Ukən chuŋ da Yeso Kristo anji zənə Jon ŋwaʼanayn 11 - Aŋwaʼanayn Uso Fey

Yeso zəmə Nazarus iwu

¹ Anom moʼ nu ukum ma mə́ Nazarus mə sɨgə. Yə́ mə́ chomo á Betani nə inya ayey ma nu amə Meri nə Mata.

² Meri wu ŋunə unya anóm ma mə́ isɨgə amə uŋwən uŋunə yə zoʼ ughəw Asɨyisəg akə ungəd ŋəʼərə ŋəʼərə ifira akə inyo atəw ma.

³ Inya iyey ma təŋ ibigə tom ukən abú Yeso kwi, “Asɨyisəg injə azi ka unun ayə sɨgə.”

⁴ Amaʼazənə Yeso zəw anó zəŋ, yə́ ghayn kwi, “Cha isəg zəŋ mi aghəy ma Nazarus kuw. Yə zaʼa boʼo ighəy kwi ba wumini Nwiye nibi wumine ŋwə̂ ma.”

⁵ Yeso wuʼe Mata, nu unya ayey ma yə nibi wuʼe Nazarus.

⁶ Amaʼazənə Yeso zəw kwi Nazarus yə sɨgə, yə chomo ma asin zənə yə mə awu akə uney chini ubigə.

⁷ Amaʼazənə unəy ubigə si chigə, yə ghayn abú mbə́ məŋə-anó ma kwi, “Mba gha iŋú a Judiya.”

⁸ Mbə məŋə-anó ma biri abú uŋwən kwi, “Ataʼa ba, cha agha adi si sá ni ba Jû mə kaba itum ayə akə atəy awu aŋunə ngwə mə kaba kwi mba gha iŋú awu e?”

⁹ Yeso ywiri kwi, “Awaʼa kama awa ighum cho bigə umə akə anəy feyn? Anigə wa ŋunə u mə yeŋ ingom cha umi tum ma tugi itamana gow damugə u yə zən uzayn zayn ŋunə umə ungɨŋ isəg.

¹⁰ Asɨmə wa moʼ bə sə yeŋ afəb u yi tum itugi tamana gow damugə cha isəg mə zayn ma.”

¹¹ Amaʼazənə Yeso ghayn ney, u ghayn abú úŋwən kwi, “Inja azi Nazarus fwayn ambuni. Ayə ŋú noʼ uŋwən ambuni.”

¹² Mbə́ məŋə-anó wu ywiri abú uŋwən kwi, “Asɨyisəg, yə bə fwayn ambuni nji u yi boro.”

¹³ Yeso mə́ ghayn amə da iwu Nazarus anigə u ni kono yi ma kwi yə fwayn amə ambuni.

¹⁴ Anigə Yeso bi si ghayn abú úŋwən ighari feyn kwi, “Nazarus si ku,

¹⁵ asɨmə da ngwen, ayə wuʼe aŋu kwi amə cha aŋu awu da anó zəŋ mi aghəy mbən beni. Mba ŋuw zən uŋwən.”

¹⁶ Tomas nu umə itiya akə Didimus nu amə kwi ŋwə̂ Nwiye ghayn abú mbə məŋə-anó mbi kwi, “Mba ŋuw nə Asɨyisəg da abə mə anó kwi u yi ku mba ku nə uŋwən.”

Yeso mə wa umə zəmə ba nibə naʼa itəni

¹⁷ Amaʼazənə Yeso pey awu, yə zən kwi Nazarus si siy ungɨŋ isəy akə uney kyugə.

¹⁸ Cha agha di koʼ ma akoʼ ukiroməta uta i noʼ a Betani iŋuw a Yerusanem.

¹⁹ Ba Jû nanaʼ si noʼ a Yerusanem iŋu zən Mata ni Meri i fira isey abú uŋwən akə umugə unya anóm ma kuw.

²⁰ Amaʼazənə Mata zəw kwi Yeso yə zaʼa, yə du iŋú bomo uŋwən anigə Meri chomo ungɨŋ na.

²¹ Amaʼazənə Mata pey aboʼo Yeso, yə ghayn abú Yeso kwi, “Asɨyisəg, ngwə di mə akəŋ nji cha uŋu unya anom mi kuw ma.

²² Asɨmə mə kyayn kwi ka aba akinine Nwiye yi aghəy anó zənə ngwə biri abú uŋwən.”

²³ Yeso ghayn abú uŋwən kwi, “Ungwə unya anom yi gha zəmə.”

²⁴ Mata ywiri abú uŋwən kwi, “Mə kyayn kwi u yi gha zəmə anəy zənə isəg mi nwi.”

²⁵ Yeso ghayn abú uŋwən kwi, “Amə wa amə zəmə ba iwu, ayə nibi naʼa itəni. Wa ŋunə u beni nə umugə uyi chomo ikay ka nə u di ku.

²⁶ Cha wa moʼ uŋunə umə ikay ni u beni nu umugə mi noʼo iku. Ngwə beni anó zəŋ e?”

²⁷ Mata ywiri abú uŋwən kwi, “Ŋa Asɨyisəg, mə beni kwi ngwə mə wa ŋunə Nwiye zoʼo, nibi beni kwi ngwə mə Ŋwə̂ Nwiye uŋunə yə mi zaʼa ungɨŋ isəg.”

Yeso chweŋ isey

²⁸ Amaʼazənə Mata ghayn anó zəŋ, yə wene ŋú itiya unya ayey ma Meri. Yə pey yi tiya uŋwən anjim ijumi abú uŋwən kwi, “Ataʼa ba yə akəŋ uyə biri ayə.”

²⁹ Amaʼazənə Meri zəw ney, yə fure noʼ iŋú zən uŋwən.

³⁰ Akə maʼa wu, cha Yeso di si inyi ma ungɨŋ asin awu yə mə bugə asin zənə Mata bomo uŋwən.

³¹ Amaʼazənə ba Jû mbənə mbə́ mə́ ungɨŋ na aboʼo Meri iboŋo uŋwən zən umugə yə fure noʼ idu isəg, mbə kono kwi u yə ŋuw atəw isiy imə idey, anigə mbə niŋe anjim ma.

³² Amaʼazənə Meri ŋu asin zənə Yeso mə́ awu pey yi zən uŋwən, yə gow iyad ughəw ma ighayn abú uŋwən kwi, “Asɨyisəg, ngwə di mə akəŋ nji cha uŋu unya anom mi ku ma.”

³³ Amaʼazənə Yeso zən umugə yə mə idey, nibi zən umugə ba Jû mbənə umə́ ni uŋwən umə idey, yə bira fiŋ ma anó wu sey uŋwən kwaʼa akə ingəʼ.

³⁴ Anigə Yeso biri kwi, “Mbən isiy awu ma akayn?” Úŋwən ywiri kwi, “Asɨyisəg zaʼa izən.”

³⁵ Yeso chweŋ isiy.

³⁶ Ba wu zən ney ighayn kwi, “Mbən zən umugə yə wuʼi Nazarus!”

³⁷ Anigə ba moʼ akaʼa úŋwən ghayn kwi, “yə́ aghəy anom yə fəgə u gha ni zən imbayn, yə si ki gha ma kwi ka Nazarus ku ma da ngiya?”

Yeso zəmə Nazarus

³⁸ Anó zəŋ bira Yeso anigə yə ŋú atəw isiy wu. Atəw isiy wu amə ikəb. Mbə kəbərə uchəw ikəb wu akə itəy.

³⁹ Amaʼazənə Yeso pey awu ikəb, yə ghayn kwi, “Mbən chi itey zəŋ.” Mata ŋunə amə unya anom ma yə ku ghayn abú uŋwən kwi, “Asɨyisəg, ifoyi iboŋ yi du awu damugə akə̂choŋ amə unəy kyugə ti anəy zənə yə́ kuw.”

⁴⁰ Yeso ghayn abú uŋwən kwi, “Mə ki ghayn aŋu inigə kwi, ngwə bə beni ngwə yə zən ikay Nwiye?”

⁴¹ Mbə chi itey wu anigə Yeso ney azobo ighayn kwi, “Uŋu Mbaʼ, mə beni ayə damugə ngwə mə zəw anó zənə amə ghay inigə.

⁴² Mə kyayn kwi ngwə yə zəw unó mbənə amə ghay inigə ighari ujum, asɨmə ayə ghay anó zəŋ da ba mbənə utəm akə inyi iyad da umi beni kwi amə ngwə tom aŋu.”

⁴³ Amaʼazənə yə ghayn anó zəŋ, yə kyayn akə ikay ghayn kwi, “Nazarus du zaʼa!”

⁴⁴ Nazarus du nu fed ubugə ma ni ughəw ma akə aba ndwi, mbə nibi fed ifigi ma. Umugə yə du nigə, Yeso ghayn abú ba mbənə mbə mə awu kwi mbən za uba ndwi mbəŋ sayn uŋwən ŋuw.

Mbə tana únaŋ izwere Yeso

⁴⁵ Ba Jû moʼ u nanaʼ mbənə mbə ŋú ichaʼara Meri zən anó zənə Yeso aghəy anigə mbə́ beni ni uŋwən.

⁴⁶ Asɨmə u moʼ akaʼa úŋwən wene ŋu abú ba Farasay pey yi ghayn anó zənə Yeso aghəy.

⁴⁷ Anigə utəw ambəŋ Nwiye ni ba Farasay u toŋe ibin usaʼa ighayn kwi, “Mba mi ghini ngiya ni wa ŋunə? Uyə aghəy uyere unó nanaʼ.”

⁴⁸ Mba bə sayn uŋwən kwi u ki ŋuw imbey akə inji zəŋ, nji ba jum umbi beni uŋwən anigə ba Roman umbi zaʼa iniy inja imbəŋ Nwiye iniy inja abey.

⁴⁹ Wa moʼ akaʼa úŋwən ni ukum ma mə Kayifas nu amə atəw kyayn ambəŋ Nwiye akə utuʼ wu u ghayn abú úŋwən kwi, “Mbən mə kwaʼa uneŋ!

⁵⁰ Mbən ki kyay ngwən kwi yə boŋ kwi wa feyn ku igun utəw ba jum chigə umugə abey ujum mi nim ə?”

⁵¹ Cha yə ghayn ma anó zəŋ akə ighari ma, umugə yə mə atəw kyayn ambəŋ Nwiye akə utuʼ awu yə ghayn ni wa ukən Nwiye kwi Yeso yə ku igun utəw ba Jû.

⁵² Cha umi ku aba igun utəw ma, u yi nibi ku da iforo buŋ Nwiye ujum mbənə u saʼa ungɨŋ isəg.

⁵³ Iti anəy wu, mbə ti ni tana únaŋ izwere Yeso.

⁵⁴ Anigə cha Yeso mə gha yeŋ ma asaŋ asaŋ akaʼa ba Jû. Yə noʼ iŋu asin zənə umə tiya akə Efrem nu amə iyad imbayn zomo. Yə pey yi chomo awu ni mbə məŋə-anó ma.

⁵⁵ Amaʼ ijəg Ufere Izaʼara Chigə Igun mə sə tinə, anigə ba nanaʼ noʼo ungɨŋ usin mbənə umə iyad iyad iŋuw a Yerusanem da isiy inyo ma zayn ki anəy ufere wu.

⁵⁶ Mbə mə kaba Yeso, anigə mbə́ mə́ ghayn akaʼa uma amaʼazənə mbə́ mə́ fere ungɨŋ imbəŋ Nwiye kwi, “Mbən kono injən kwi ngiya? Cha umi zaʼa ma akə ufere ŋunə, kə umi zaʼa?”

⁵⁷ Ba kyayn ambəŋ Nwiye ni ba Farasay si ghayn kwi wa moʼ bi kyayn asin zənə Yeso mə awu, u ghəy uŋwən kyayn da ibiya uŋwən.