Kolose 1 - Aŋwaʼanayn Uso Fey

¹ Amə umugə Pol, nu amə wa tom Yeso Kristo nu Nwiye choʼo ni Timoti nu amə ungwa unya mba ŋwaʼanayn aŋwaʼanayn zəŋ.

² Mba yə ŋwaʼanyn inen umbən ba Nwiye mbənə u zi fiŋ igun Kristo á Kolosiya. Nwiye mbaʼ aghəy ichuŋ inen nibi naʼ aborobod inen.

Pol mə chaʼara Nwiye nibi naʼa yə beni ayə abú Nwiye

³ Mba yə naʼa yə beni ayə abú Nwiye nu amə Mbaʼ abú ungwa Asɨyisəg Yeso Kristo. Mba yə naʼa akə umaʼ jum mbənə mba mə chaʼara Nwiye da gwən.

⁴ Mba yə ghəy nigə damugə mba si zəw umugə mbən zi fiŋ igun Yeso Kristo, nibi zəw umugə mbən mə akə iwuʼi ni ba Nwiye jum.

⁵ Mba yə bə naʼa da unó mbənə mbən niŋi ikono awu nu Nwiye siy inen azobo. Mbən si nibi zəw unó mbəŋ ungɨŋ inayn asiʼ zənə amə ukən chuŋ,

⁶ nu yə zaʼa inen. Ukən chuŋ wu u yə saŋa nibə aghəy kwi ba jum ungɨŋ isəg ughəy unó mbənə Nwiye kaba, aba anji zənə yə si nibi ighəy inen inoʼ Amaʼazənə mbən zəw nibi kyay asiʼ da ichuŋ Nwiye.

⁷ Mbən zəw anó da ichuŋ Nwiye abú Epafras nu amə ungwa unya mba wuʼi kwaʼa azəd, nu mba mə nibə faʼa nu uŋwən. Uŋwən yə faʼa abú Kristo ni fiŋ ma jum akə inja ighari.

⁸ Uŋwən si ghəy mba kyay kwi Azugə Nwiye si ghəy mbən wuʼ umbən unya.

⁹ Amə aton zənə iti Amaʼazənə mba zəw anó da ngwən, cha mba di si waʼ imə chaʼara Nwiye da ngwən. Mba yə chaʼara kwi Azugə ma aghəy mbən tana ikyay unó mbənə u kaba. Umbən utəw tana zəŋ mbən kyay unó wu anjim iwe zənə Azugə naʼa.

¹⁰ Mba yə chaʼara nigə da mbən chomo akə inji zənə Asɨyisəg kabay, nibə aghəy amə unó mbənə uwuʼi. Akə inji zəŋ, mbən yi mə aghəy ikudi unó chuŋ jum anigə mbən yi mə bə ŋuw imbey imə tana ikyay Nwiye.

¹¹ Nwiye ŋunə umə ni ikay nu ichigə ikay jum ghəy kwi mbən mə nji inyiʼe fiŋ ki mbən si nyi aton ingəʼ, sə yimə fiŋ sə wuʼe umbən unya.

¹² Mbən sə naʼa yə beni ayə abú Mbaʼ ŋunə u aghəy kwi mba koʼoro anigə mə nə aba akə ughəy mbənə yə siy abú ba mbənə umə tumə úŋwən ungɨŋ uzayn zayn.

¹³ Yə́ si chi ngwa inya ubugə ba mbənə umə tumə isəg ifiri anigə izi ngwa ungɨŋ anó ufon Ŋwə̂ ma ŋunə u wuʼi kwaʼa azəd.

¹⁴ Amə Ŋwə̂ wu yə́ ziya umba utəw anigə ighəy Nwiye waʼ umba unó iboŋ.

Kristo mə atəw igun ughəy jum

¹⁵ Kristo ŋunə ba mə zənə chomo ni Nwiye ŋunə cha ba mə zənə, uŋwən amə wa imbey igun ughəy jum mbənə Nwiye tana.

¹⁶ Nwiye chigə anjim ma itana ughəy jum mbənə umə azobo foro u mbənə umə igun isəg. Yə chigə anjim ma itana ughəy mbənə ba mə zənə foro u mbənə cha ba mə zənə. Yə chigə anjim ma itana mbə angəd, itana uzugə mbənə umə tumə isəg, nibi tana uzugə kaka mbənə umə tumə isəg. Nwiye tana ughəy jum anjim ma nibi tana ughəy jum da u wumini uŋwən.

¹⁷ Kristo mə́ awu ki Nwiye sə tana ughəy jum. Amə ungɨŋ ma nu ughəy jum foro akə aghəy feyn.

¹⁸ Uŋwən amə atəw akə nyə̂ inyoŋ ma, nu amə ifere ba Kristo. Uŋwən amə iti akə ifere ba Kristo. Uŋwən amə wa imbey izəmə. Anigə amə kwi uŋwən amə wa imbey akə ughəy jum.

¹⁹ Yə boŋ abú Nwiye kwi Ŋwə̂ ma chomo aba ichin ichin ni uŋwən.

²⁰ Nwiye zən kwi yə boŋ kwi u chigə anjim Ŋwə̂ ma gha num ughəy jum azobo foro igun isəg umə ni uŋwən. Yə aghəy kwi ba chomo ni uŋwən akə aborobod uŋwən anjim ikay akə iwu zənə Ŋwə̂ ma ku azad abaʼaray.

²¹ Akə amaʼa moʼ mbən mə agha sá abú Nwiye. Mbən mə́ nibə wa bana ma damugə mbən mə kono unó iboŋ nibə ighəy.

²² Asɨmə akinine, yə si gha num ngwa numugə Kristo ku azad abaʼaray. Kristo ku da inum ngwa kwi mba si zayn nu cha anó iboŋ moʼ kə cha usaʼa moʼ igun ina ifigi Nwiye.

²³ Mbən chigə imbey yimə injən ibeni kwi ikay nibi təm ungɨŋ ibeni nu ikay. Ka mbən du ngwən akə unó mbənə mbən niŋi ikono igun Amaʼazənə mbən zəw ukən chuŋ. Mə si ghayn ukən chuŋ wu ungɨŋ isəg jum. Nwiye choʼo aŋu kwi a ghayn ukən chuŋ awu.

Unó mbənə Pol aghəy abú ufere ba Kristo ŋunə umə Kolose

²⁴ Ayə wuʼe aŋu akinine numugə amə zəw ingəʼ da ngwən damugə ayə mara mugə Kristo zəw ingəʼ da nyə̂ inyo. Nyə̂ inyo wu amə ufere ba Kristo.

²⁵ Nwiye si naʼa ikay iniŋ kwi afaʼa a faʼa abú ifere wu da aghəy kwi u tana ikyay inayn ma.

²⁶ Mbə si inoy inayn wu akə ituʼ, nibi inoy abú iwaŋ ba nanaʼ. Asɨmə akinine, Nwiye si aghəy kwi ba ma kyay inayn wu.

²⁷ Nwiye kaŋa kab kwi i aghəy ba kyay ikay zənə yə inoy abú ubey jum mbənə akə ma ba Jû. Anó zənə yə inoy abú úŋwən amə kwi Kristo yə ungɨŋ inen mbənə akəma ba Jû, anigə mbən yi mə nə iwumini ni uŋwən.

²⁸ Mba yə ghayn anó da Kristo abú ba jum. Mba yə num iwe zənə Nwiye naʼa ina para úŋwən nibə tey unó abú ba jum da mba num ba jum mbənə usi kara umugə mba mə akə ibumi ni Kristo ŋu ifigi Nwiye.

²⁹ Ayə aghəy unó mbəŋ akə ikay jum zənə Kristo naʼa iniŋ.