Kolose 4 - Aŋwaʼanayn Uso Fey

¹ Mbaʼ afaʼa, mbən aghəy unó mbənə ukoʼoro nibi boŋ abú itən isob. Mbən kyay kwi mbən yə nibə ni Mbaʼ afaʼa azobo.

Unoʼo chini

² Mbən ni chaʼara Nwiye akə umaʼ jum. Mbən sə chaʼara, mbən chomo ikyiʼi nibə naʼa yə beni ayə abú uŋwən.

³ Mbən nibi ni chaʼara Nwiye ina, da u naʼa apan ina kwi mba ghayn unó mbənə u noy da Kristo. Amə unó mbənə u aghəy kwi amə ana indəŋ.

⁴ Mbən chaʼara Nwiye kwi a ghayn unó mbəŋ u duw zayn, aba anji zənə mə mi ighayn.

⁵ Mbən iwe ngwən akə inji zənə mbən mə ighəy unó abú ba mbənə akə ma ba Kristo. Mbən num apan moʼ zənə mbə mə ni uŋwən ifaʼ abú úŋwən uchuŋ chuŋ.

⁶ Inayn zənə imə duw u ngwən uchəw ni nəmə foro boŋo. Mbən kyay umugə ni iywiri inayn abú ba anji chuŋ.

Achaʼara nu asi nwi

⁷ Tayikikus ungwa unya nu mba wuʼi kwaʼa azəd, yi ghayn unó jum inen da ngwa. Uŋwən amə nibə ungwa unya faʼa akə inji zənə mba mə faʼa abú Asɨyisəg.

⁸ Mə tom uŋwən inen da anó zəŋ, kwi mbə kyay inji zənə mba məŋi. Mə nibi tom uŋwən da umi zi ikay inen.

⁹ Uŋwən yə zaʼa nə Onesimus, nu amə unya mba wuʼi kwaʼa azəd. Uŋwən yə faʼa akə fiŋ jum. Uŋwən amə wa Kolose ni umbən. Úŋwən umbi ghayn unó jum mbənə umə chigə akəŋ inen.

¹⁰ Aristakus nu amə andəŋ nə uŋwən cha achaʼara inen. Mak nu uŋwən nə Banabas mə buŋ akə aghaŋ feyn nibi chaʼara ngwən. Mbə si ghayn anó da uŋwən inen. U bə zaʼa inen, mbən num uŋwən anji chuŋ.

¹¹ Joshu wa ŋunə umə tiya akə Justus yə nibə chaʼara ngwən. Ba Jû mbəŋ abəma ba Jû mbənə umə faʼa aboʼo inyi da anó fon Nwiye. Mbə si kaŋa were aŋu kwaʼa azəd.

¹² Epafras nu amə wa faʼa Kristo, uŋwən mə nibə wa akaʼa injən yə chaʼara ngwən. U yə chaʼara Nwiye akə ikay ighari jum kono ngwən kwi mbən təm ikay nibi tana kyay unó jum mbənə Nwiye mə kaba.

¹³ Amə uzənə abú uŋwən kwi yə si faʼa akə ikay inen nibi faʼa akə ikay abú ba mbənə umə Layodisiya foro Hirapolis.

¹⁴ Luk nu amə wa umə naʼa ifuʼ nu mba wuʼi kwaʼa azəd foro Demas nibi chaʼara ngwən.

¹⁵ Mbən achaʼara unya mbənə umə Layodisiya, nə Nimfa foro abú ba Kristo mbənə umə nyi ufere ungɨŋ na ma.

¹⁶ Amaʼazənə mbən si foŋ aŋwaʼanayn zəŋ akaʼa injən, mbən zən kwi u nibi foŋ ungɨŋ ufere ba Kristo ŋunə umə Layodisiya. Mbən nibi zən kwi mbən foŋ aŋwaʼanayn zənə anóʼo Layodisiya.

¹⁷ Mbən ghayn abú Akipus kwi, U mara afaʼa zənə Asɨyisəg zi inya abugə ma.

¹⁸ Amə umugə Pol ŋwaʼanayn aŋwaʼanayn zəŋ akə umbəŋ ubugə. Mbən kono umugə u kod aŋu akə ingəŋ. Nwiye ghəy ichuŋ inen.