Jems 2 - Aŋwaʼanayn Uso Fey

Uchere da anó ni ighəy aghɨ

¹ Umbəŋ unya, umugə mbən beni Asɨyisəg Yeso Kristo ŋunə ba wumini, ka mbən mə ghəy ngwən aghɨ.

² Wa moʼ nu u zi utəni nu utana akə gol nibi zi ndwi aka unun zaʼa nyi ungɨŋ ufere, wa ukwaŋ nu uzi u chara ndwi nibi zaʼa nyi.

³ Mbən bə naʼa iwumini abú anóm ŋunə uzi ndwi aka unun anigə ghayn abú uŋwən kwi, “Chomo igun atən chuŋ zəŋ.” Asɨmə ighayn abú wa ukaŋ wu kwi, “Təm akaʼa” Kə kwi, “Chomo iyad umbəŋ ughəw ma,”

⁴ Nji aka mbən mə ghaba ba akaʼa injən, nibə saʼa ba akə ikoni iboŋ?

⁵ Umbuŋ unya nu a wuʼi kwaʼa azəd, mbən zwaray! Nwiye choʼo ba mbənə amə ba ukwaŋ ungɨŋ isəg, da uŋwən mə ba imbon numugə u beni Yeso Kristo. Anigə umbi jəg anó fon zənə Nwiye kaʼa abú ba mbənə u wuʼi uŋwən.

⁶ Asɨmə mbən yə tebe ba ukwaŋ. Aka amə ba imbon umə nyi ngwən? Aka amə uŋwən umə gow ngwən num ŋuw ana usaʼa?

⁷ Aka amə úŋwən umə chiŋi ukum wumini ŋunə Nwiye naʼa inen?

⁸ Mbən bə sə numə noʼo ŋunə ufon ŋunə umə ney isəg ghayn uŋwaʼanayn ungɨŋ Aŋwaʼanayn Nwiye kwi, “Ngwə wuʼ wa ŋunə umə tinə ma inji iyad numugə ngwə wuʼ injə nyə̂ inyo,” Nji mbən yə faʼa anó zənə akoʼoro.

⁹ Mbən bə sə aghəy aghɨ, nji mbən si aghəy anó iboŋ. Anigə unoʼo yimə ngwən numugə imə yimə ba mbənə u gow unoʼo.

¹⁰ Wa moʼ bə num unoʼo jum anigə igow noʼo moʼ, yə si gow unoʼo wu jum.

¹¹ Wa ŋunə ughayn kwi, “I neŋe ayə unom kə uyey wa chini” Yə nibi ghayn kwi, “I zwere ayə wa.” Abə mə kwi cha ngwə di neŋe ayə unom kə uyey wa chini, anigə izwere wa, ngwə si gow unoʼo.

¹² Mbən ni inayn nibə aghəy unó ni ba mbənə Nwiye mi saʼa úŋwən aton unoʼo mbənə u aghəy kwi mba chomo akə inja ighari,

¹³ damugə Amaʼazənə Nwiye mi mə saʼa ba cha umi idiri ma wa ŋunə cha umə idiri ba chini. Wa ŋunə umə idiri ba, Nwiye yi idiri uŋwən Amaʼazənə umi sob usaʼa.

Ibeni nə unó mbənə ngwə mə ighəy

¹⁴ Umbuŋ unya, injim zənə wa mi jəg amə ingiya, ighari zənə ngwə ghayn kwi iyə nə ibeni asɨmə cha ngwə mə aghəy anó nu atey ibeni wu? Kə ibeni wu mi chi ayə angəʼ?

¹⁵ Unya anóm moʼ kə unya ayey moʼ bə mə awu nu amə kaba ndwi, cha aghəy abú uŋwən ijəg.

¹⁶ Anigə wa moʼ akaʼa injən ghayn abú unya anóm akə abú unya ayey wu kwi, “ŋuw akə aborobod, aghəy inyo nomo nibi jəg ikod,” Nu cha ngwə naʼa ayə aghəy zənə ami aghəy kwi inyo ma chomo anji chuŋ, nji injim zənə umi mi jəg amə ingiya?

¹⁷ Anigə ibeni zənə cha anó chuŋ moʼ wa mə ighəy amə atəw ukow.

¹⁸ Wa moʼ yi ghayn kwi, “Ngwə yə ni ibeni asɨmə ayə aghəy unó chuŋ.” Ubə ghayn nigə, a yi ghayn abú uŋwən kwi, “Tey ibeni iniŋ nu cha anó chuŋ awu imə ighəy, anigə ayi tey ibeni inigə akə unó chuŋ mbənə imə aghəy.”

¹⁹ Ngwə beni kwi Nwiye aba ufeyn, yə boŋ! Kaba uzugə iboŋ, mbə nibi beni nigə asɨmə umbə bugə goro.

²⁰ Ngwə mə aneŋ! Ngwə waʼa kaba kwi u tey inigə kwi ibeni nu cha anó chuŋ nu wa mə aghəy amə atəw ukow?

²¹ Aka da mugə Abraham ungwa mbaʼ imbey cha yə di ton inaʼ ŋwə̂ ma ŋunə umə tiya akə Azik akə aghəy ifá abú Nwiye, nu Nwiye num kwi yə aghəy anó zənə a koʼoro?

²² Ngwə ki zən ayə kwi ibeni ma bumə nə unó mbənə yə́ mə́ ighəy. Yə si nibi du zayn kwi ibeni ma boŋ imara da unó mbənə yə́ mə́ ighəy.

²³ Aŋwaʼanayn Nwiye du akə asiʼ umugə yə ghayn kwi, “Abraham beni Nwiye anigə Nwiye beni kwi uŋwən təm ikoʼoro.” Zəŋ ghəy kwi Nwiye tiya uŋwən akə azi ma.

²⁴ Anigə ngwə si zən kwi Nwiye yə beni kwi wa təm ikoʼoro da unó chuŋ mbənə umə ighəy, akə ma aba da ibeni.

²⁵ Amə nibə ichin ichin nu Nwiye beni kwi ajəgə isəg ŋunə mbə mə́ tiya akə Rahab anjim anó chuŋ zənə yə aghəy abú uzənə ba Izre mbənə mbə ŋuw itana iney Jeriko. Yə num úŋwən uchuŋ chuŋ anigə icha úŋwən kwi uŋuw anji chini.

²⁶ Anji zənə nyə̂ inyo zənə cha azugə yə atəw ukow, amə nibə nigə nu ibeni zənə cha anó chuŋ moʼ wa mə ighəy amə atəw ukow.