Ukən chuŋ da Yeso Kristo anji zənə Jon ŋwaʼanayn 16 - Aŋwaʼanayn Uso Fey

¹ Yeso ghayn abú mbə́ məŋə-anó ma kwi, “Mə si ghayn unó mbəŋ inen boʼo ka injən ibeni bó ma.

² Ba mbi fuw gwən ungɨŋ na bumi ba Jû. Ayə ghayn asiʼ inen kwi amaʼ yi zaʼa nu wa moʼ ŋunə u zwere gwən uyi kono kwi iyə aghəy amə anó zənə Nwiye ghayn abú uŋwən.

³ Umbi aghəy unó mbəŋ inen damugə cha udi kyay Mbaʼ kə nibi kyay aŋu.

⁴ Asɨmə mə si ghayn unó mbəŋ inen boʼo amaʼa wu bə koʼo, mbən yi si kyay kwi mə si chede gwən.” Yeso ŋu imbey bə ghayn abú mbə mənə-anó ma kwi, “Cha mə di ghayn aŋu unó mbəŋ inen amaʼazənə mə ti mə tey unó inen damugə mə́ mə nə umbən.

Anó zənə Azugə zayn zayn mi mə aghəy

⁵ Akinine, ayə ŋuw abú wa ŋunə yə́ tomo aŋu, asɨmə cha wa moʼ akaʼa injən ibiri iniŋ kwi, ‘Ngwə mə ŋuw awayn?’

⁶ Asɨmə numugə a si ghayn unó mbəŋ inen, akənə si sugi ungɨŋ itən fiŋ.

⁷ Ayə ghayn asiʼ inen kwi yə kaŋa boŋ kwi, a ŋuw damugə abə ki ŋuw aŋu nji cha Awere ba mi zaʼa ma inen. Abə ŋuw, ayi cha uŋwən inen.

⁸ Amaʼazənə ami zaʼa, ayi aghəy kwi ba mbənə umə ungɨŋ isəg u kyay kwi ikono uma di koʼoro da unó iboŋ, da anó ni ighəy unó mbənə ukoʼoro foro da mugə Nwiye mi saʼa isəg.

⁹ Cha ikono uma di ikoʼoro da unó iboŋ damugə cha u zi fiŋ uma inyi igun.

¹⁰ Cha ikono uma di ikoʼoro da anó ni aghəy anó zənə akoʼoro damugə ayə ŋuw abú uŋu Mbaʼ anigə cha mbən mi noʼ gha zən aŋu.

¹¹ Cha ikono uma di koʼoro da inji zənə Nwiye mi saʼa isəg damugə Nwiye si saʼ wa ŋunə umə tumə isəg zən.”

¹² “Unó nanaʼ mbə iniŋ ighayn inen, asɨmə unó mbəŋ naʼ chigə inji zənə amə aghəy mbən zəw akinine iyimi ujum.

¹³ Amaʼazənə Azugə zənə ami aghəy kwi mbən kyay asiʼ mi zaʼa, ayi tey asiʼ jum inen. Cha amə́ nayn aŋu akə ighari ma, ayə inayn amə anó zənə a zəw. Ayi beʼere umbən utəw da unó mbənə umə zaʼa imbey.

¹⁴ Uyə wumine aŋu damugə u yi num anó zənə amə ghayn abú uŋwən ighayn inen.

¹⁵ Ughəy uŋu mbaʼ jum amə umbəŋ. Amə aton zənə a ghayn kwi Azugə zayn zayn yi num unó mbənə ami ghayn abú uŋwən ighayn inen.”

Akənə ayi beŋe akə iwuʼi

¹⁶ Yeso gha ghayn abú mbə məŋə-anó ma kwi, “Cha mbən mi zən aŋu akə ŋwə̂ akwere amaʼ. Asə ŋu pey akə ŋwə̂ akwere amaʼa chini, mbən yi zən aŋu.”

¹⁷ Mbə məŋə-anó ma moʼ mə biri uma uma kwi, “Aton akə inayn zəŋ u ghayn ina kwi, ‘Cha mba mi zən ayi akə akwere maʼ, asə akə akwere amaʼ chini mba yi zən ayi.’ Nibi ghayn kwi, ‘Amə damugə amə ŋuw abú mbaʼ amə kwi ingiya?’

¹⁸ Mbə́ mə́ biri kwi aton akə ‘Akwere amaʼ’ Amə kwi ingiya? Cha umba utəw di zayn da anó zənə umə ighayn.”

¹⁹ Yeso kyay kwi umbə kaba ibiri abú uŋwən, anigə yə́ ghayn abú úŋwən kwi, “Mə ghayn kwi akə akwere amaʼ moʼ cha mbən mi zən aŋu, asə akə ŋwə̂ kwere amaʼ chini mbən yi zən aŋu. A mə da inayn zəŋ nu mbən mə ibiri umbən umbən?

²⁰ Ayə ghayn asiʼ inen kwi mbən yi chweŋ isɨy nibi idey da unó mbənə umi du iniŋ, asɨmə isəg yi wuʼ. Mbən yi kənə asɨmə akənə wu yi beŋe akə iwuʼi.

²¹ Amaʼazənə ayey mə inomo ibə́, u yə kənə da inji zənə umə zəw ubuʼ. Asɨmə amaʼazənə usi ibə́, u yə nyaba ubuʼ wu ni wuʼe ma damugə u si ibə́.

²² Amə nigə ami məŋi nə umbən. Mbən yə kənə akinine, asɨmə ayi gha zən ngwən, iwuʼi yi sugi ungɨŋ itən fiŋ. Cha wa moʼ awu nu umi chi iwuʼi zənə imə ungɨŋ itən fiŋ.

²³ Anəy wu yi bə zaʼa, cha mbən mi biri gwən anó moʼ iniŋ. Ayə ghayn asiʼ inen kwi mbən bə biri anó moʼ abú uŋu Mbaʼ akə uŋu ukum, u yi aghəy anó wu inen.

²⁴ Ipey akinine, cha mbən di si biri gwən anó moʼ abú Mbaʼ akə uŋu ukum. Akinine mbən biri uyi aghəy anó wu inen boʼo iwuʼi sugi ungɨŋ itən fiŋ.”

Kristo si chigə isəg

²⁵ Yeso gha ghayn abú mbə məŋə-anó ma kwi, “Ayə ghayn unó mbəŋ inen akə inayn maʼa. Mə kyay kwi amaʼ yi zaʼa nu cha ami ghayn inen akə inayn maʼa. Ayi ghayn inen asaŋ asaŋ da Mbaʼ.

²⁶ Anəy wu yi bə zaʼa, mbən yi biri anó moʼ abú Mbaʼ akə uŋu ukum. Cha aton iniŋ ibiri anó moʼ abú uŋwən da umbən utəw,

²⁷ damugə Mbaʼ wuʼe ngwən. Yə wuʼe ngwən damugə mbən wuʼe aŋu nibi beni kwi amə uŋwən tomo aŋu.

²⁸ Mə́ noʼ abú Mbaʼ ki zaʼa ungɨŋ isəg. Akinine ayə sayn isəg iŋu abú mbaʼ.”

²⁹ Mbə məŋə-anó ma ghayn abú uŋwən kwi, “Akinine ngwə yə sə inayn asaŋ asaŋ akə ma akə inayn maʼa!

³⁰ Mba si kyay akinine kwi ngwə kyay unó jum, anigə cha aton abú wa moʼ ibiri anó moʼ inigə. Zəŋ aghəy mba beni kwi amə Nwiye tomo ayə.”

³¹ Yeso ywiri abú úŋwən kwi, “Mbən si beni akinine?

³² Amaʼ yə zaʼa, amaʼ wu si zaʼa nu mbən mi saʼa. Wa feyn feyn ŋu akuw ma, anigə mbən jum mbən yi sayn aŋu umugə zeʼe. Asɨmə cha aŋu zeʼe, damugə Mbaʼ yə nə umugə.

³³ Mə si ghayn unó mbəŋ inen boʼo mbən chomo akə aborobod numugə mbən mə akə anó feyn nə umugə. Mbən yi zəw ingəʼ ungɨŋ isəg, zəŋ asɨmə mbən yimə fiŋ mə si chigə isəg!”