Jems 5 - Aŋwaʼanayn Uso Fey

Uchere da ba imbon

¹ Umbən ba imbon, mbən zwaray! Mbən chweŋ isiy, idey kwaʼa akə ikay da ingəʼ nanaʼ zənə imə zaʼa igun inen!

² Imbon zənə imə inen si beŋe akə ghəy ibuw. Isəm si kod itən ndwi.

³ Gol nə Silva mbənə umə inen anya si ibiya. Anya wu yi mə uzənə inen kwi mbən yə ka ubugə. Anigə umbi koro ngwən numugə uwəd mə tuŋ wa. Mbən si fere imbon isiy ungɨŋ uney mbənə u si nwi.

⁴ Mbən zən! Ba mbənə umə faʼa ungɨŋ itən imbayn nu mbən mə yimə ukab uma akə ikay, umbə idey da ngwən. Idey ba wu si pey ŋu ungɨŋ utoŋ Asɨyisəg ŋunə umə nə ikay jum.

⁵ Mbən si chomo isəg ungɨŋ imbon. Mbən yə nibə aba unó mbənə umə ighəy kwi itən fiŋ boŋo. Mbən si jəg ifum chomo ni nyə̂ zənə umə ŋu wa.

⁶ Mbən si sob usaʼa izwere ba nu cha u gow anó. Cha inji amə ghəy u feyn inyo ma inen.

Anó ni yimə fiŋ ni chaʼara Nwiye

⁷ Umbəŋ unya, mbən yimə fiŋ pey aney zənə Asɨyisəg mi wene izaʼa. Mbən zən, wa ŋunə umə faʼa ambayn yə nəmə kwi ughəy jəgi tənə ambayn. U yə yimə fiŋ ni nəmə chomo ŋu pey akə amaʼazənə imbəŋ nwi mi sobo.

⁸ Mbən təm injən mi ghari mbən yimə fiŋ ghəy ibeni kara damugə Asɨyisəg yi yabi zaʼa.

⁹ Umbəŋ unya, mbən mə inayn ngwən da unya mbi da ka Nwiye saʼa ma ngwən. Mbən zəw, wa ŋunə umi saʼa isəg yə sə baʼa pey.

¹⁰ Umbəŋ unya, mbən kono ba ukən mbənə mbə́ mə́ ghayn anó akə ukum Asɨyisəg. Mbən num anwini abú uŋwən ni yimə fiŋ aton ingəʼ.

¹¹ Mbən zən, Nwiye zi aborobod igun uma damugə mbə koro fiŋ. Mbən si zəw umugə Job koro fiŋ nibi zəw umugə akə inwi, Nwiye ghəy ichuŋ abú uŋwən. Nwiye yə kənə nibə idiri ba.

¹² Umbəŋ unya, anó zənə achigə unó jum amə kwi ka mbən məʼe ngwən ngwən, kə amə akə azobo, kə amə akə isəy, kə akə ghəy chini nu ba mə məʼe uma igun. Mbən bə beni anó moʼ mbən ghayn aba kwi, “Aŋ.” Mbən bə ton anó moʼ, mbən ghayn aba kwi, “Indəʼ.” Mbən ghəy aba nigə da ka Nwiye zi ma usaʼa igun inen.

Ikay zənə imə anjim achaʼara Nwiye

¹³ Wa moʼ akaʼa injən waʼa wa ingəʼ? Uŋwən chaʼara Nwiye. Wa moʼ akaʼa injən waʼa wuʼe ma? U kyugay ikyi yere Nwiye.

¹⁴ Wa moʼ akaʼa injən waʼa isɨgə? U tiya ba mbənə umə cha ufere ba Kristo u zaʼa chaʼara Nwiye abú uŋwən, nibi zoʼo uŋwən akə ungəd akə ukum Asɨyisəg.

¹⁵ Achaʼara Nwiye wu nu u chaʼara ni ibeni ayi ghəy kwi wa wu boro. Asɨyisəg yi ghəy kwi inyo ma gha ikay. Abə mə kwi yə ghəy anó iboŋ moʼ, Nwiye yi waʼa anó iboŋ wu.

¹⁶ Anigə mbən beni umbən unó iboŋ umbən umbən, ichaʼara Nwiye abú umbən unya, da Nwiye ghəy kwi mbən boro. Achaʼara Nwiye wa ŋunə u təm ikoʼoro ayə ni ikay kyay ighəy anó zənə u chaʼara Nwiye igun.

¹⁷ Elija mə wa inyoŋ atəw nu umba. Yə chaʼara Nwiye akə fiŋ ma jum kwi ka imbəŋ choʼo ma. Anigə cha imbəŋ choʼo ma igun isəg akə ituʼ ita nə aməg ifəw.

¹⁸ Amaʼazənə yə́ gha chaʼara Nwiye, Nwiye ghəy imbəŋ choʼo, ughəy jəgi kwey.

¹⁹ Umbəŋ unya, wa moʼ akaʼa injən mbə faba akə asiʼ, wa chini gha num uŋwən zaʼa.

²⁰ Mbən kyay kwi wa ŋunə gha num wa nu u ghəy anó iboŋ akə inji zənə yə faba, yə chi itəni wa ŋunə yə ghəy anó iboŋ uchəw iwu, anigə ighəy Nwiye waʼa unó iboŋ nanaʼ mbənə yə si ighəy.