma ughəy cha atəw na kə ingən abú uŋwən izi ughəy ungɨŋ anigə Nwiye yə jəyə́ uŋwən mbən chigə ngwən akə inén.

²⁵ Amə ngwa akaʼa inen nu ubə si tumə inyo u yi zwey amaʼazənə umi chomo akə igun isəg?

²⁶ Mbən bə ki kyayn ngwən umugə ighəy anó kukuŋe aton zənə mbə mə́ tumə inyo akə unó chini amə da ngiya?

²⁷ Mbən ney umugə ufrawa mə kwey cha umə faʼa uma ghəy moʼ cha umə zi ma ndwi anigə ayə ghayn inen kwi kaba ufon Solomon ŋunə yə mə gha ma ungɨŋ imbon, cha yə di zi ma ndwi moʼ nu yə boŋ koʼ akə ufrawa wu.

²⁸ Anigə amə Nwiye mə zi ndwi uma. Ufəʼ nu umə akəŋ akə̂choŋ asə asugə u tuŋ akə uwəd. Aka umi naʼa inen chigə ma akə inji zənə umə iney ufəʼ? Injən beni yə bo!

²⁹ “Mbən mə́ tumə ngwən inyo imə kono kwi mbən mi jəgə ngiya kə mbən mi inugə ngiya.

³⁰ (A mə ba mbənə uki kayn ma Nwiye umə kaba u ghəy mbəŋ). Uŋwen mbaʼ kyay kwi mbən yə kaba u ghəy mbəŋ.

³¹ Mbən kaba amə anó ufon ma anigə u yi na u ghəy mbənə inen ujum.”

Anó imbon azobo

³² Buŋ injəg, mbən mə goro ngwən. Mbə́ ghayn kwi ungwə mba yə wuʼe ma inaʼ anó ufon inen.

³³ Mbən fənə umbən u ghəy ujum inaʼ ukab wu abú ba ukwaŋ, mbən mə nə utagayi ŋunə cha umi noʼo nun. Mbən siy injən imbon azobo asin nu cha imi mey, cha uji mi iji kə cha usəʼi mi kod.

³⁴ Mbə́ ghayn kwi, asin zənə injə imbon mə awu, injə fiŋ yi mə awu.

Ba afaʼa mbənə u chomo ikyiʼi

³⁵ “Mbən chomo ikyiʼi ikod itən utwiy ichəw injən anam,

³⁶ ichomo ni buŋ afaʼa mbənə umə nəmə mbaʼ faʼa uma ŋunə u ŋuw inama. Ubə pey yə gweʼe ubunu ufəʼi aba ighari wu.

³⁷ A yə boŋo abú ba faʼa mbənə mbaʼ afaʼa ma bə zaʼa u pey yə zən uŋwən ikyiʼi. A yə ghayn asiʼ inen kwi u yi zi ndwi afaʼa ghayn kwi u chomo asey anigə inaʼ ghəy jəgi abú uŋwən.

³⁸ Nwiye zi aborobod igun ba faʼa mbənə u chomo ikyiʼi amaʼazənə mbaʼ afaʼa uma mi zaʼa. Kə yə zaʼa uzimi kə amaʼazənə uzimi si chigə.

³⁹ Anigə mbən kyayn kwi amə ghəy wa kyay amaʼazənə uji mə zaʼa, nji cha umi sayn ma kwi uji toʼo na ma inyi ungɨŋ.

⁴⁰ Anigə umbən jən mi ghari mbən tana itən inyo damugə Ŋwə̂ Wa mi zaʼa akə amaʼazənə cha mbən mə kono ngwən.”

Wa ŋunə umə faʼa ni fiŋ ujum ni wa ŋunə cha umə faʼa ma ni fiŋ ma ujum

⁴¹ Pita biri abú Yeso kwi, “Asɨyisəg inayn zəŋ amə ina kə amə abú ba jum?”

⁴² Asɨyisəg ywiri kwi, Amə ngwa mə faʼa nə fiŋ ujum ni mə nə iwe? Amə uŋwən ŋunə mbaʼ faʼa mi zi kwi amə atəw abú ba faʼa umbi anigə sə naʼa aghəy jəgi abú uŋwən akə amaʼazənə akoʼo.

⁴³ Ayi boŋ abú wa faʼa ŋunə mbaʼ faʼa ma bə wene zaʼa u pey yi zən uŋwən u mə faʼa afaʼa zənə yə siy abú uŋwən!

⁴⁴ Ayə ghayn asiʼ inen kwi mbaʼ afaʼa wu yi zi uŋwən kwi uni ney u ghəy ma ujum.

⁴⁵ Anigə wa afaʼa wu bə ghayn afiŋ ma kwi cha uŋu mbaʼ afaʼa mi yabi zaʼa ma anigə uti ni som ba afaʼa umbi anom nə ayey, ni yeŋ yə jəgə nugə ma,

⁴⁶ Mbaʼ faʼa ma yi zaʼa aney moʼ nu cha yə mə nəmə ma uŋwən foro akə amaʼazənə cha umi kyay. U yi pey yi saʼ uŋwən akə uba iniŋe uŋwən aboʼo ba faʼa mbənə cha umə faʼa nə fiŋ ma ujum.

⁴⁷ “Umbi som wa afaʼa wu inji iboŋ damugə yə kyayn anó zənə mbaʼ afaʼa ma kaba anigə cha utana ma inyo ma ifa afaʼa wu.

⁴⁸ Anigə umbi som wa faʼa ŋunə cha ukyay ma anó zənə mbaʼ afaʼa ma kaba aba pipi. Wa ŋunə mbə́ naʼa u ghəy nanaʼ abú uŋwən u mbi biri u ghəy nanaʼ abú uŋwən. Wa ŋunə u naʼa u ghəy mbənə u naʼa chigə abú uŋwən, u mbi biri u ghəy mbənə u naʼa chigə abú uŋwən.”

A ghaba zənə ami inyi akaʼa ba Yeso

⁴⁹ “Mə zaʼa izi uwəd igun isəg anigə ayə kaŋa kaba kwi nji yə si mbəŋ!

⁵⁰ A yi num une moʼ anigə cha inyi fiŋ mi chomo akə aborobod pey amaʼazənə ami chigə!”

⁵¹ Mbən kono kwi mə́ zaʼa inaʼ aborobod akə igun isəg? Ayə ighayn inen kwi cha mə di zaʼa ighəy kwi ba ghaba.

⁵² Inoʼ akinine aghaba ayi nyi ungɨŋ na zənə ba mə awu itəŋ uta umbi mə taŋa anó zənə ubigə mə ghayn, ubigə mbə taŋa anó zənə uta mə ghayn.

⁵³ Umbi ghaba anigə mbaʼ yi komo atəw abú ajoŋ ma, ajoŋ yi komo atəw abú mbaʼ. Ingo yi komo atəw abú u kwere ma, u kwere yi komo atəw abú ingo, ingo yi komo atəw abú uyey ajoŋ ma, uyey ajoŋ ma yi komo atəw abú ingo unóm ma.

Anó ni ikyay amaʼ

⁵⁴ Yeso nibi ghayn abú ba kwi, “Amaʼazənə mbən mi zən ipaʼ inoʼo aba zənə nyama chugi mə duw awu aba ighara wu, mbən yi ghayn kwi imbəŋ yə ŋu choʼo. Amə nigə ami chomo.

⁵⁵ Amaʼazənə mbən mi zəw afirm mə zaʼa aba anjim mbən ghayn kwi usin mbə sə ŋu mə nomo amə nigə ami chomo.

⁵⁶ Umbən ba figə unó, mbən kyay umugə itoʼo unó mbənə umə inyi azobo mbən si ki kyay ngwən unó mbənə umə akə kinine?”

Unó imara usaʼa nə ba mbənə mbə́ mə́ nə usaʼa nu uŋwən

⁵⁷ “Aton mbən kyay anó zənə akoʼo ighəy cha mbən mə ighəy ngwən amə da ngiya?

⁵⁸ Mbən bə mə akə usaʼa nə wa moʼ ghəy kwi mbən mara usaʼa wu, i num ayə iŋu ana usaʼa damugə u mbi num ayə iŋu abú mə́ saʼa usaʼa. Mbə saʼa usaʼa wu umbi num ayə ŋú naʼ abú usogwi, usogwi wu mbi num ayə ŋú zi andəŋ.

⁵⁹ A yə ghayn inigə kwi cha ngwə mi du pey aney zənə ngwə mi tu úŋwən ukab ujum.”