Jems 4 - Aŋwaʼanayn Uso Fey

Anó ni imə akə azi nə isəg zəŋ

¹ Anó ni mə zoŋo nə anó ni mə taŋara zaʼa ŋwən akaʼa injən? Aka umə zaʼa akə ughəy mbənə itən fiŋ mə kaba, nu amə u mbənə umə zoŋo ingɨŋ inen?

² Mbən yə kaba ughəy asɨmə cha mbən mə nə ughəy wu anigə mbən yə izwere wa da imə nə ughəy wu. Mbən yə kaba ughəy ba asɨmə cha nji mbən numə, anigə mbən yə taŋara nibə zoŋo da inum ughəy wu. Cha mbən mə nə ughəy mbənə mbən mə kaba damugə cha mbən biy abú Nwiye.

³ Mbən yə ibiy cha Nwiye mə naʼa inen damugə mbən yə ibiyə akə ikono iboŋ. Mbən yə biyə da inum ighəy unó mbənə nyə̂ inyo mə kaba.

⁴ Cha ibeni inen! Cha mbən kyay kwi wa ŋunə umə kaba ijəg azi nə isəg mə wa bana Nwiye? Anigə wa moʼ ŋunə u wuʼi ijəg azi ni amə wa abana Nwiye.

⁵ Kə mbən waʼa kono kwi amə ibuw nu Aŋwaʼanayn Nwiye ghayn kwi, “Nwiye yə nə adey akə azugə ma zənə yə ghəy kwi azaʼa ungɨŋ ina.”

⁶ Asɨmə Nwiye yə aghəy ichuŋ ina boʼo mba mə nə ikay ibana unó iboŋ. Ayə ungɨŋ Aŋwaʼanayn Nwiye kwi, “Nwiye yə tono ba mbənə umə beʼere inyo asɨmə uyə aghəy ichuŋ abú ba mbənə umə numə inyo asəy.”

⁷ Anigə mbən wumini Nwiye akə unó jum. Mbən ton debere anigə u yi noro bugə sayn ngwən.

⁸ Mbən tinə ngwən iyad Nwiye, anigə uyi tinə iyad inen. Umbənə mbənə mbən mə aghəy unó iboŋ, mbən səw umbən ubugə! Umbən mbənə mbən mə ni fiŋ ibigə mbən aghəy itən fiŋ zayn!

⁹ Mbən kənə, dey nibi chweŋ isiy. Mbən koboro uchiʼi akə idey, mbən koboro iwuʼi akə akənə.

¹⁰ Mbən num inyo asəy ifigi Asɨyisəg anigə u yi beʼere ngwən.

Uchede da anó ni saʼa unya

¹¹ Umbuŋ unya, ka wa ghayn ma anó iboŋ da unya ma. Wa bə ghayn anó iboŋ igun unya ma kə isaʼa uŋwən, yə ghayn kwi cha unoʼo Nwiye di koʼoro ma. Uŋwən nibi saʼa unoʼo Nwiye. Ngwə bə mə wa ŋunə umə saʼa unoʼo Nwiye, nji cha ngwə mə isiyə unoʼo wu. Ngwə yə saʼa iŋwən.

¹² Wa ŋunə umə naʼa unoʼo nibə saʼa isaʼa aba ufeyn. Aba uŋwən amə aghəy uchi ba angəʼ. Aba uŋwən amə aghəy u niy ba. Ngwə mə ngwa amə aghəy u saʼ wa chini.

Uchede da anó imə komo iguwə

¹³ Mbən zəw, mbən mbənə mbən mə ghayn kwi, “Akə̂choŋ kə asugə mba yi ŋu ungɨŋ asin moʼ, chomo akə utuʼ feyn ighəy iyuŋ ijəgə injim.”

¹⁴ Cha mbən kyay unó mbənə umi zaʼa asugə. Injən mə ni ingiya? Injə itəni chomo ni indiʼ zənə imə kəbərə usin akə amaʼa moʼ anigə i nim.

¹⁵ Nji mbən mi ghayn kwi ingiya? Mbən mi ghayn amə kwi, “Asɨyisəg mbə beni, mba yi chomo ikay ighəy anó zəŋ akə achini.”

¹⁶ Asɨmə akinine, mbən yə beʼere inyo nibə komo iguwə. Anó ni mə komo iguwə amə anó iboŋ.

¹⁷ Anigə wa ŋunə u kyay anó zənə a koʼoro imə ighəy, asɨmə cha umə ighəy si gow anó.