Aŋwaʼanayn zənə Jud aŋwaʼanayn 1 - Aŋwaʼanayn Uso Fey

Achaʼara

¹ Amə umugə Jud nu amə wa faʼa Yeso Kristo nibi mə unya anóm Jems ŋwaʼanayn aŋwaʼanayn zəŋ. A yə ŋwaʼanayn abú ba mbənə Nwiye Mbaʼ wuʼi kwaʼa azəd anigə itiya úŋwən kwi amə umbi ba, nibi ni nəmə úŋwən pey anəy zənə Yeso Kristo mi wənə izaʼa.

² Nwiye diri ngwən, naʼ aborobod inen nibi aghəy kwi iwuʼ sugi ungɨŋ itən fiŋ.

Mbə taʼa ba figə unó

³ Umbəŋ unya nu a wuʼi kwaʼa azəd, mə́ mə kaŋa kaba iŋwaʼanayn inen da inji zənə umba jum mi du angəʼ. Asɨmə mə zən kwi yə boŋ kwi a ŋwaʼanayn izi ikay inen kwi mbən zoŋo ni ŋu imbey da ibeni zənə Nwiye si zi ungɨŋ ubugə umbi ba akə ighari feyn.

⁴ A yə ghayn ney damugə ba moʼ nu cha umə wumine Nwiye si nyaʼa zaʼa nyi injəŋ akaʼa. Umbə beŋe ukən da ichuŋ ungwa Nwiye da ighəy unyimi unó. Mbə nibi ton Yeso Kristo nu aba uŋwən mə ungwa Mbaʼ afaʼa nibə mə ungwa Asɨyisəg. Aŋwaʼanayn Nwiye si ghayn agha sa kwi Nwiye yi zi usaʼa igun uma.

⁵ Ka di ba kwi mbən si kyay unó mbəŋ jum, asɨmə ayə kaba beʼere umbən utəw kwi Asɨyisəg Nwiye ŋunə yə́ chi ba Izre ungɨŋ Ijip, nibi iniy u mbənə amə cha ibeni abú úŋwən.

⁶ Mə nibi beʼere umbən utəw da mbə angəd mbənə cha mbə yimə uma usin mbənə Nwiye naʼa abú úŋwən. Mbə́ sayn usin mbənə mbə mə chomo awu. Nwiye si kod úŋwən akə indəŋ koŋ anigə isey úŋwən ungɨŋ asin firi nyə́m. Umbi chomo awu pey anəy kyay zənə Nwiye mi saʼa isəg.

⁷ Mbən kono sodom nə Gomora foro nə ubəy mbənə umə iyad iyad. Mbə́ mə́ ighəy unyimi unó nibə aghəy ikudi ufibiri unó jum tənə ba mə fana. Umugə umə zəw ingəʼ ungɨŋ uwəd ŋunə utənə akə ghari feyn nu amə anwini abú ba jum.

⁸ Amə nibə ichin ichin nu mbə taʼa ba figə unó mbəŋ unó mə zən anó moʼ ungɨŋ ukaŋ nu aghəy kwi ufana anó akə nyə̂ inyo ma ni tebe Nwiye nibə jimə mbə angəd mbənə umə azobo.

⁹ Kaba Makil nu amə atəw abú mbə angəd, Amaʼazənə yə mə taŋa nə debere da wa ŋunə umi num awu Mose, cha yə kono ma kwi izi usaʼa igun debere da ichiŋi ukum ma. Yə ghayn abú uŋwən aba kwi, “Asɨyisəg ikyayn inigə!”

¹⁰ Asɨmə ba mbəŋ mbə ghayn inayn iboŋ da unó moʼ mbənə cha utəw uma di zayn da iŋwən. Ano mbənə u kyay nu cha u di kweme mbə aghəy u chomo nə nyə̂ nya nya nu imə ughəy unó ibuw ibuw.

¹¹ Ingəʼ yi inyi igun úŋwən, u mbə aghəy unó mbənə Kayn mə ighəy. Umbə aghəy ufibiri unó mbənə Balam mə aghəy da adoʼ ukab. Umbə aghəy izəw aba anji zənə Kora mə ighəy, anigə umbi nim aba ni Kora.

¹² Ba mbəŋ chomo ni indoro akaʼa injən amaʼazənə mbən mə jəgə itən ijəg ighaʼa nə úŋwən. Cha indere atəw mə yimə ma úŋwən Amaʼazənə umə jəgə nə umbən. U mbə iney aba nyə̂ inyo uma. Mbən chomo ni ipaʼ nu ufə mə tinə, nu cha imə aghəy kwi imbeŋ choʼo. Mbə́ chomo nə azad zənə cha amə kuw ma itiŋi, kaba Amaʼazənə uzad mə kuw itiŋi. Mbə chomo nə uzad mbənə u si gow choʼo asəy u ku.

¹³ Mbə chomo ni iba nu isi sugi kwaʼa akə ikay sə ighəy ajo. Ajo wu mə indere atəw abú úŋwən. Mbə chomo ni itəni tənə imə gha iyeŋ aba iyeŋ, nu Nwiye si isey asin abú úŋwən ungɨŋ asin firi nyə́m. Umbi chomo awu koŋ.

¹⁴ Amə da ba mbəŋ nu Enok ghayn agha sa. Enok mə aghaŋ adam nu aŋu pey akə iwaŋ sambigə. Yə ghayn kwi, “Mbən zəw, Asɨyisəg yi zaʼa ni umbi angəd zayn zayn ichuʼ nə ichuʼ,

¹⁵ i sa ba jum inyi úŋwən, nibi zi usaʼa igun ba jum mbənə cha umə wumini Nwiye. U yi zi usaʼa igun uma da unó uzəg mbənə umə ighəy. U yi nibi zi usaʼa da inayn iboŋ jum tənə ba mbənə umə ighəy unó iboŋ, nu cha umə wumini Nwiye mə ghayn da Asɨyisəg.”

¹⁶ Ba mbəŋ mbə́ zuʼe, cha anó moʼ boŋo abú úŋwən. U mbə beni aboʼo unó mbənə nyə̂ inyo uma mə fana. Umbə num ichəw uma komo iguwə da inyo uma. Ubə nibə ghayn inayn nəmə nəm da imə nə ughəy mbənə ukaba.

U chede nə ikɨy abú ba mbənə u niŋi fiŋ igun Kristo

¹⁷ Asɨmə umbəŋ unya nu a wuʼi kwaʼa azəd, mbən kono unó mbənə ba tom ungwa Yeso Kristo si ghayn inen.

¹⁸ Mbə ghayn inen kwi, “Ungɨŋ unəy mbənə usi nwi, ba nu umi mə baʼara ngwən. Umbi beni aboʼo unó mbənə nyə̂ inyo uma mə fana. Unó mbəŋ mbi aghəy kwi ka u wumini uma Nwiye.

¹⁹ Úŋwən mbə zi ghaba akaʼa ba. Úŋwən mbə beni aboʼo unó mbənə nyə̂ inyo ma mə kaba. Cha Azugə Nwiye ungɨŋ uma.

²⁰ Amə inen, umbəŋ unya mbənə awuʼi kwaʼa azəd, mbən ŋuw imbey ungɨŋ ibeni zənə isi zayn mara. Mbən chaʼara Nwiye anji zənə Azugə zayn zayn naʼa ikay inen

²¹ Mbən chomo ikyay kwi Nwiye wuʼi ngwən, anji zənə mbən mə nəmə kwi Asɨyisəg Yeso Kristo diri ngwən, yə ghəy mbən jəg itəni nu cha imi noʼo mey.

²² Mbən diri ba mbənə biyə uma,

²³ ichi mbi moʼ ungɨŋ uwəd anigə chi úŋwən angəʼ. Mbən diri mbi moʼ, nə igoro boʼo ka unó iboŋ uma zoʼo ma ngwən. Asɨmə mbən bana kaba ndwi tənə mbə zi nu usi zoʼ nə unó iboŋ mbənə inyo uma mə fana.”

Aborobod nu asi nwi

²⁴ Mba wumini Nwiye ŋunə u sey ngwən kwi ka mbən gow ngwən. U yə ghəy kwi mbən tem zayn mara ifigi ma, nibi ighəy kwi mbən sə wuʼi ngwən.

²⁵ Abú Nwiye ma zeʼe, mba naʼa iwumini, naʼ anó foŋ kyayn, na ikay nibi naʼ anó ni tumə isəg. Uŋwən yə́ chi ngwa angəʼ anjim ungwa Asɨyisəg Yeso Kristo. Unó mbənə umə uma inoʼ Amaʼazənə yə́ si chigə. Amə uma akinine. Ayi mə uma koŋ. Amə nigə.