Kolose 2 - Aŋwaʼanayn Uso Fey

¹ Ayə kaba kwi mbən kyay kwi ayə faʼa akə ikay da ngwən, da ba jum mbənə umə Layodisiya foro da ba jum mbənə cha mbə́ kyay ma aŋu.

² Mə́ mə aghəy ney da inigere uŋwən kwi uchomo akə anó feyn, iwuʼi unya uma da umi mə nə imbon zənə imə aghəy kwi umə ni iwe nibi tana kyay unó mbənə mbə́ inoy da Nwiye. Unó mbənə mbə́ inoy amə Kristo ma ambuŋ.

³ Nwiye si inoy iwe jum nibi inoy ikyay unó jum ungɨŋ ma.

⁴ Ayə ghayn ney da ka wa moʼ num ma inayn inəm inəm moʼ zaʼa tama ngwən awu.

⁵ Ka ney cha aŋu aboʼo injən akə nyə̂ inyo, asɨmə ayə aboʼo injən akə azugə. Anigə ayə wuʼe aŋu izən kwi mbən yə chomo akə inji chuŋ. Mə nibi wuʼe aŋu izən kwi mbən yə nə ibeni kaka igun Kristo.

Ba mbənə u beni Kristo umbi mə nə itəni zənə isugi

⁶ Numugə mbən si beni kwi Yeso Kristo mə Asɨyisəg, anigə mbən chomo akə anó feyn nə uŋwən.

⁷ Mbən zi itən ighaŋ itana nyi ungɨŋ ma, iniŋi itəni aba igun ma nibi aghəy kwi injən ibeni kara aba anji zənə mbə́ tey inen. Mbən naʼa yə beni ayə abú uŋwən ighari jum da unó jum mbənə umə ighəy inen.

⁸ Ka mbən beni ngwən kwi wa moʼ num aneŋe iwe ba inyoŋ atəw zaʼa tama ngwən awu. Anigə ighəy mbən beni isob abú uŋwən. Aneŋe iwe wu mbə́ num abú umbaʼ imbey uma, foro abú uzugə mbənə umə tumə isəg. Cha iwe aneŋe zəŋ di noʼo ma abú Kristo.

⁹ Ka nə Kristo zaʼa igun isəg ni wa, uŋwən amə kaŋa Nwiye akə unó jum.

¹⁰ Itəni zənə imə ungɨŋ inen, yə sugi damugə mbən mə akə anó feyn nə Kristo. Uŋwən chigə uzugə jum mbənə umə azobo nibi chigə uzugə jum mbənə umə igun isəg.

¹¹ Umugə mbən mə akə anó feyn nə Kristo, mbə si nibi iney itən ikad. Akə ma ba inyoŋ atəw u ney itən ikad akə ubugə uma. Amə Kristo ma ambuŋ unəy itən ikad numugə u chiyə ngwən aton ikay zənə imə abú unó iboŋ igun inen.

¹² Mbə́ si twayn ngwən nə Kristo akə Amaʼazənə mbən num une. Nwiye si nibi zəmə ngwən nə uŋwən anjim umugə mbən beni kwi uyə nə ikay ighəy nigə. Amə uŋwən yə zəmə Kristo.

¹³ Akə amaʼa moʼ mbən mə uwu ba da umbən unó iboŋ foro damugə mbən mə ba nu cha udi iney ikad. Asɨmə Nwiye si naʼa itəni inen ungɨŋ Kristo. Yə si waʼ umba unoʼ iboŋ jum.

¹⁴ Yə aghəy ney numugə yə́ chi aghəy zənə mbə ŋwaʼanayn umba igow unó igun nibi chi unoʼo mbənə mbə́ mə́ yimə ngwa ŋu kom azad abaʼaray.

¹⁵ Yə niy ikay abú uzugə kaka mbənə umə azobo nibi niy abú uzugə kaka mbənə umə ungɨŋ isəg. Zigə tey abú ba jum kwi yə́ si kom uŋwən akə azad abaʼaray.

¹⁶ Anigə ka wa moʼ zi ma usaʼa igun inen da ughəy mbənə mbən mə jəgə kə da u mbənə mbən mə nugə, kə da anó ni ijəg ufere, kə da anó ni bin akə uməg fiy, kə da anəy akuw.

¹⁷ Ughəy mbəŋ amə azəŋ akə ughəy mbənə umi zaʼa. Mba yi zən asiʼ ŋunə umə ungɨŋ unó mbəŋ aba anjim Kristo.

¹⁸ Ka mbən beni ngwən kwi wa moʼ aghəy kwi mbən nim uneʼe ŋunə Nwiye kaʼa inen. Umugə umə mbə tinə ngwən kwi mbən swiʼiri inyo nibə num ngwən kwi mbən yə wumini mbə angəd. Ba mbəŋ mbə́ aghəy ney da ighayn kwi mbi yə zən ə unó ungɨŋ ukaŋ. Umbə beʼere inyo da ighəy kwi mbən beni kwi mbə kyay. Asɨmə cha aton abú úŋwən ibeʼere inyo.

¹⁹ Cha úŋwən mə beni aboʼo Yeso ŋunə amə atəw igun nyə̂ inyo uma. Nyə̂ inyo wu amə ufere ba Kristo. Amə Kristo mə tumə nyə̂ inyo jum kwi imə nə aghəy jəgi. Amə uŋwən umə nibə ibumə usin nyə̂ inyo jum kwi imə akə imbim feyn anji zənə Nwiye kaba.

Wa bə ku ni Kristo, uyi nibi chomo ikay nə uŋwən

²⁰ Mbən si ku nə Kristo anigə yə si chi ngwən aton ikay zənə imə abú uzugə iboŋ mbənə umə ungɨŋ isəg igun inen. Asɨmə ingiya a aghəy kwi mbən chomo ni ba mbənə umə ungɨŋ isəg? Mbən mə iwumini unoʼo ungɨŋ isəg da ingiya? U moʼ amə kwi,

²¹ “Ka wa yimə ma aghəy moʼ! Ka wa zeʼe ma aghəy moʼ! Ka wa bira ma aghəy moʼ!”

²² Unoʼo mbəŋ jum umbə ghayn amə da ughəy mbənə u mi məŋi amə ughəy ibuw amaʼazənə umbə si faʼ awu. Amə unoʼo nu wa mə naʼa kə unoʼo nu wa mə itey.

²³ Unoʼo mbəŋ mbə aghəy kwi mba mə nə iwe umugə mba mə ba mbənə umə iwumini Nwiye, swiʼiri inyo, asɨmə cha ikay ina ni yimə ba mbənə u ton unó mbənə nyə̂ inyo mə kaba.