Ukən chuŋ da Yeso Kristo anji zənə Jon ŋwaʼanayn 13 - Aŋwaʼanayn Uso Fey

Yeso səw ughəw abú mbə məŋə-anó ma

¹ Amə anəy zənə amə naʼa abú anəy ufere Izaʼara Chigə Igun, Yeso kyay kwi amaʼ si koʼ abú uŋwən isayn isəg zəŋ iŋu abú Mbaʼ ma. Anji zənə yə wuʼ ba mbənə umə ungɨŋ isəg zəŋ nu amə uma. Yə wuʼ nigə iŋu pey akə inwi.

² Amaʼazənə Yeso nə mbə məŋə-anó ma mə jəgə aghəy jəgi anjaʼ, Debere si zi ikono ungɨŋ fiŋ Judas Iskariyot nu amə ŋwə̂ Sayimon kwi u fənə Yeso.

³ Yeso kyay kwi Mbaʼ si naʼa unó jum ungɨŋ inya ubugə ma. Yə nibi kyay kwi amə Nwiye tomo uŋwən foro kwi u yə ŋuw abú Nwiye.

⁴ Anigə yə noʼ igun agayi zənə mbə mə jəgə i chi ndwi maʼa ma isiy, itiŋe atawere itin ma,

⁵ izi une ungɨŋ akaŋ ti ni səw ughəw abú mbə məŋə-anó ma nibi fira akə atawere zənə yə tiŋe itin ma.

⁶ Yə səw nigə ŋu pey abú Sayimon Pita, asɨmə Sayimon Pita biri abú uŋwən kwi, “Asɨyisəg ngwə mə kaŋa kaba isəw umbəŋ ughəw?”

⁷ Yeso ywiri abú uŋwən kwi, “Cha injə atəw mi zayn ma akinine da anó zənə amə ighəy, asɨmə amaʼ bə si sara ayi zayn.”

⁸ Pita ghayn abú uŋwən kwi, “Cha ngwə mi noʼo səw umbəŋ ughəw.” Yeso ywiri abú uŋwən kwi, “Abə mə kwi cha adi səw umbə ughəw, nji cha ngwə mi mə ayə nə anó moʼ nə umugə.”

⁹ Sayimon Pita ghayn abú uŋwən kwi, “Asɨyisəg, i səw ayə aba umbəŋ ughəw nibi səw foro umbəŋ ubugə foro nə atəw.”

¹⁰ Yeso ywiri abú uŋwən kwi, “Cha wa ŋunə u si səw inyo jum mi gha səw ma inyo. U yi səw aba umbi ughəw damugə inyo ma jum si zayn. Mbən zayn, asɨmə cha wa feyn di zayn.”

¹¹ Yə ghayn ney damugə yə kyay wa ŋunə umi fənə uŋwən. Amə aton zənə yə ghayn kwi, “Mbən jum zayn, asɨmə cha wa feyn di zayn.”

¹² Amaʼazənə Yeso si səw ughəw uma, yə gha zi indwi maʼa ma gha ŋu chomo asin zənə yə́ chomo. Yə chomo nigə ibiri abú úŋwən kwi, “Umbən utəw zayn da anó zənə a aghəy inen?

¹³ Mbən yə itiya aŋu kwi, ‘Ataʼa ba,’ Nibə itiya kwi, ‘Asɨyisəg.’ Anó zənə mbən aghəy a koʼoro damugə amə kaŋa wa ŋunə amə uŋwən.

¹⁴ Akinine numugə úŋwən Asɨyisəg nibə foro úŋwən Ataʼa ba si səw umbən ughəw, mbən nibi səw ughəw umbən unya.

¹⁵ Mə si tey anwini inen boʼo mbən sə ghəy aba anji zənə a si ghəy inen.

¹⁶ Ayə ghayn asiʼ inen kwi cha ŋwə̂ faʼa mə chigə ma mbaʼ faʼa, kə wa ŋunə ú tomo mə chigə ma wa ŋunə yə tomo uŋwən.

¹⁷ Akinine nu mbən si kyay unó mbəŋ Nwiye zi aborobod igun inen amaʼazənə mbən aghəy úŋwən.”

¹⁸ “Cha amə ghayn unó mbəŋ da umbən jum. Mə kyay ba mbənə asi choʼ. Asɨmə anó zənə amə ungɨŋ aŋwaʼanayn Nwiye ayi du akə asiʼ kwi, ‘Wa ŋunə umə jəgə nə umugə si beŋe akə uŋu wa bana.’

¹⁹ Ayə ghayn anó zən inen akinine ki asi num usin boʼo amaʼazənə ami num usin, mbən yi beni kwi amə wa ŋunə amə uŋwən.

²⁰ Ayə ghayn asiʼ inen kwi wa moʼ ŋunə u num wa ŋunə a tomo si nibi num aŋu. Wa ŋunə u num aŋu si nibi num wa ŋunə u tom aŋu.”

Yeso ghayn kwi umbi fənə uŋwən

²¹ Amaʼazənə Yeso si ghayn anó zəŋ, fiŋ ma mə toboro uŋwən. Anigə yə ghayn asaŋ asaŋ kwi, “Ayə ghayn asiʼ inen kwi wa moʼ injən akaʼa yi fənə aŋu.”

²² Mbə́ məŋə-anó wu ney uma uma sə məŋərə uma da wa ŋunə umə ghayn anó zəŋ da uŋwən.

²³ Aməŋə-anó Yeso moʼ, nu amə uŋunə yə wuʼi, chomo iyad ma.

²⁴ Anigə Sayimon Pita məŋə abú uŋwən akə abugə kwi u biri abú Yeso kwi, “Wa ŋunə umə ghayn anó zəŋ da uŋwən amə ingiya, ghayn ina.”

²⁵ Anigə aməŋə-anó wu tini ma iyad Yeso ibiri abú uŋwən kwi, “Asɨyisəg, amə ngwa?”

²⁶ Yeso ywiri kwi, “Amə wa ŋunə ami zi ingəŋ ungɨŋ umey naʼ abú uŋwən.” Anigə yə́ bəʼiri ingəŋ zi ungɨŋ umey, yə naʼ abú Judas ŋunə amə ŋwə̂ Sayimon Iskariyot.

²⁷ Amaʼazənə Judas num ingəŋ wu, Satan nyi ungɨŋ fiŋ ma. Anigə Yeso ghayn abú uŋwən kwi, “Yabi aghəy anó zənə ngwə mə kaba ighəy.”

²⁸ Cha wa moʼ akaʼa ba mbənə mbə́ mə́ jəgə nə Yeso, kyay ma aton zənə Yeso ghayn anó zəŋ.

²⁹ U moʼ kono kwi umugə amə Judas mə yimə abam ukab, Yeso yə ghayn abú uŋwən kwi u zon ughəy mbənə umi jəg ufere izaʼara chigə igun, kə kwi u naʼa aghəy moʼ abú ba ukwaŋ.

³⁰ Amaʼazənə Judas si num ingəŋ wu, aba ighari wu yə du ŋu isəg. Usin si fid.

Yeso naʼa ukɨy fey abú mbə məŋə-anó ma

³¹ amaʼazənə Judas si du, Yeso ghayn kwi, “Amaʼ si koʼ nu umi wumini Ŋwə̂ Wa, nibi wumini Nwiye anjim ma.

³² Ubə sə wumini Nwiye anjim ma, anigə amə kwi Nwiye yi nibi wumini uŋwən anjim unó mbənə umə ighəy. Uyi aghəy nigə aba akinine.

³³ Umbəŋ buŋ, ayi chomo nə umbən aba akə akwere amaʼ. Inoʼ akuŋ, mbən yi kaba aŋu. Anó zənə mə́ ghayn abú ba kyayn ungɨŋ abey ba Jû, ayi gha ghayn inen kwi, ‘Cha mbən mi kyay gwən asin zənə amə ŋuw akuŋ.’

³⁴ Ayə naʼa ukɨy fey inen kwi: Mbən wuʼ umbən unya anji zənə awuʼe ngwən. Anigə mbən nibi wuʼ umbən unya.

³⁵ Mbən bə wuʼ umbən unya, ba jum mbi kyay kwi mbən mə umbəŋ aməŋə-anó.”

Yeso ghayn kwi Pita yi ton ayi

³⁶ Sayimon Pita biri abú Yeso kwi, “Asɨyisəg, ngwə mə ŋuw awayn?” Yeso ywiri abú uŋwən kwi, “Ayə ŋuw asin zənə cha amə aghəy ngwə zaʼa aboʼo inyi akinine. Asɨmə ngwə yi zaʼa akə gha sara.”

³⁷ Pita biri abú uŋwən kwi, “Asɨyisəg, aton zənə amə aghəy ka azaʼa aŋu aboʼo injigə akinine amə da ingiya? Mə si tana inyi inyo iku da ayə.”

³⁸ Yeso ywiri kwi, “Ngwə mi kwaʼa iku da aŋu? Ayə ghayn asiʼ inigə kwi ki unoŋ ingɨ yə sə ŋu toŋ, ngwə yi si ton aŋu ighari ta.”