Ukən chuŋ da Yeso Kristo anji zənə Jon ŋwaʼanayn 8 - Aŋwaʼanayn Uso Fey

Mbə ibiya ayey u neŋi nə anóm i num ŋú abú Yeso

¹ Amaʼazənə ba wu jum si ŋú uma, Yeso koʼ iŋu igun Ugum Olif.

² Anəy akuŋ afəfəb nə mbiri yə wənə iŋú ambəŋ Nwiye ba ujum fere iyad ma anigə yə chomo asey ni tey unó abú úŋwən.

³ Mbə taʼa ba akə unó nə ba Farasay ibiya ayey nu u niŋe anóm moʼ. Mbə num uŋwən pey yi aghəy u təm imbey uŋwən uma ujum.

⁴ Anigə úŋwən ghayn abú Yeso kwi, “Ataʼa, ba mba ibiya ayey ŋunə u niŋe anóm moʼ.

⁵ Mose ŋwaʼanayn ungɨŋ ita ikɨy kwi mba tum ukudu ayey ŋunə akə atey izwere. Ngwə si ghayn injigə kwi ngiya?”

⁶ Mbə ghayn anó zəŋ ikwaʼara uŋwən da imə nə anó moʼ izi atəw ma. Amaʼazənə mbə́ biri nigə, Yeso guni ma ni ŋwaʼanayn aghəy moʼ asey akə itugi ma.

⁷ Amaʼazənə mbə́ mə́ bə ŋuw imbey imə ibiri unó abú uŋwen, yə́ noʼ item ighayn abú úŋwən kwi, “Wa moʼ bə mi injən kaʼa nu cha u di si gow ma anó u bɨŋi itey imbey itum uŋwən awu.”

⁸ Amaʼazənə yə ghayn nigə, yə gha guni ma ni ŋwaʼanayn ghəy asey ni itugi ma.

⁹ Amaʼazənə mbə zəw anó zəŋ, wa feyn feyn mə nyaʼa tənə noʼo ma iti akə ukyayn ŋú nwi akə ukuŋe. Mbə sayn Yeso ma zeʼe nə ayey wu nu utem aboʼo uŋwən.

¹⁰ Yə tem atey ighayn abú ayey wu kwi, “Ayey, úŋwən mbayn? Cha wa moʼ u buʼe izi usaʼa igun inigə?”

¹¹ Ayey wu ywiri kwi, “Masaʼ, Cha wa moʼ.” Yeso ghayn abú uŋwən kwi, “Kaba umugə cha a di zi aŋu usaʼa igun inigə. Anigə ŋúw, imə nə aghəy ayə unó iboŋ.”

Yeso mə uzayn zayn abú isəg

¹² Yeso inay abú mbə Farasay ighari chini ghayn kwi, “Amə uzayn zayn abú isəg. Ayi naʼ uzayn zayn nibi naʼa itəni abú wa moʼ ŋunə uniŋi inyi jim. Anigə cha uŋwən mi noʼo iyeŋ ma ungɨŋ imbiri.”

¹³ Mbə Farasay wu ghayn abú uŋwən kwi, “Ngwə zən ayə, ngwə yə ghayn anó da inji inyo ungwə amboŋ anigə cha anó zənə ngwə ghayn ama anó asiʼ.”

¹⁴ Yeso ywiri kwi, “Ka nə amə inay aŋu da inyi inyo umbugə amboŋ, anó zənə amə ighayn amə anó asiʼ, damugə mə kyayn asin zənə anóʼo akuŋ nibi kyayn asin zənə amə ŋuw akuŋ. Asɨmə cha mbən kyayn gwen asin zənə anóʼo akuŋ kə asin zənə amə ŋuw akuŋ.

¹⁵ Mbən yə saʼa ba anji zənə ba akə iguni isəg mə saʼa ba. Asɨmə cha a saʼa ŋu wa moʼ.

¹⁶ Ka nə mə mi zaʼa saʼa ba, ayi saʼ akə inji zənə ikoʼoro damugə akə ma umugə zeʼe amə saʼa. Ayə saʼa nə mbaʼ ŋunə u tomo aŋu.

¹⁷ Ayə ungɨŋ umbən unoʼo kwi uzənə ubigə bə ghayn anó, anó zənə u ghayn amə anó asiʼ.

¹⁸ Ayi ghayn anó da inyi inyo. Mbaʼ ŋunə u tom aŋu yə nibə ghayn anó da aŋu.”

¹⁹ Mbə́ biri abú uŋwən kwi, “Ngwə mbaʼ mə awayn?” Yeso wyiri abú úŋwən kwi, “Cha mbən di kyay aŋu kə kyay uŋu Mbaʼ. Mbən di bi kyay aŋu nji mbən mi nibi kyay uŋu Mbaʼ.”

²⁰ Yeso ghayn unó mbəŋ jum amaʼazənə yə́ mə́ tey unó ungɨŋ mbəŋ Nwiye, iyad asin zənə mbə́ mə siyə akubi ukab. Cha wa moʼ ibiya uŋwən damugə cha amaʼazənə mbə mi zwere uŋwən di si koʼo ma.

Yeso chede ba Jû mbənə cha mbə́ di beni uŋwən

²¹ Yeso gha ghayn abú ba Farasay wu kwi, “Ayi ŋu. Mbən yi kaba aŋu, asɨmə umbən unó iboŋ umbi zwere ngwən. Cha nji amə aghəy mbən zaʼa asin zənə amə ŋu akuŋ.”

²² Ba kyayn ungɨŋ abey ba Jû ghayn kwi, “U waʼa kaba izwere inyo ma anji zənə u ghayn, ‘kwi cha nji amə aghəy ba ŋu asin zənə umə ŋuw akuŋ?’”

²³ Yeso ywiri abú úŋwən kwi, “Mbən noʼ akə igun isəg, mə noʼ azobo. Mbən mə ba akə ungɨŋ isəg, cha amə aŋu wa akə ungɨŋ isəg zəŋ.

²⁴ Amə ton zənə a ghayn inen kwi, umbən unó iboŋ umbi zwere gwən. U mbən unó iboŋ umbi zwere gwən ighari mbən bə ki beni gwən kwi amə wa ŋunə a ghayn kwi amə uŋwən.”

²⁵ Mbə́ biri abú Yeso kwi, “Ngwə mə ngwa?” Yeso ywiri abú úŋwən kwi, “Amə wa ŋunə mə si ghayn inen inoʼ akə iti.

²⁶ Ayə nə unó nanaʼ ighayn inen. Ayə nibə nə unó nanaʼ izi usaʼa igun inen. Wa ŋunə tom aŋu yə ghayn asiʼ, anigə unó mbənə a zəw abú uŋwən, aba úŋwən amə ghayn abú ba igun isəg.”

²⁷ Cha utəw uma di zayn kwi u yə ghayn abú úŋwən da Mbaʼ ma.

²⁸ Anigə yə́ ghayn abú úŋwən kwi, “Amaʼazənə mbən si beʼere ŋwə̂ Wa azad abaʼaray, mbən yi si kyay kwi amə wa ŋunə aghayn kwi amə uŋwən, nibi kyay kwi cha amə ghayn anó moʼ akə inyi ghari. A yə ghayn aba anó zənə mbaʼ ghayn iniŋ.

²⁹ Uŋwən ŋunə tomo aŋu, uyə aboʼo inyi. Cha u di sayn ma aŋu zeʼe damugə ayə aghəy aba unó mbənə uboŋo abú uŋwən.”

³⁰ Amaʼazənə yə́ mə́ ghayn anó zəŋ, ba nanaʼ zi fiŋ igun ma.

Isob nə ba mbənə akə ma isob

³¹ Yeso ghayn abú ba Jû mbənə mbə́ zi fiŋ igun ma kwi, “Mbən bi yimi inyi inayn, anigə mbən yi mə kwaʼa umbəŋ aməŋə-anó asiʼ.

³² Mbən yi kyay asiʼ, anigə asiʼ wu yi chi ngwən akə isob.”

³³ Mbə́ ywiri abú uŋwən kwi, “Mba mə buŋ akə aghaŋ Abraham, anigə cha mba di si noʼo beni isob abú wa moʼ. Ngwə si ghayn kwi, ‘Umbi chi ngwa akə isob ingiya?’”

³⁴ Yeso ywiri abú úŋwən kwi, “Ayə ghayn asiʼ inen kwi, ba jum mbənə u aghəy anó iboŋ amə isob abú unó iboŋ.

³⁵ Cha isob mə tənə ma ungɨŋ unebey akə ighari feyn. Amə ŋwə̂ anóm mə tənə ungɨŋ unebey akə ighari feyn.

³⁶ Ŋwə̂ Nwiye bə si chi ayə akə isob anigə yə si chi ayə koŋ.

³⁷ Mə kyay kwi mbən mə buŋ akə aghaŋ Abraham, asɨmə mbən yə kaba izwere aŋu damugə cha unó mbənə amə ghayn mə nyi uma ungɨŋ umbən utəw.

³⁸ Ayə ghayn unó mbənə a zən abú uŋu Mbaʼ, asɨmə mbə yə aghəy amə umbənə mbən zəw abú u gwən mbaʼ.”

³⁹ Mbə́ ywiri abú uŋwən kwi, “U ngwa mbaʼ amə Abraham.” Yeso ghayn abú uŋwən kwi, “Mbən di mə kaŋa buŋ Abraham nji mbən yə aghəy unó mbənə Abraham mə ighəy.

⁴⁰ Mə si ghayn asiʼ ŋunə a zəw abú Nwiye, asɨmə mbən yə bə kaba izwere aŋu. Cha Abraham di aghəy ma ukudu unó ŋunə!

⁴¹ Mbən yə aghəy aba unó mbənə u gwən mbaʼ mə ighəy.” Mbə ywiri kwi, “Cha mba mə buŋ nu mbə ibə́ isəg. Mbaʼ ŋunə umə ina amə Nwiye ma ambuŋ.”

⁴² Yeso ghayn abú uŋwən kwi, “Nwiye di mə kwaʼa u gwən Mbaʼ nji mbən mi wuʼi aŋu, damugə mə zaʼa abú Nwiye. Cha adi zaʼa akə inyi ighari. Amə uŋwən cha aŋu.

⁴³ Cha umbən utəw mə zayn uma akə unó mbənə amə ghayn da ingiya? Amə da mugə cha unó mbəŋ di si nyi uma ungɨŋ umbən utəw.

⁴⁴ Mbən mə buŋ debere ŋunə amə ungwən mbaʼ. Mbən yə kaba ighəy aba unó mbənə mbaʼ mə kaba. Uŋwən mə́ zwere ba inoʼ amaʼazənə akə isəg ti. Cha anó moʼ abú uŋwən ighəy nə asiʼ. Amaʼazənə uŋwən ghayn unó figi, u yə ghayn aba anó zənə amə ungɨŋ fiŋ ima damugə uŋwən amə wa figə unó foro mbaʼ unó figi.

⁴⁵ Anigə cha mbən beni anó zənə amə ghayn damugə amə ghayn asiʼ!

⁴⁶ Amə ngwa akaʼa injən nu amə aghəy u tey anó iboŋ moʼ zənə aghəy? A bə́ mə́ ghayn asiʼ nji aton zənə cha mbən mə beni anó zənə amə ghayn amə da ingiya?

⁴⁷ Wa ŋunə amə wa Nwiye yə zəw anó zənə Nwiye ghayn. Aton zənə cha mbən mə zəw amə damugə cha mbən mə ba Nwiye.”

Yeso mə́ awu ki usə ibə́ Abraham

⁴⁸ Ba Jû wu biri abú Yeso kwi, “Yə waʼa ki koʼ ma ina ighayn kwi ngwə mə wa Samariya foro kwi azugə iboŋ yə ungɨŋ inigə?”

⁴⁹ Yeso ywiri kwi, “Cha azugə iboŋ ungɨŋ iniŋ. Ayə wumini Mbaʼ asɨmə mbən yə tebe aŋu.

⁵⁰ Cha amə kaba aŋu kwi ba wumini aŋu. Asɨmə wa moʼ yə awu umə kaba kwi ba wumini aŋu. Amə uŋwən umi sobo uŋu usaʼa.

⁵¹ Ayə ghayn asiʼ inen kwi, wa moʼ bə aghəy unó mbənə amə ghayn, nji cha uŋwən mi noʼo iku.”

⁵² Ba Jû wu ghayn abú uŋwən kwi, “Mba si kaŋa kyay akinine kwi azugə iboŋ yə ungɨŋ inigə. Abraham ku, ba ukən Nwiye nibi ku, asɨmə ngwə ghayn kwi cha wa ŋunə u beni anó zənə ngwə mə ghayn mi noʼo ikuw

⁵³ Ngwə chigə Abraham ŋunə yə́ kuw? Ba ukən Nwiye bə ku anigə ngwə mə kaba ighayn kwi ngwə mə ngwa?”

⁵⁴ Yeso ywiri kwi, “Mə di mə kaba iwumini inyi inyo, nji iwumini wu amə ibuw. Ayə nə Mbaʼ ŋunə mbən ghayn kwi amə ungwən Nwiye, amə uŋwən ughəy kwi ba wumini aŋu.

⁵⁵ Cha mbən kyay aŋu. Asɨmə mə kyay uŋwən. Abə ghayn kwi cha adi kyay uŋwən amə wa figə unó. Mə kyay uŋwən, anigə ayə aghəy unó mbənə uŋwən ghayn.

⁵⁶ Ungwən mbaʼ Abraham wuʼi kwi nji yə zən amaʼazənə ami zaʼa. Yə nibi zən anigə yə wuʼ kwaʼa azəd.”

⁵⁷ Ba Jû wu ghayn abú uŋwən kwi, “Cha ngwə di si koʼ ayə ighum ituʼ itəŋ anigə ngwə zən Abraham?”

⁵⁸ Yeso ghayn abú úŋwən kwi, “Ayə ghayn asiʼ inen kwi, ki mbə sə ŋu ibə́ Abraham, mə si məŋi awu!”

⁵⁹ Amaʼazənə yə́ ghayn nigə, mbə bɨŋe atəy kwi u tom uŋwən awu, asɨmə Yeso paʼa anigə du ungɨŋ imbəŋ Nwiye.