Ukən chuŋ da Yeso Kristo anji zənə Jon ŋwaʼanayn 19 - Aŋwaʼanayn Uso Fey

Ba kyayn abú ba Jû ghayn kwi u zwere Yeso

¹ Payilet ghəy nigə num Yeso ghayn usogwi swayn uŋwən akə gwat.

² Usogwi awu num iniʼ injəŋ injəŋ kad adam ufon awu izi atəw abú uŋwən. Mbə́ nibi zi ndwi ufon abú uŋwən.

³ Mbə́ ŋu abú uŋwən pey ni fə́ uŋwən ghayn kwi, “Mbee! Mba yə chaʼara ayə ufon ba Jû!”

⁴ Payilet gha du ŋu isəg pey yi ghayn abú ba kyayn ungɨŋ abey ba Jû kwi, “Mbən zən! Mə num uŋwən zaʼa boʼo mbən kyay kwi cha adi zən aŋu anó iboŋ moʼ zənə u gow.”

⁵ Anigə Yeso du isəg nə adam zənə mbə́ num uniʼ injəŋ injəŋ kad adam ufon zi atəw ma foro nə ndwi ufon wu. Payilet ghayn abú úŋwən kwi, “Mbən zən, amə anom wu uŋu!”

⁶ Amaʼazənə ba kyayn ambəŋ Nwiye nə ba mbənə umə nəmə imbəŋ Nwiye zən uŋwən, mbə́ kyay akə ikay ghayn kwi, “Komo uŋwən azad abaʼaray, komo uŋwən azad abaʼaray.” Payilet ghayn abú úŋwən kwi, “Mbən num uŋwən umbən umbən ŋu kom damugə cha adi zən aŋu anó iboŋ moʼ igun ma.”

⁷ Ba kyayn ungɨŋ abey ba Jû ghayn kwi, “Mba yə nə noʼo moʼ umə tey kwi uŋwən ku damugə yə ghayn kwi imə Ŋwə̂ Nwiye.”

⁸ Amaʼazənə Payilet zəw anó zəŋ, yə bó kwaʼa azəd.

⁹ Anigə yə wene nyi ungɨŋ itoʼ nə Yeso pey biri abú uŋwən kwi, “Ngwə noʼo awayn?” Cha Yeso ywiri ma.

¹⁰ Anigə Payilet biri abú uŋwən kwi, “Cha ngwə mi kaba inayn ayə iniŋ? Cha ngwə kyay ayə kwi ayə nə ikay ichi ayə sayn nibi mə nə ikay ikomo ayə azad abaʼaray?”

¹¹ Yeso wyiri abú uŋwən kwi, “Ngwə yə nə ikay igun iniŋ aba damugə amə Nwiye naʼa ikay wu inigə. Anigə wa ŋunə naʼa aŋu inigə si aghəy anó iboŋ zənə abɨy chigə.”

¹² Amaʼazənə Payilet zəw anó zəŋ, yə kab kwi nji yə chi uŋwən sayn asɨmə ba wu kyay akə ikay ghayn kwi, “Ngwə bə chi anom yugə sayn kyay kwi cha ngwə mə ayə azi Kayisa! Wa ŋunə u num inyo kwi imə ufon mə wa bana Kayisa.”

¹³ Amaʼazənə Payilet zəw inayn zəŋ, yə́ num Yeso du isəg pey yi chomo igun atən zənə umə chomo igun saʼa isaʼa. Umbə itiya akə asin wu akə inayn Hibru kwi Gabata.

¹⁴ Ingom si ka anəy zənə umə tana inyo ijəg ufere izaʼara chigə igun. Payilet ghayn abú ba kyayn ungɨŋ abey ba Jû kwi, “Mbən zən amə ugwən ufon uŋu.”

¹⁵ Mbə́ kyay akə ikay ghayn kwi, “Zwere uŋwən! Zwere uŋwən! Komo uŋwən azad abaʼaray.” Yə biri abú uŋwən kwi, “Mbən mə kaba kwi a komo uŋwən ufon azad abaʼaray?” Ba kyay ambəŋ Nwiye ywiri kwi, “Cha ufon chini ina chigə akə Kayisa.”

¹⁶ Payilet ghey nigə naʼa Yeso abú úŋwən kwi u ŋuw kom azad abaʼaray. Usogwi num Yeso ŋu nə uŋwən.

Usogwi kom Yeso azad abaʼaray

¹⁷ Yeso beʼe azad abaʼara ma anigə mbə du ŋu asin zənə umə itiya akə ukaba utəw. Umbə itiya asin wu akə inayn Hibru kwi, Golgota.

¹⁸ Mbə komo uŋwən awu, nibi komo anóm chini ubigə aboʼo uŋwən. Mbə komo ufeyn aba bugə jəgi, ikomo ufeyn aba bugə ikyabay. Yeso mə ungɨŋ ugha uma.

¹⁹ Payilet ŋwaʼanayn aŋwaʼanayn moʼ u kom atəw azad abaʼaray wu. Yə ŋwaʼanayn kwi, “Yeso wa Nazaret, ufon ba Jû.”

²⁰ Ba nanaʼ foŋ aŋwaʼanayn wu damugə asin zənə mbə́ komo Yeso mə iyad Yerusanem. Payilet ŋwaʼanayn aŋwaʼanayn wu akə inayn Hibru, akə inayn Latin foro akə inayn Grik.

²¹ Ba kyayn ambəŋ Nwiye ghayn abú Payilet kwi, “Iŋwaʼanayn ayə kwi, ‘Ufon ba Jû.’ Ŋwaʼanayn amə kwi, ‘Anom ŋunə ghayn kwi imə ufon abú ba Jû.’”

²² Payilet ywiri kwi, “Anó zənə asi ŋwaʼanayn mə si ŋwaʼanayn.”

²³ Amaʼazənə usogwi wu si komo Yeso, mbə num ndwi ma ghaba akə uba kyugə. Sogwi feyn feyn num aba feyn. Mbə nibi num ndwi maʼa ma nu mbə ta abá akə aba ndwi feyn feyn iti atəw iŋu pey aton.

²⁴ Mbə́ num nigə ghayn uma uma kwi, “Ka ba peŋi ngwa izəŋ, asɨmə mba maʼa ibit zən wa ŋunə umi num.” Anó zəŋ aghəy boʼo inayn Nwiye zənə mbə́ ŋwaʼanayn iduw akə asiʼ kwi, “Mbə́ ghaba inyi ndwi akaʼa uma, nibi maʼa ibit boʼo inum inyi ndwi maʼa.” Zəŋ amə anó zənə usogwi wu aghəy.

²⁵ Ba moʼ akaʼa ba mbənə mbə́ təm iyad azad abaʼara zənə mbə́ komo Yeso awu amə ingo ma, unya ayey ingo ma, Meri uyey Clopas nə Meri Magdalen.

²⁶ Amaʼazənə Yeso zən ingo ma nibi zən aməŋə-anó ŋunə yə wuʼi u təm awu, yə́ ghayn abú ingo ma kwi, “Ayey, zən, uŋwən amə ungwə ŋwə̂!”

²⁷ Yə́ nibi ghayn abú aməŋə-anó wu kwi, “Zən, uŋwən amə ungwə ingo!” Inoʼ amaʼa wu, aməŋə-anó wu num ingo Yeso ŋu akuw ma nə uŋwən.

Inji zənə Yeso kuw

²⁸ Yeso kyay kwi unó jum si mey, anigə itey kwi anó zənə mbə ŋwaʼanayn ungɨŋ aŋwaʼanayn Nwiye si du akə asiʼ. Yeso ghayn kwi, “Inyi adoʼ zom.”

²⁹ Ukuʼ moʼ mə́ awu nə anya unoʼ ungɨŋ isugi. Anigə wa moʼ num ijuʼ zi ungɨŋ unoʼ wu sugə akə imbaŋ zi uchəw abú uŋwən kwi u sotoy.

³⁰ Amaʼazənə yə́ sotoy unoʼ wu, yə́ ghayn kwi, “Yə si məy!” Yə́ ghayn nigə meʼe atəw atuŋ ikuw.

Usogwi wu zom aba bumi Yeso

³¹ Anəy wu amə anəy zənə ba Jû mə tana inyo boʼo ijəg anəy aku. Anigə cha ba kyayn ungɨŋ abey ba Jû kaba uma kwi uwu uma tənə igun azad abaʼaray pey anəy aku, damugə anəy aku wu amə anəy aku kyayn abú uŋwən. Anigə mbə́ ŋu biri abú Payilet kwi u beni u buʼiri ughəw ba wu boʼo u yabi ku u swiʼiri uwu ma.

³² Anigə usogwi wu ŋu buʼiri ughəw wa imbey foro umbi wa chini ŋunə mbə komo nə Yeso.

³³ Asɨmə amaʼazənə mbə pey abú Yeso, mbə zən kwi yə si ku. Anigə cha mbə buʼiri uma ughəw ma.

³⁴ Asɨmə sogwi feyn zom aba bumi ma akə ighoŋ. Aba ighari wu, anəm nə une ni duw awu.

³⁵ Wa ŋunə yə zən anó zəŋ si ghayn da aŋwən, Anigə yə́ kyay kwi anó zənə yə́ ghayn amə anó asiʼ.

³⁶ Anó zəŋ aghəy boʼo anó zənə mbə́ ŋwaʼanayn ungɨŋ aŋwaʼanayn Nwiye duw akə asiʼ kwi, “Cha umi buʼiri uma awu ma moʼ.”

³⁷ Mbə́ ŋwaʼanayn asin chini ungɨŋ aŋwaʼanayn Nwiye kwi, “Umbi ney uŋwən ŋunə u zumi nə ighoŋ.”

Inji zənə mbə́ twayn Yeso

³⁸ Amaʼazənə anó zəŋ chigə, Josef wa Arimatiya ŋu biri abú Payilet kwi u sayn u ŋu swiʼiri awu Yeso num ŋu. Payilet beni, anigə yə́ ŋu swiʼiri awu wu num ŋu. (Josef wu mə aməŋə-anó Yeso anjim anjim damugə yə́ mə́ goro ba kyayn ungɨŋ abey ba Jû).

³⁹ Nikodemus ŋunə yə́ ŋu abú Yeso uzimi nibi ŋu nə uŋwən. Yə num ughəy mə̂ nu u bɨgiri nə aló nu umə ŋuw ka ukiro ighumi ta ŋu nə aŋwən.

⁴⁰ Anom mbəŋ ubigə swiʼiri awu Yeso fid ungɨŋ aba ndwi linen aka unun. Mbə́ si zoʼ ndwi wu akə ughəy wu anji zənə unoʼo ba Jû ni twayn wa umə itey.

⁴¹ Imbayn moʼ mə iyad asin zənə mbə́ komo Yeso akuŋ. Nu mə toŋo akə ukob. Cha mbə di si twayn ma awu wa moʼ ungɨŋ isəy wu.

⁴² Umugə ba Jû mə tana inyo ijəg anəy aku, cha mbə mi beʼe awu wu ŋu agha sá. Foro anji zənə isəy wu mə iyad iyad, mbə ŋu zi awu Yeso ungɨŋ isəy wu.