Ukən chuŋ da Yeso Kristo anji zənə Jon ŋwaʼanayn 14 - Aŋwaʼanayn Uso Fey

Yeso amə inji iŋu abú Mbaʼ

¹ Yeso ghayn abú mbə məŋə-anó ma kwi, “Ka itən fiŋ mə toboro ma gwən. Mbən beni Nwiye nibi beni aŋu.

² Utəw na nanaʼ mbə ungɨŋ na uŋu Mbaʼ. Yə di koʼ ma nigə, nji cha mə mi ghayn kwi ayə ŋuw tana asin inen?

³ Amaʼazənə asi ŋu tana asin inen, ayi zaʼa pey yi num ngwən kwi mbən zaʼa aboʼo inyi da asin zənə amə awu, mbən yi mə awu.

⁴ Mbən kyay nji zənə imə ŋuw asin zənə amə ŋuw akuŋ.”

⁵ Tomas ghayn abú uŋwən kwi, “Asɨyisəg, cha mba kyay asin zənə ngwə mə ŋuw akuŋ, mba mi si kyay inji zənə imə ŋuw akuŋ ingiya?”

⁶ Yeso ywiri abú uŋwən kwi, “Umugə amə inji nə asiʼ foro itəni. Cha wa moʼ mi ŋu abú uŋu Mbaʼ nu uki chigə ma inyi injim.

⁷ Mbə bə kaŋa kyay wa ŋunə amə uŋwən, nji mbən yi nibi kyay wa ŋunə amə uŋu Mbaʼ mə uŋwən. Inoʼ akinine, mbən si kyay uŋwən anigə mbən si nibi zən uŋwən.”

⁸ Filip ghayn abú uŋwən kwi, “Asɨyisəg, tey mbaʼ ina. Amə anó zənə mba kaba azigə.”

⁹ Yeso ywiri kwi, “Mə si chomo aboʼo injən akə agha sá, asɨmə cha ngwə Filip, kaŋa kyay aŋu? Ba jum mbənə u zən aŋu si nibi zən Mbaʼ. Ngwə si chigə ingiya ighayn iniŋ kwi, ‘tey Mbaʼ ina?’

¹⁰ Cha ngwə di beni ayə kwi ayə akə anó feyn nə uŋu Mbaʼ foro kwi uŋu Mbaʼ yə akə anó feyn nə umugə? Inayn zənə mə́ mə ghayn inen cha mə́ mə ghayn akə inyi ighari. Amə Mbaʼ ŋunə umə akə anó feyn nə umugə yə mə aghəy unó mbənə yə kaba.

¹¹ Mben beni kwi ayə akə anó feyn nə uŋu Mbaʼ foro kwi uŋu Mbaʼ yə akə anó feyn nə umugə. Mbən bə ton ibeni mbən beni da unó mbənə mbən zən amə ighəy.

¹² Ayə ghayn asiʼ inen kwi wa ŋunə u beni unó mbənə amə ghayn, yi nibi aghəy unó mbənə amə aghəy. Uŋwən yi aghəy unó nu uchigə mbəŋ damugə ayə ŋuw abú Mbaʼ.

¹³ Ayi aghəy anó moʼ zənə mbən biri akə uŋu ukum, boʼo ba wumini Mbaʼ anjim Ŋwə̂.

¹⁴ Ngwə bə biri anó moʼ akə uŋu ukum, ayi aghəy anó wu.”

Yeso kaʼ kwi Mbaʼ yi cha Azugə zayn zayn

¹⁵ Yeso nibi ghayn abú mbə məŋə-anó ma kwi, “Mbən bə wuʼe aŋu, mbən yi num itəŋ ikɨy.

¹⁶ Mbən bə aghəy nigə, ayi biri abú Mbaʼ anigə u yi naʼ Awere ba chini inen nu umi chomo nə umbən akə ighari feyn.

¹⁷ Uŋwən amə Azugə zayn zayn zənə ami ghəy kwi ba kyay asiʼ. Cha isəg mi beni ma uŋwən damugə cha ami zən uŋwən kə kyay uŋwən. Asɨmə mbən kyay uŋwən damugə uŋwən yə nə umbən foro kwi uŋwən yə ungɨŋ inen.

¹⁸ Cha ami sayn ngwən ni buŋ uti, asɨmə ayi gha wene zaʼa inen.

¹⁹ Asi buʼe akwere amaʼ cha isəg mi gha zən aŋu, asɨmə mbən yi zən aŋu. Anji zənə amə ikay, mbən yi mə nibə ikay.

²⁰ Amaʼazənə anəy wu yi bə pey, mbən yi kyay kwi ayə akə anó feyn nə uŋu Mbaʼ, foro kwi mbən yə akə anó feyn nə umugə. Mbən yi nibi kyay kwi ayə akə anó feyn nə umbən.

²¹ Wa ŋunə u wuʼ aŋu, uyi zəw itəŋ ikɨy nibi num. Uŋu Mbaʼ yi wuʼ wa ŋunə u wuʼe aŋu, ayi nibi wuʼe uŋwən itey inyi inyo abú uŋwən.”

²² Judas moʼ nu akə ma Judas Iskariyot ghayn abú uŋwən kwi, “Asɨyisəg, ngwə mi tey inyo ina ingiya nu cha ngwə tey abú isəg?”

²³ Yeso ywiri kwi, “Wa moʼ ŋunə u wuʼi aŋu, uyi zəw inyi inayn nibi num. Uŋu Mbaʼ yi wuʼ uŋwən anigə umugə nə uŋu Mbaʼ mba yi ŋu abú uŋwən pey yi chomo nə uŋwən.

²⁴ Cha wa ŋunə cha udi wuʼe ma aŋu mi zəw ma inyi inay nibi num. Unó mbənə mbən si zəw akə ma umbəŋ, amə umbi Mbaʼ ŋunə yə tomo aŋu.

²⁵ Mə si ghayn unó mbəŋ inen amaʼazənə mə́ mə nə umbən.

²⁶ Mbaʼ yi cha Awere ba akə uŋu ukum. Uŋwən amə Azugə zayn zayn zənə ami tey unó jum inen nibi aghəy kwi mbən kono unó jum mbənə mə́ si ghayn inen.

²⁷ Mə sayn aborobod inen, mə nibi naʼ inyi aborobod inen. Cha amə naʼa anji zənə isəg mə naʼa. Ka itən fiŋ mə toboro ma ngwən. Ka mbən mə goro ngwən.

²⁸ Mbən si zəw amaʼazənə mə ghayn inen kwi, ‘Ayə ŋuw, asɨmə ayi gha zaʼa inen.’ Abə mə kwi mbən kaŋa wuʼ aŋu, nji mbən yi wuʼe gwən kwi ayə ŋuw abú Mbaʼ damugə Mbaʼ chigə aŋu.

²⁹ Mə si ghayn anó zəŋ inen akinine ki asə num usin, boʼo amaʼazənə ami num usin mbən yi beni.

³⁰ Cha amaʼa nanaʼ iniŋ inayn inen damugə wa ŋunə umə tumə isəg zəŋ uyə zaʼa. Cha ikay abú uŋwən inyi igun,

³¹ asɨmə ayə ghəy aba anji zənə Mbaʼ ghayn iniŋ boʼo isəg kyay kwi mə wuʼe Mbaʼ. Mbən zaʼa mba noʼo akəŋ.”