Ukən chuŋ da Yeso Kristo anji zənə Jon ŋwaʼanayn 15 - Aŋwaʼanayn Uso Fey

Yeso mə azad fayin asiʼ

¹ Yeso ghayn abú mbə məŋə-anó ma kwi, “Amə azad fayin asiʼ. Uŋu Mbaʼ mə wa ŋunə umə iney imbayn fayin.

² Uŋwən yə sobo itap jum tənə imə iniŋ nu cha imə ikuw uma itɨŋi chuŋ. Uŋwən yə nibə kwana itap jum tənə cha imə ikuw ma itɨŋi boʼo ichiʼe ikuw itɨŋi chuŋ.

³ Inayn zənə asi ghayn inen si ghəy mbən zayn.

⁴ Mbən chomo akə anó feyn nə umugə, akə inji zənə a nibi chomo akə anó feyn nə umbən. Akə inji zənə cha utap mə ikuw ma itɨŋi amaʼazənə cha ibumi ma inyo azad fayin, amə nibə mugə mbən mi ikuw itɨŋi amaʼazənə mbən bə mə akə anó feyn nə umugə.

⁵ Amə azad fayin. Mbən mə itap fayin. Wa ŋunə u chomo akə anó feyn nə umugə, ayi nibi chomo akə anó feyn nə uŋwən. Anigə uŋwən yi ikuw itɨŋi nanaʼ. Cha nji amə aghəy mbən aghəy anó moʼ amaʼazənə cha aŋu awu.

⁶ Wa moʼ ŋunə cha udi chomo ma akə anó feyn nə umugə, umbi sobo uŋwən i waʼ numugə umə waʼa utap zomo. Ba mbi fere itap zomo wu maʼ ungɨŋ uwəd ituŋ.

⁷ Mbən bə chomo akə anó feyn nə umugə, inyi inayn chomo ungɨŋ inen, mbən bə biri aghəy moʼ zənə mbən mə kaba, uŋu Mbaʼ yi aghəy anó wu.

⁸ Anó zənə ami naʼa iwumini abú uŋu Mbaʼ amə kwi mbən ikuw itɨŋi nanaʼ, zigə yi tey kwi mbən mə umbəŋ məŋə-anóʼ.

⁹ Mə wuʼe gwən aba anji zənə uŋu Mbaʼ wuʼe aŋu. Anigə mbən chomo akə anó feyn nə umugə numugə a wuʼi gwən.

¹⁰ Mbən mbə num itəŋ ikɨy, ayə wuʼe ngwən aba anji zənə a si num ikɨy uŋu Mbaʼ anigə uŋwən nibi wuʼe aŋu.

¹¹ Mə si ghayn unó mbəŋ inen boʼo iwuʼi mə ungɨŋ inyi fiŋ nibə mə ungɨŋ itən foro kwi iwuʼi sugi ungɨŋ itən fiŋ.”

¹² “Uŋu ukɨy ŋunə amə naʼa inen amə kwi mbən wuʼ mbən unya aba anji zənə a nibi wuʼe gwən.

¹³ Cha iwuʼi moʼ awu nu ichigə iwuʼi zəŋ kwi, wa ku igun utəw uzi ma.

¹⁴ Mbən mə umbəŋ uzi amaʼazənə mbən bə aghəy unó mbənə aghayn inen.

¹⁵ Cha amə gha itiya ŋu gwən kwi ba faʼa damugə cha ŋwə̂ afaʼa mə kyay ma aghəy zənə mbaʼ faʼa mə ighəy, asɨmə ayə itiya gwən akə uzi damugə unó jum mbənə azəw abú uŋu Mbaʼ mə si ghayn inen.

¹⁶ Akə ma umbən mbən choʼo aŋu. Amə umugə mə choʼo gwən itom kwi mbən ŋuw ikuw itɨŋi nu amə itɨŋi tənə imi tənə akə ighari feyn. Mbən bə aghəy nigə, Mbaʼ yi naʼ aghəy moʼ zənə mbən biri abú uŋwən akə uŋu ukum.

¹⁷ Ukɨy ŋunə amə naʼa inen amə kwi, mbən wuʼ umbən unya.”

Isəg bana mbə məŋə-anó Yeso

¹⁸ Yeso ŋu imbey ni ghayn abú mbə məŋə-anó ma kwi, “Isəg bə bana gwən, mbən kyay kwi yə si nibi bana aŋu ki sə bana gwən.

¹⁹ Abə mə kwi mbən yə ungɨŋ isəg, nji isəg yi wuʼe ngwən anji zənə imə wuʼe ba uma. Asɨmə mə choʼo ngwən ungɨŋ isəg damugə cha mbən mə ngwən ba ungɨŋ isəg zəŋ. Amə aton zənə isəg mə bana ngwən.

²⁰ Mbən kono inayn zənə mə ghayn inen kwi, ‘Cha ŋwə̂ faʼa mə chigə mbaʼ afaʼa.’ Abə mə kwi umbə nwini itəŋ inya ughəw, nji umbi nibi nwini itən. Abə mə kwi mbə zəw inyi inayn, nji umbi nibi zəw injən.

²¹ Ba ungɨŋ isəg umbi aghəy unó mbəŋ ujum inen damugə mbən mə umbəŋ ba, foro damugə cha u kyay uma wa ŋunə u tomo aŋu.

²² Adi mə kwi cha mə́ di zaʼa ungɨŋ isəg pey yi nayn abú úŋwən, nji cha mbə́ di aghəy unó iboŋ. Asɨmə akinine, cha anó abú úŋwən ighayn damugə umə ighəy unó iboŋ.

²³ Wa ŋunə u bana aŋu, yə nibi bana uŋu Mbaʼ.

²⁴ Adi mə kwi cha aghəy aŋu unó akaʼa úŋwən nu cha wa chini di si noʼo ighəy, nji cha u di ighəy ma anó iboŋ. Asɨmə akinine mbə si zən unó mbənə mə́ aghəy, anigə mbə́ bana aŋu nibi bana uŋu Mbaʼ.

²⁵ Anó zəŋ aghəy boʼo inayn zənə uŋwaʼanayn ungɨŋ unoʼo uma duw akə asiʼ kwi, ‘Mbə́ bana aŋu ibuw.’

²⁶ Amaʼazənə Awere ba ŋunə umugə nə uŋu mbaʼ tom inen mi zaʼa, uyi ghayn unó da aŋu. Uŋwən amə Azugə zayn zayn zənə Mbaʼ cha. Uyi chi asiʼ jum asaŋ.

²⁷ Mbən yi nibi ghayn anó da aŋu damugə mbən mə́ nə umugə inoʼ amaʼazənə mə́ ti imə itey unó.”