Ukən chuŋ da Yeso Kristo anji zənə Jon ŋwaʼanayn 1 - Aŋwaʼanayn Uso Fey

Inay zənə imi aghəy kwi ba jəg itəni

¹ Ki Nwiye sə ŋu tana isəg, wa ŋunə mbə́ mə́ tiya akə Inayn yə mə awu. Inayn wu mə́ nə Nwiye. Inayn wu mə Nwiye.

² Inayn wu mə nə Nwiye ki Nwiye sə tana isəg.

³ Nwiye tana ughəy ujum anjim Inayn wu, anigə cha ghəy moʼ Nwiye tana nu yə ki chigə ma anjim ma.

⁴ Itəni yə zaʼa akə Inayn. Itəni wu yə naʼa uzayn zayn abú ba.

⁵ Uzayn zayn yə tey ungɨŋ isəg firi, anigə cha aghəy moʼ amə ghəy isəg firi niy uzayn zayn wu.

⁶ Nwiye tom wa moʼ nu ukum ma mə Jon.

⁷ Jon zaʼa chomo ni uzənə ighayn anó da uzayn zayn wu. Yə mə ghayn nigə da ba jum mbənə uzəw ubeni.

⁸ Cha uŋwən mə ma uzayn zayn wu, asɨmə yə zaʼa ighayn anó da uzayn zayn wu.

⁹ Uzayn zayn wu amə uzayn zayn asiʼ nu yə zaʼa ungɨŋ isəg, nibi tey igun ba jum.

¹⁰ Inayn zənə wu mə ungɨŋ isəg, anigə Nwiye chigə anjim ma tana isəg. Asɨmə cha ba ungɨŋ isəg kyay uma wa ŋunə amə uŋwən.

¹¹ Yə ŋu ungɨŋ ubey ma, asɨmə cha ba abey ma num uma uŋwən.

¹² Asɨmə umbi moʼ num uŋwən nibi beni unó mbənə yə́ mə ighayn, anigə yə naʼa ikay abú úŋwən uma jum kwi amə buŋ Nwiye.

¹³ Cha úŋwən mə uma buŋ Nwiye akə inji zənə ba igun isəg ibə́ úŋwən, kə anji zənə wa inyoŋ atəw aghəy, kə mugə wa inyoŋ atəw kaba, Nwiye ma amboŋ mə mbaʼ uma.

¹⁴ Inayn wu beŋe akə wa inyoŋ atəw, ichomo inja kaʼa. Mba zən iwumini ma nu amə iwumini zənə yə mə abú uŋwən numugə uŋwən mə aba Ŋwə̂ feyn ŋunə yə́ mə abú mbaʼ Yə́ mə aghəy ichuŋ nibə ghayn asiʼ da Nwiye abú ba.

¹⁵ Jon ŋunə yə mə naʼa une ghayn anó da uŋwən. Yə mə ghayn akə ikay kwi, “Uŋu amə uŋwən ŋunə mə́ ghayn da uŋwən kwi, ‘Wa ŋunə umi zaʼa inyi injim chigə aŋu damugə uŋwən mə awu ki usə ibə́ aŋu.’”

¹⁶ Ichuŋ swiʼiri igun ma, anigə yə́ ghəy kwi mba jəgə ichuŋ wu. Yə nibi naʼ aborobod ina, u yə naʼa akə ighari jum.

¹⁷ Nwiye naʼ unoʼo anjim Mose, asɨmə ichuŋ nə asiʼ zaʼa anjim Yeso.

¹⁸ Cha wa moʼ di si noʼo zən Nwiye. Aba Ŋwə̂ ma feyn yugə nu umə iyad fiŋ Nwiye, ughəy kwi ba kyay uŋwən.

Jon ŋunə yə́ mə́ naʼa une toʼoro inyo ma

¹⁹ Ba mənə mbə́ mə́ tana unó ungɨŋ imbəŋ ba Jû cha ba ambəŋ Nwiye foro ba moʼ ungɨŋ unebey Levi a Yerusanem kwi u biri abú Jon kwi, “Ngwə mə ngwa?”

²⁰ Cha yə ton ma iywiri, anigə yə ton asaŋ asaŋ kwi, “Cha amə aŋu wa ŋunə Nwiye zoʼo.”

²¹ Mbə biri abú uŋwən kwi, “Ngwə si mə ngwa? Ngwə waʼa mə Elayija.” Yə ywiri kwi, “Indəʼ, cha amə aŋu Elayija.” Mbə́ biri kwi, “Ngwə mə wa ukən ŋunə Nwiye kaʼa kwi iyi tomo?” Yə ywiri kwi, “Indəʼ.”

²² Mbə ghayn abú uŋwən kwi, “Anigə ngwə si mə ingiya? Naʼa iywiri inayn ina mba ŋuw naʼ abú ba mbənə mbə́ cha ngwa. Ngwə ghayn kwi imə ingiya?”

²³ Yə num inayn wa ukən Nwiye Azaya ywiri abú úŋwən kwi, “Mə́ mə kyay ungɨŋ imbayn zomo ghayn kwi, ‘Mbən tana inji abú Asɨyisəg.’”

²⁴ Amə ba Farasay mbə́ tomo ba mbənə mbə biri inayn wu abú Jon.

²⁵ Mbə́ biri abú Jon kwi, “Aton zənə ngwə mə naʼa une nu cha ngwə mə ayə Wa ŋunə Nwiye zoʼo kə Elayija kə wa ukən Nwiye amə da ingiya?”

²⁶ Jon ywiri abú úŋwən kwi, “Ayə naʼa une, asɨmə wa moʼ tem akaʼa injən nu cha mbən kyay uŋwən.

²⁷ Uŋwən zaʼa inyi injim, asɨmə cha akoʼo aŋu iza iniʼ utabay ma.”

²⁸ Anó zəŋ aghəy a Batani, anjin ugwi Jodan, asin zənə Jon mə naʼa une.

Yeso mə Ŋwə̂ injəg Nwiye

²⁹ Aney zənə aniŋe akuŋ, Jon zən Yeso umə zaʼa abú uŋwən. Anigə yə ghayn kwi, “Mbə zən, uŋwən mə Ŋwə̂ injəg Nwiye ŋunə u aghəy kwi Nwiye waʼa unó iboŋ ba jum ungɨŋ isəg.

³⁰ Amə wa ŋunə mə́ mə ghayn da uŋwən kwi, ‘Wa ŋunə umə zaʼa inyi injim chigə aŋu damugə uŋwən mə awu ki usə ibə́ aŋu.’

³¹ Ka aba umugə cha adi kyay uŋwən, asɨmə mə zaʼa inaʼ une abú ba Izre boʼo u ikyay uŋwən.”

³² Jon ghayn unó mbənə yə́ zən abú uŋwən kwi, “Mə zən Azugə Nwiye amaʼazənə yə mə swiʼi azobo chomo ni ibuŋ, pey yi chomo igun ma.”

³³ Ka ba umugə cha mə di kyay kwi uŋwən mə wa ŋunə Nwiye zoʼo, asɨmə Nwiye ŋunə yə cha aŋu kwi a naʼa une ghayn iniŋ kwi, “Wa ŋunə azugə swiʼi chomo igun ma yi mə naʼa amə Azugə zayn zayn abú ba.

³⁴ Mə si zən, anigə ayi nibi ghayn abú ba kwi uŋwən amə Ŋwə̂ Nwiye.”

Aməŋə-anó Yeso imbey

³⁵ Aney zənə yə niŋi akuŋ, Jon ŋunə umə naʼa unəy yə təm ni mbə məŋə-anó ma bigə.

³⁶ Yə zən Yeso amaʼazənə yə́ mə́ yeŋ, anigə yə ghayn kwi, “Mbə zən, uŋwən amə Ŋwə̂ injəg Nwiye!”

³⁷ Mbə məŋə-anó wu ubigə zəw anó zəŋ, anigə mbə mə ŋuw aboʼo Yeso.

³⁸ Yeso gha ma izən umugə umə ŋuw aboʼo uŋwən, anigə yə biri abú úŋwən kwi, “Mbən mə kaba ngwa?” Mbə́ ywiri kwi, “Rabai” (amə kwi Ataʼa ba) “Ngwə mi chomo aŋwayn?”

³⁹ Yə ghayn kwi, “Mbən zaʼa zən.” Mbə ŋu zən asin zənə yə́ mə́ chomo akuŋ. Mbə́ ŋu nigə yi chomo afəb wu nə uŋwən damugə amə sə ŋu ka unyama kyugə anjaʼ.

⁴⁰ Wa moʼ akaʼa mbə məŋə-anó wu bigə zəw anó zənə Jon ghayn nigə iŋu aboʼo Yeso amə Andrew nə unya ma Sayimon Pita.

⁴¹ Anó imbey zənə Andrew aghəy amə kwi, yə ŋu kaba unya ma Sayimon ghayn abú uŋwən kwi, “Mba si zən wa ŋunə Nwiye zoʼo.” (Ikum uŋu akə inayn Grik amə kwi Kristo).

⁴² Yə ghayn ney inum Sayimon ŋu abú Yeso. Yeso ney Sayimon ghayn kwi, “Ngwə mə Sayimon ŋwə̂ Jon. Ba mbi si tiya ayə kwi Sefas.” Ukum wu akə inayn Grik amə kwi Pita.

Yeso tiya Filip nə Nataniel

⁴³ Aney zənə yə niŋe akuŋ, Yeso num ungɨŋ fiŋ kwi u mbi ŋuw Galeli. Yə ŋu zən Filip ghayn abú uŋwən kwi, “Zaʼa aboʼo inyi.”

⁴⁴ Filip mə́ Betsaida nu amə asin zənə Andrew nə Pita nibi noʼo awu.

⁴⁵ Filip ŋu zən Nataniel gha abú uŋwən kwi, “Mba si zən wa ŋunə Mose nə ba ukən Nwiye ŋwaʼanayn da uŋwən. Uŋwən amə Yeso ŋwə̂ Josef, wa Nazared.”

⁴⁶ Nataniel biri abú uŋwən kwi, “Wa Nazared? Amə aghəy anó chuŋ moʼ du a Nazared?” Filip ywiri abú uŋwən kwi, “Zaʼa, izən.”

⁴⁷ Yeso zən Nataniel nu yə mə yeŋ zaʼa abú uŋwən, anigə yə́ ghayn abú uŋwən kwi, “Mbən zəw uŋwən amə wa Izre asiʼ, cha unó ingob ungɨŋ ma!”

⁴⁸ Nataniel biri abú uŋwən kwi, “Ngwə si kyay aŋu ingiya?” Yeso ywiri abú uŋwən kwi, “Mə zən ayə inyi azəd fig, ki Filip sə tiya ayə.”

⁴⁹ Nataniel ywiri abú uŋwən kwi, “Ataʼa ba, ngwə mə Ŋwə̂ Nwiye! Ngwə mə ufon ba Izre!”

⁵⁰ Yeso ywiri abú uŋwən kwi, “Ngwə beni damugə mə ghayn inigə kwi mə zən ayə aton azəd fig? Ngwə yi zən unó kyayn kyayn chigə umbəŋ!”

⁵¹ Yeso nayn ney anigə ighayn abú úŋwən kwi, “Ayə ghayn asiʼ inen kwi mbən yi zən azobo fiʼi foro mbə angəd umə koʼo ŋuw azobo nibə swiʼi zaʼa igun ŋwə̂ Wa.”