Jems 1 - Aŋwaʼanayn Uso Fey

¹ Amə umugə Jems nu amə wa afaʼa Nwiye ni Asɨyisəg Yeso Kristo ŋwaʼanayn aŋwaʼanayn zəŋ. Ayə ŋwaʼanayn inen inebey ba Jû ighum cho bigə nu u saŋa igun isəg ujum. Mə chaʼara ngwen.

Anó imə nə ibeni nu ikara foro anó imə nə iwe da Nwiye

² Umbəŋ unya, mbən ni wuʼe ngwən akə umaʼa jum mbənə ikudi ikwaʼara nanaʼ nyi igun inen.

³ Mbən si kyay kwi ubə sə zweʼe injən ibeni amə nigə mbən mi kyay umugə ni yimə fiŋ.

⁴ Mbən zən kwi mbən yimə fiŋ ni ŋuw imbey. Mbən bə aghəy nigə, mbən yi itəm imara ni boŋ imara nu cha anó moʼ amə aghəy ughayn da uŋwən.

⁵ Wa moʼ akaʼa injən bə bəw imə nə iwe, u biri abú Nwiye. Uŋwən yə naʼa ughəy abú ba ibuw ibuw. U yə nibi naʼa akə fiŋ chuŋ. U yi naʼa iwe abú uŋwən.

⁶ Asɨmə Amaʼazənə ngwə mə ibira, u beni ungɨŋ fiŋ kwi Nwiye yi naʼ abú uŋwən. Ka u məŋə ma damugə wa ŋunə umə ibira iməŋə ma, yə chomo ni une ungɨŋ iba nu afim mə tinə.

⁷ Ka wa wu kono ma kwi Asɨyisəg yi naʼ aghəy moʼ abú uŋwən,

⁸ damugə fiŋ ma yə uba ubigə. Unó jum mbənə u mə ibira, u yə bire iməŋə ma.

⁹ Unya mbənə cha ba mə iney úŋwən kwi amə ba moʼ mbi wuʼe uma Amaʼazənə Nwiye beʼere úŋwən.

¹⁰ Unya mbənə umə ni imbon wuʼe uma Amaʼazənə Nwiye swiʼiri úŋwən, damugə wa imbon yə zaʼa chigə ni ufrawer.

¹¹ Nyamachugi mbə duw nə azuʼ kaka, azuʼ wu yə izoʼ ufrawer ghəy u nəgə, iboŋ ma nim. Amə ichin ichin ba mbon mi nim umugə umə beni aboʼo ughəy uma.

¹² Nwiye zi aborobod igun ba mbənə umə yimə fiŋ amaʼazənə akwaʼara nyi igun uma. Damugə Amaʼazənə u chigə akwaʼara wu, umbi mə nə uneʼe. Uneʼe wu amə itəni zənə Nwiye kaʼa abú ba mbənə u wuʼi uŋwən.

¹³ Amaʼazənə akwaʼara bə nyi igun ina, ka mba ghayn ngwa kwi, “Amə Nwiye kwaʼara ngwa.” Damugə cha anó iboŋ moʼ amə aghəy akwaʼara Nwiye. Cha Nwiye mə nibə kwaʼara ma wa.

¹⁴ Unó mbənə umə kaba, umbə tinə wa kwi akwaʼara yə zaʼa igun ma. Umbə nibə tama uŋwən.

¹⁵ Unó iboŋ mbənə umə kaba mbə nyi fiŋ ma si aghəy kwi u aghəy unó iboŋ. Amaʼazənə unó iboŋ wu si ka ungɨŋ fiŋ ma, umbi zwere uŋwən.

¹⁶ Unbəŋ unya nu awuʼi kwaʼa azəd, ka wa moʼ tama ma ngwən.

¹⁷ Ughəy chuŋ jum nə ughəy jum mbənə u boŋ mara, umbə zaʼa azobo. Umbə zaʼa abú Mbaʼ ŋunə umə azobo, nu amə uŋwən naʼa uzayn zayn. Cha umə kyaba ma kə ibeŋe inyo ma ni nyamachugi ighəy kwi usin fid.

¹⁸ Amə uŋwən ma ambuŋ yə aghəy kwi unum ngwa akə buŋ ma anjim inayn ma zənə amə iyi asiʼ. Yə num ngwa boʼo mba mə ba imbey akə ughəy jum mbənə u tana.

Anó ni zəw nibi aghəy

¹⁹ Umbuŋ unya nu a wuʼi kwaʼa azəd, mbən kyay anó zəŋ. Ba jum niŋi atoŋ mi zəw anó. Ka wa mə yaba inayn ma. Ka wa mə yaba isə ma itəm,

²⁰ damugə Amaʼazənə wa mə isə itəm, cha umi aghəy ma anó zənə Nwiye mə kaba.

²¹ Anigə mbən waʼ uzuw anó jum mbənə cha udi koʼoro nibi waʼ izəg unó jum mbənə mbən mə ighəy. Mbən num inyo asey ibeni inayn Nwiye zənə imə ungɨŋ itən fiŋ. Inayn wu yi aghəy kwi mbən duw angəʼ.

²² Ka mbən mə ngwən ba mbənə umə zəw inayn Nwiye aba zəw, anigə tama inyo uma. Mbən ni aghəy unó mbənə inayn wu mə ghayn kwi mbən aghəy.

²³ Wa ŋunə umə zəw inayn Nwiye asɨmə cha umə aghəy anó zənə ighayn, yə chomo ni wa umə iney inyo ma ungɨŋ maneŋ.

²⁴ U yə ney inyo ma kwaʼa anji chuŋ si noʼ ŋu ma. Aba ighari wu, u yi ghaba umugə u chomo.

²⁵ Nwiye yi zi aborobod igun wa ŋunə u tana inum unoʼo mbənə u boŋo imara, nu amə unoʼo umə aghəy kwi ka wa mə́ ma isob. U yi zi aborobod wu da u ŋu imbey ni aghəy unó mbənə umə ungɨŋ unoʼo wu, nu cha umi nyaba unó mbənə u nibi zəw, asɨmə u yə aghəy unó wu.

²⁶ Wa moʼ akaʼa injən waʼa kono kwi yə kara ungɨŋ anó Nwiye? Yə mbə ton iyimə uchəw ma, u yə tama inyo ma anigə anó Nwiye ma amə atəw akow.

²⁷ Anó Nwiye zənə Nwiye Mbaʼ beni kwi yə zəŋ nu cha anó iboŋ ungɨŋ, amə i mə iney buŋ uti foro ayey uti mbənə umə zəw ingəʼ. Amə nibə kwi ka wa beni ma kwi unó ungɨŋ isəg chiŋe uŋwən.