Kolose 3 - Aŋwaʼanayn Uso Fey

¹ Nwiye si zəmə ngwən nə Yeso anigə mbən ni kaba amə ughəy mbənə umə azobo asin zənə Kristo chomo aba bugə jəgi Nwiye.

² Mbən niŋi ikono aba igun ughəy mbənə umə azobo, akə ma igun ughəy mbənə umə igun isey.

³ Mbən si ku anigə itəni wu paʼa nə Kristo ifigi Nwiye.

⁴ Amaʼazənə Kristo ŋunə amə itəni mi du, mbən yi du nə uŋwən ungɨŋ iwumini ma.

Anun itəni nə itəni fiy

⁵ Mbən zwere ughəy igun isəg mbənə nyə̂ inyo mə kaba. Anigə amə anó ni niŋe uyey kə unom wa chini, anó ni aghəy ufibiri unó, anó ni ney ayey kə anó swene adoʼ, ikono da unó iboŋ, anó ni imə kama. (ikama mə anó ni iwumini unwiye).

⁶ Amə da unó mbəŋ nu Nwiye mə́ isə itəm abú ba mbənə cha umə wumine uŋwən.

⁷ Mbən mə́ kaŋa ighəy ukudu unó mbəŋ Amaʼazənə injən itəni mə bugə ungɨŋ unó mbəŋ.

⁸ Asɨmə akinine mbən yi waʼ unó imbəŋ jum, amə anó ni isə itəm, anó ni bəŋe, anó ni jimə ba nə anó ni imə ghayn unyimi unó.

⁹ Ka mbən mə figə ngwən unó abú umbən unya damugə mbən si waʼ anun nyə̂ inyo nibi wa unun unó mbənə yə́ mə ighəy.

¹⁰ Akinine mbən si num nyə̂ inyo fiy. Nwiye yi beŋe nyə̂ inyo fiy wu kwi itana kyay uŋwən nibi chomo ni uŋwən.

¹¹ Anigə cha ikyaba akaʼa ba Jû ni ba mbənə akə ma ba Jû. Cha ikyaba akaʼa ba mbənə u ney ikad uma ni ba mbənə cha udi ney ikad uma. Cha ikyaba akə ba mbənə umə inya ni ba mbənə cha umə inya, Cha ikyaba akə ba mbənə usi du ungɨŋ imbiri nə ba mbənə umə bugə ungɨŋ imbiri. Cha ikyaba akə isob ni wa ŋunə akə ma isob. Kristo mə unó jum. Uŋwən yə ungɨŋ ba jum mbənə umə akə anó feyn nə uŋwən.

¹² Anigə umbən mbənə Nwiye si choʼo kwi amə umbi ba, mbən mə ba zayn zayn nu u wuʼi kwaʼa azəd. Mbən ni idiri ba chini. Mbən mə nə fiŋ chuŋ. Mbən ni boro inyo. Mbən mə nə iboro fiŋ nibi mbə nə iyimi fiŋ.

¹³ Mbən yimə fiŋ akaʼa injən nibi waʼ ifina unó wa ŋunə u gow anó abú unya ma. Anji zənə Asɨyisəg si waʼ itən ifana unoʼ, amə nigə mbən mi nibi waʼ iti ba chini.

¹⁴ Igun unó mbəŋ jum, mbən zwey iwuʼi. Iwuʼi yə koro ba jum kwi umə akə anó feyn.

¹⁵ Mbən sayn kwi aborobod zənə Kristo mə naʼa a tumə itən fiŋ. Amə da aborobod wu nu Nwiye tiya ngwən kwi mbən zaʼa bumə akə nyə̂ inyo feyn. Mbən ni naʼa yə beni ayə abú Nwiye akə umaʼ jum.

¹⁶ Inayn da Kristo kaŋa tənə ungɨŋ itən fiŋ kwaʼa anji chuŋ. Mbən tey unó nibi ikɨy umbən unya akə iwe jum. Mbən kyugay usam, ikyugay ikyə́ iyere Nwiye, nibi kyugay ikyə́ nu inoʼo abú azugə naʼ abú Nwiye. Mbən aghəy nigə akə iwuʼi zənə imə ungɨŋ itən fiŋ.

¹⁷ Anigə unó jum mbənə mbən mə ighəy kə unó jum mbənə mbən mə ighayn, mbən aghəy nigə akə ukum Asɨyisəg Yeso. Mbən bə aghəy nigə, mbən yi mə chigə anjim ma naʼ yə beni ayə abú Nwiye Mbaʼ.

Anó zənə ba mi mə aghəy Amaʼazənə umə ni itəni fiy

¹⁸ Ayey, mbən wumini umbən unom. Zəŋ amə anó zənə akoʼoro abú Asɨyisəg.

¹⁹ Anom mbən wuʼ itən iyey ka mbən mə nya ngwən abú úŋwən.

²⁰ Buŋ, mbən wumini umbən mbaʼ nə ingo akə unó jum damugə zigə ayi boŋ abú Asɨyisəg.

²¹ Mbaʼ, mbən mə aghəy ngwən kwi buŋ u sə itəm nji fiŋ uma yi ibó.

²² Isob mbə wumini umbən mbaʼ faʼa igun isəg akə unó jum. Ka mbən mə wumini úŋwən aba Amaʼazənə umə iney ngwən da uwuʼe ngwən. Mbən faʼa abú úŋwən akə itən fiŋ jum, ni faʼa goro Asɨyisəg.

²³ Akə ufaʼa mbənə mbən mə faʼa jum, mbən faʼa akə itən fiŋ jum chomo ni kwi mbən yə faʼa amə abú Asɨyisəg, akə ma abú ba.

²⁴ Mbən bə sə faʼa, mbən kyay kwi Asɨyisəg yi choʼo afaʼa inen akə ughey mbənə u siy inen azobo Damugə Kristo amə mbaʼ ŋunə mbən mə faʼa abú uŋwən.

²⁵ U yi tu ba mbənə umə aghəy unó iboŋ akə unó iboŋ mbənə umə ighəy. Mbən kyay kwi cha Nwiye mə aghəy ma aghɨ.