Jems 3 - Aŋwaʼanayn Uso Fey

Anó ni iyimə ineme

¹ Umbəŋ unya, ka ba nanaʼ injən kaʼa mə uma mbə taʼa ba, damugə mbə si kyay kwi Nwiye yi saʼa ba mbənə umə taʼa ba akə inji zənə ikay.

² Mba kyay umba jum kwi mba yə fana unó akə buŋ inji nanaʼ. Wa moʼ bə mə awu nu cha umə fana akə unó mbənə umə ghayn, nji yə iboŋ imara nibi kyay inji iyimə inyo ma jum.

³ Mba yə zi indəŋ uchəw ingey da i wumini ngwa. Anigə mba yə ghəy kwi iŋuw asin zənə mba kaba.

⁴ Mba nibi ney abaŋ ugwi, ka ba kwi ayə ikwey anigə afim kaka nibə tinə aŋwən. Aba ŋwə atənə moʼ mə ghəy kwi ani yeŋ. Wa ŋunə umə tinə abaŋ ugwi wu, uyə gha ŋwə̂ atənə ighey kwi abaŋ ugwi wu ŋuw asin zənə u kaba.

⁵ Amə inji zənə aməŋi abú ineme. Ineme amə asin nyə̂ inyo nu akweʼe asɨmə iyə komo iguwə da unó kyayn. Kono umugə ŋwə̂ mbin uwəd umə tuŋ aká kyayn!

⁶ Akaʼa usin inyo mbənə umə ungɨŋ ina, ineme amə asin nu unó iboŋ sugi ungɨŋ. I yə chiŋe nyə̂ inyo wa jum, nibə tuŋ itəni ma jum. Amə uwəd yi nimə ŋunə umə asin ingəʼ, ichiŋe asin wu.

⁷ Wa nyoŋ atəw kyay unugə ni yimi ughəy anigə uyə yimə ikudi nyə̂ jum foro ikudi inen jum. U yə yimə ikudi nyə̂ tənə imə yeŋ ibum ijum foro itənə imə chomo ungɨŋ ugwi.

⁸ Asɨmə cha wa nyoŋ atəw moʼ awu umə yimə ineme. Ineme amə unó iboŋ cha inji amə ghəy wa yimi. Ineʼe iboŋ tə́ ungɨŋ isugi nu imə zwere ba.

⁹ Mba yə num ineme yere Asɨyisəg Mbaʼ. Mba yə nibə num ineme zi indon igun ba mbənə Nwiye tana umə ni uŋwən.

¹⁰ Anó ni yere Nwiye, nə anó ni naʼa indon abú ba yə duw aba ungɨŋ uchəw feyn. Umbəŋ unya, akə ma nigə!

¹¹ Cha une nəmənəm nə une zuti zuti mə duw ma ungɨŋ imbuʼ ugwi ifeyn?

¹² Umbəŋ unya, cha azad magoro mə kuw ma ikyugay? Kə cha azad namasi mə kuw piya? Cha une nəmənəm nə une zuti zuti mə duw ma ungɨŋ imbuʼ ugwi feyn.

Iwe nu Nwiye naʼa

¹³ Amə ngwa injən kaʼa nu umə nə iwe nibi kyay anó? Uyi tey akə unó chuŋ mbənə u mə ighəy numugə u mə ighəy unó akə iboro fiŋ foro akə iwe.

¹⁴ Asɨmə ngwə mbə mə nə ibuw iboŋ, kaba imə numə ughəy jum abú inji inyo, i ton ayə unó asiʼ da imə komo iguwə da inji iwe.

¹⁵ Aka ma Nwiye mə naʼa ukudu iwe wu. Yə noʼo amə abú ba igun isəg, akə ma abú Azugə Nwiye. Yə zaʼa abú debere.

¹⁶ Asin zənə ba mə ghəy adey nə anó zənə wa mə kaba ughəy aba abú inyo ma, aburi nə ikudi unó iboŋ jum mbi mə asin wu.

¹⁷ Iwe zənə Nwiye naʼa yə ghəy kwi mba chomo akə uzayn zayn, chomo akə aborobod, mə nə iboro fiŋ, izwaray unó mbənə ba mə ghayn, idiri ba nibi ighəy ichuŋ. Iyə ghəy kwi ka wa ghəy ma aghɨ foro kwi ka wa ma figə unó.

¹⁸ Ba mbənə umə ghəy kwi ba chomo akə aborobod, umbi kon aborobod ungɨŋ ba, umbi ijaŋ ughəy chuŋ.