Ukən chuŋ da Yeso Kristo anji zənə Luk ŋwaʼanayn 1 - Aŋwaʼanayn Uso Fey

¹ Wa ukyayn Tiyofilus, ba nanaʼ Si aghəy ikay iŋwaʼanayn unó mbənə mbə́ duw inja akaʼa.

² Mbə́ ŋwaʼanayn unó mbənə mbə́ zəw abú ba mbənə mbə́ zən nə aghɨ ma inoʼ Amaʼazənə mbə́ ti. Amə ba mbənə mbə́ mə́ ighayn ukən Nwiye.

³ Wa kyayn Tiyofilus umugə mə si num amaʼ inwini unó mbəŋ ujum ikyay mugə mbə́ num usin inoʼ Amaʼazənə mbə́ ti, mə koni kwi azi akə aŋwaʼanayn anji zənə unó mbəŋ chigə inaʼ inigə.

⁴ Ayə́ ŋwaʼanayn unó mbəŋ boʼo ngwə mi kyay asiʼi ujum ungɨŋ unó mbənə mbə́ taʼa ayə.

Anó da mugə mbə́ ibə́ Jon ŋunə yə́ mə́ naʼa une

⁵ Amaʼazənə Herod mə́ ufon Judeya wa faʼa ambəŋ Nwiye moʼ mə́ awu umə tiya akə Zakariya yə́ mə́ faʼa ungɨŋ iwaŋ afaʼa Abija. Ukum uyey ma mə́ Anisaberd yə duw ungɨŋ unebey Eron.

⁶ Uŋwen mə́ aghəy unó ni ukəʼə ifigi Nwiye. Mbə́ mə́ sɨyi ikɨy nə unoʼo Nwiye anji chuŋ. Cha mbə́ gow ma anó moʼ.

⁷ Amə́ cha buŋ abú úŋwən damugə cha Anisaberd di ibə́ ma. Anigə mbə́ si nun.

⁸ Aney moʼ, Zakariya nu amə́ wa faʼa ambəŋ Nwiye mə faʼa á ma mə faʼa ambəŋ Nwiye Amaʼazənə ba ungɨŋ uwaŋ afaʼa ŋunə yə mə awu ungɨŋ mə faʼa.

⁹ Umugə unoʼo ba faʼa ambəŋ Nwiye mə́ itey, mbə maʼa ibid ichoʼo uŋwən kwi amə uŋwən umi nyi ungɨŋ imbəŋ Asɨyisəg iŋu tuŋ insens.

¹⁰ Amaʼazənə Zakariya mə́ tuŋe isens wu, akama ba mə́ isəg chaʼara Nwiye.

¹¹ Umugə yə́ mə́ tuŋe nigə, Angəd Asɨyisəg duw ifigi ma item aba abugə jəgi adiŋi zənə mbə́ mə́ tuŋe isens igun.

¹² Amaʼazənə Zakariya zən angəd wu, anəm siŋ fiŋ ma anigə igoro ibiya uŋwən.

¹³ Anigə angəd wu ghayn abú uŋwən kwi, “Zakariya imə goro yə Nwiye si zəw inji achaʼara ungwə ayey Anisaberd uyi ibə́ ŋwə̂ anóm inigə ngwə yi chəw ukum ma akə Jon.

¹⁴ Ngwə yi si wuʼe ayə anigə ba nanaʼ chini umbi sə wuʼe uma amaʼazənə umi ibə́ ŋwə̂ wu.

¹⁵ U yi mə aməde wa ifigi Asɨyisəg. Cha umi mə nugə ma unoʼ. Aba amaʼazənə umi ibə́ uŋwən Azugə Nwiye ayi sugi ungɨŋ inyo ma.

¹⁶ U yi gha num ba Israel u nanaʼ uwene zaʼa abú Asɨyisəg Nwiye ko uma

¹⁷ U yi ŋú imbey Asɨyisəg nə ikay foro nə Azugə ni Elayija wa ukən Nwiye. U yi bumi umbaʼ nə buŋ ma. U yi beŋe ba mbənə u mə́ aghəy izəw umə nə iwe ni ba mbənə umə aghəy unó mbənə ukəʼərə. U yi aghəy ba Asɨyisəg utana inyo ma sə nəmə uŋwən.”

¹⁸ Zakariya bírí abú angəd wu kwi, “Ami kyay ngiya kwi amə ney unó mbəŋ mi məŋi? Mə sí nun uŋu uyey sí nun fən.”

¹⁹ Angəd wu ywiri abú uŋwən kwi, “Amə Gabriel ŋunə amə təmə ifigi Nwiye. Amə Nwiye tomo aŋu kwi azaʼa inayn inigə ighayn ukən uchuŋ uŋu inigə.”

²⁰ Asɨmə chá ngwə di bene yə uŋu ukən yimə umi du akə asiʼ Amaʼazənə amaʼa wu yi bə kəʼə. Ngwə yi beŋe akə ukəw cha ngwə mi mə iney pey aney zənə anó zəŋ aghayn ami du akə asiʼ

²¹ Akə Amaʼazənə Zakariya mə inayn nə angəd, ba mə́ isəg nəmə uŋwən. Mbə́ mə́ məŋərə uma umugə u tiŋe ungɨŋ imbəŋ Nwiye akə ama sá.

²² Amaʼazənə Zakariya duw isəg, amə cha inji abú uŋwən inayn abú úŋwən. Anigə mbə́ kyay kwi yə zən ukaŋ ungɨŋ imbəŋ Nwiye. Umugə amə cha inji abú uŋwən inayn, yə mə məgə unó akə ubugə

²³ Amaʼazənə amaʼ afaʼa ma ungɨŋ imbəŋ Nwiye a mey yə́ anóʼ iŋu unuʼ.

²⁴ Amaʼazənə uney moʼ chigə Anisaberd uyey ma ghəy ibum. Yə́ chomo aba ungɨŋ na akə aməg itəŋ.

²⁵ Anisaberd ghayn kwi Amə Asɨyisəg ighəy anó zəŋ ineŋ, yə chi indere atəw inyi atəw akaʼa ba.

Angəd ghayn kwi Mari yə ibə́ Yeso

²⁶ Amaʼazənə Anisaberd mə nə ibum aməg ifəw, Nwiye tom angəd Gabrel á Nazared ungɨŋ abey Galeli.

²⁷ Wə tom uŋwən abú ŋwə̂ ayey ni cha yə di si kyay ma anó anóm nu mbə́ sí kaʼa uŋwən akə inami abú wa moʼ nu ukum ma mə́ Yesep nu wə mə́ aghaŋ unebey ufon Dafid. Ukum ŋwə̂ ayey wu mə́ Mari

²⁸ Angəd wu ŋú abú uŋwən pey yi ighayn kwi, “Ayə chaʼara ayə! Asɨyisəg yə nu ngwə yə aghəy ichuŋ inigə!”

²⁹ Amaʼazənə Mari zəw anó zəŋ, yə naʼ ingəʼ abú uŋwən. Anigə yə kono ungɨŋ fiŋ ma kwi ton akə achaʼara zəŋ amə kwi ngiya?

³⁰ Angəd wu ghayn abú uŋwən kwi, “Mari imə goro yə Nwiye aghəy ichuŋ ma inigə.

³¹ Ngwə yi mə nə ibum ngwə yi ibə́ ŋwə̂ anóm chəw ukum ma akə Yeso.

³² Uyi mə aməde wa anigə ba bi tiya uŋwən akə ŋwə̂ achigə isəg. Asɨyisəg Nwiye uyi ghəy uŋwən akə ufon ni umugə mbaʼ imbey ma Dafid məŋi.

³³ Anigə u yi sə tumə buŋ aghaŋ Yakob akə umaʼ ujum. Cha anó ufon ma ami noʼ nwi!”

³⁴ Mari biri abú angəd wu kwi, “Ano zəŋ ami si məŋe ngiya ni cha adi si kyay aŋu anó anóm?”

³⁵ Angəd wu ywiri abú uŋwən kwi, “Amə Azugə zayn zayn ami zaʼa igun inigə. Ikay Nwiye yi mə inji inyo. Amə aton zənə u mi tiya ŋwə̂ zayn zayn ŋunə ngwə mi ibə́ kwi amə Ŋwə̂ Nwiye.

³⁶ Kono ungwə unya Anisaberd yə si nun mbə́ ghayn kwi cha umi ibə́ ma buŋ akə kinine uyə ni ibum aməg ifəw

³⁷ kyay kwi cha anó moʼ amə aghəy achigə Nwiye.”

³⁸ Mari ywiri kwi “Amə ŋwə̂ afaʼa Asɨyisəg aduw ineŋ anji zənə ngwə si ghayn.” Umugə yə ghayn inigə, angəd wu sayn uŋwən iŋuw ma.

Mari ŋú chaʼara Anisaberd

³⁹ Cha agha di sa, Mari tana inyo ma yabi ŋu ungɨŋ abey ugum aba abey Judeya.

⁴⁰ Yə́ ŋú pey inyi ungɨŋ na Zakariya ichaʼara Anisaberd.

⁴¹ Amaʼazənə Anisaberd zəw achaʼara Mari, ŋwə̂ yeŋ ungɨŋ ibum ma anigə Azugə zayn zayn sugi ungɨŋ inyo ma.

⁴² Anigə yə́ ghayn akə ikay kwi, “Ngwə mə ayey aborobod akaʼa mbə ayey. Aborobod yə igun ŋwə̂ ŋunə ngwə mi ibə́!

⁴³ Anó kyayn zəŋ aduw ineŋ da ngiya, kwi ingwo mbə uŋu Asɨyisəg zaʼa ichaʼara aŋu?

⁴⁴ Aba amaʼazənə mə zəw inja achaʼara, ŋwə̂ ŋunə ungɨŋ inyi ibum wuʼe ma.

⁴⁵ Iwuʼi yə inigə umugə ngwə beni kwi anó zənə Asɨyisəg ghayn inigə ayi du akə asiʼ!”

Mari kyugə ukyi iyere Nwiye

⁴⁶ Mari ghayn kwi, “Inyi fiŋ yə yere Asɨyisəg

⁴⁷ Ayə wuʼe aŋu umugə Nwiye chi aŋu angəʼ

⁴⁸ Damugə yə kono ŋwə̂ afaʼa ma ŋunə cha umə beʼere ma inyo! Iti akə̂choŋ imə ŋu imbey ba jum umbi tiya aŋu akə ayey aborobod.

⁴⁹ Da unó kyayn mbənə Nwiye Ghəy iniŋ. Ukum ma mə u zayn zayn

⁵⁰ Yə́ adiri ba mbənə u wumini uŋwən Inoʼ akə iwaŋ ba iŋu pey akə iwaŋ ba.

⁵¹ Wə num ikay ma Isaʼ ba mbənə umə beʼere inyo da unó mbənə umə́ kono ungɨŋ fiŋ uma

⁵² Yə́ si swiʼiri ifon kyayn igun Utən ufon ma Ibeʼere ba mbənə umə inumə inyo ma asey.

⁵³ Wə si jəy ba injəy nə u ghəy chuŋ Anigə icha ba imbon uŋu ubugə ka.

⁵⁴ Wə si ywere wa afaʼa ma Izre Umugə yə kaʼa abú umba Mbaʼ imbey.

⁵⁵ Wə́ kaʼ kwi iyi idiri Abraham Nibi idiri buŋ mbənə aghaŋ ma bə́ akə umaʼ ujum umugə yə kaʼa abú umba mbaʼ imbey!”

⁵⁶ Meriya chomo nə Anisaberd akə aməg ta. Ki iwene iŋú unuʼ.

Mbə ibə́ Jon uŋunə yə mə́ naʼa unəy

⁵⁷ Amaʼ kəʼ abú Anisaberd ibə́ anigə yə́ bə́ ŋwə̂ anóm.

⁵⁸ Ba mbənə mbə́ mə́ chomo iyad ma foro ni unebey ma zəw umugə Asɨyisəg diri uŋwən anigə mbə bumi uŋwən uni wuʼe uma.

⁵⁹ Amaʼazənə ŋwə̂ wu pey unəy feyn, mbə zaʼa iney ikad ma. Mbə́ mə́ iŋú ichəw ukum ma akə Zakariya nu amə ukum mbaʼ ma.

⁶⁰ Anigə ingo ma ton ighayn kwi, “Ukum ma yi mə Jon.”

⁶¹ Mbə́ ghayn abú uŋwən kwi, “Cha wa unebey moʼ mə nə ukum uyugə!”

⁶² Mbə́ aghəy anwini abú mbaʼ ma biri kwi mba chəw ukum ŋwə̂ akə ngwa?

⁶³ Yə́ aghəy anwini ibiri aba aghəy Amaʼazənə mbə́ naʼ aba aghəy abú uŋwən, yə́ ŋwaʼanayn igun kwi, “Ukum ma mə Jon.” Ba ujum awu ungɨŋ yere

⁶⁴ Aba ighara wu uchəw ma fəʼə ineme ma zá u ti ni yere Nwiye.

⁶⁵ Ba jum mbənə mbə́ mə́ iyad ma god anigə mbə́ saŋa ukən wu ungɨŋ abey Judeya ujum.

⁶⁶ Ba ujum mbənə mbə́ zəw anó zəŋ mə́ məŋərə uma ungɨŋ fiŋ uma ibiri kwi, “ŋwə̂ uŋu mi ŋu məŋi amə ukudu ŋwə̂ ngiya?” Mbə zən kwi abugə Nwiye yə igun ma.

Zakariya kyugə ukyi iyere Nwiye

⁶⁷ Azugə zayn zayn sugi ungɨŋ fiŋ Zakariya mbaʼ Jon anigə yə́ ghayn ukən Nwiye kwi,

⁶⁸ “Mba yere Asɨyisəg ŋunə amə Nwiye ba Israel! Yə́ zaʼa iwere ba ma, Iziya uŋwən.”

⁶⁹ Wə si naʼ ngwa ni wa ukaka ni umi chi ngwa angəʼ uŋwən amə ŋwə̂ Aghaŋ unebey Dafid nu amə́ wa afaʼa Nwiye.

⁷⁰ Wə si kaʼ imbey anjimə ba ukən Nwiye Zayn Zayn.

⁷¹ Kwi uyi chi ngwa angəʼ ikyə́ ubugə umba ba abana Foro ikyə́ ubugə ba ujum mbənə umə bana ngwa.

⁷² Wə ghayn kwi u yi tey adiri abú umba mbaʼ imbey Anigə ikono usəw Zayn Zayn ŋunə yə səŋi.

⁷³ Umugə yə́ kaʼ abú Abraham mbaʼ imbey

⁷⁴ Kwi uyi chi ngwa ungɨŋ ikyə́ ubugə umba ba bana Inaʼ inji kwi mba faʼa abú uŋwən ni cha mba mə goro ngwa anó moʼ.

⁷⁵ Boʼo mba mi chomo akə Uzayn Zayn nibi chomo anji zənə ikoʼo Ifigi ma Akə ama zənə mba mi chomo ikayi.

⁷⁶ “Uŋu ŋwə̂, umbi sə tiya ayə kwi ngwə yi mə wa ukən Achigə isəg Ngwə yi ŋú imbey abú Asɨyisəg Itana inji abú uŋwən.

⁷⁷ Ighayn abú ba ma kwi Nwiye yi chi úŋwən angəʼ Anji zənə u yi nyaba unó iboŋ uma.

⁷⁸ Ungwa Nwiye yi diri ngwa azəd Uyi ghə kwi achugi a toʼo azobo Ita igun.

⁷⁹ Ibigə azobo igun ba mbənə U duw ungɨŋ asin imbiri foro asin zənə ba mə goro kwi umbi ku, Ni nəmə ngwa kwi mba sə yeŋ akə nji aborobod.”

⁸⁰ Ŋwə̂ wu kweyi Azugə Nwiye sugi ungɨŋ ma. Yə́ chomo ungɨŋ imbayn zomo pey aney zənə yə́ tey inyo ma abú ba Izre.