Hibru 9 - Aŋwaʼanayn Uso Fey

Inji zənə umə wumini Nwiye igun isəg nibi wumini azobo

¹ Usó imbey mə́ nə́ unoʼo ma nu utey umugə umi mə wumini Nwiye. Yə nibi tey asin zənə umi mə wumini uŋwən akuŋ akə isəg.

² Mbə chim usɨgə ighaba akə aba ndwi kyayn ghəy utəw na bigə. Mbə mə tiya atəw imbey zənə yə mə iney isəg akə asin Zayn zayn. Akə atəw na imbey wu, asin zənə mbə mə niŋi anam igun mə awu, agayi nə umbimi ingəŋ mbənə mbə́ mə́ isiyə abú Nwiye igun agayi awu atəw na.

³ Ajim aba ndwi wu amə atəw na ungɨŋ nu mbə mə tiya akə asin zənə azayn chigə.

⁴ Adiŋi nu mbə mə tuŋə insens igun mə ungɨŋ atəw na wu. Mbə tana adiŋi wu akə gol. Akubi isɨŋ usó nu mbə kəbərə uba ma ujum akə gol mə nibə awu ungɨŋ atəw na wu. Ikon nu mbə tana akə gol mə awu ungɨŋ akubi wu ni mana awu ungɨŋ ikon, imbaŋ Eron nu ifuʼ si cheʼe awu mə nibə ungɨŋ akubi ibura. Uba atey bigə mbənə mbə ŋwaʼanayn unoʼo isɨŋ uso igun mə nibə ungɨŋ akubi wu.

⁵ Ucherub nu umə tey kwi Nwiye yə asin wu mə anəŋ igun akubi usow wu. Tə saŋa iba uma ikəbərə akubi usó wu kwi amə asin zənə Nwiye mə waʼa unó iboŋ ba. Cha mba mi ghayn da unó mbəŋ jum akinine iŋu mara.

⁶ Amə anji zəŋ mbə tana ughəy jum. Ba faʼa ambəŋ Nwiye mə́ nyi ŋuw ungɨŋ atəw na zənə yə mə́ ney isəg ighari jum ŋuw faʼa afaʼa uma.

⁷ Asɨmə aba atəw kyayn abú ba mbənə umə faʼa ambəŋ Nwiye umə inyi ŋu atəw na ungɨŋ. Uyə inyi nigə aba ighari feyn igun utuʼ. Amaʼazənə umə kaba inyi, u yə num anəm nu umi turi da atəw ma foro da unó iboŋ mbənə ba mə ghəy nu cha udi kyay.

⁸ Numugə yə mə akə inji zəŋ, Azugə zayn zayn mə tey kwi, cha udi si fiʼi inji zənə imə ŋuw ungɨŋ asin zayn zayn chigə amaʼazənə atəw na zənə amə ney isəg amə bugə awu.

⁹ Zəŋ amə anwini amə tey unó mbəŋ akə amaʼ zəŋ. Anigə ayə tey kwi aturi Nwiye nə ughəy ifá cha umə ghəy ma fiŋ wa ŋunə umə wumini Nwiye izayn.

¹⁰ Ughəy mbəŋ mbə nə anó ni ghəy aba nə ughəy jəgi, nə unoʼ foro nə ikudi inji nu ba mə ghəy kwi inyo ma zayn. Unoʼo mbəŋ amə unó mbənə umə ghəy kwi wa zayn asaŋ. Umbi mə awu iŋu pey amaʼazənə Nwiye mi kyaba ughəy jum akə ufey.

¹¹ Kristo si zaʼa nə atəw kyayn abú ba mbənə umə faʼa ambəŋ Nwiye akə ughəy chuŋ mbənə u si məŋi akəŋ. Asɨgə zənə umə faʼa ungɨŋ yə iboŋ mara, amə nibi asɨgə nu aboŋo chigə usɨgə jum. Akə ma ba chim asɨgə wu, akəma ghəy akaʼa ughəy mbənə Nwiye tana akə ungɨŋ isəg.

¹² Amaʼazənə Kristo inyi iŋu ungɨŋ asin zayn zayn chigə, yə ghəy nigə aba ighari feyn. Cha yə num ma anəm ibɨgi kə anəm ipoŋ da inaʼ ni ghəy ifá. Yə num amə anəm ma iziya utəw ba awu akə ghari feyn.

¹³ Abə mə kwi umbə sá anəm ibɨgi nə anəm ipoŋ nibə fuʼe aboroy nu u tuŋi ŋwə̂ nyə̂ igun ba mbənə cha umə zayn, anigə ayə ghəy kwi inyo uma zayn,

¹⁴ nji anəm Kristo yi zayn ngwa chigə. Azugə zənə atənə akə ighari feyn ghəy kwi Kristo naʼa inyo ma abú Nwiye akə ghəy ifá nu cha udoro moʼ igun da ighəy kwi ita fiŋ zayn akə unó iboŋ mbənə umə ghəy kwi ba ku, boʼo mba mi mə faʼa abú Nwiye ŋunə umə ikay.

¹⁵ Kristo yə ungɨŋ ugha Nwiye nə ba akə usow fey ŋunə mbə sɨŋi boʼo ba mbənə Nwiye tiya akə uma jəg ughəy mbənə yə́ kaʼa abú úŋwən akə ighari feyn. Kristo ku da iziya utəw uma akə unó iboŋ mbənə mbə́ ghəy aton anun usow.

¹⁶ Ki u sə́ ghayn anó da ikuw wa, umbi di tey kwi wa wu si ku.

¹⁷ Umbə ghəy unó mbənə wa ghayn da ikuw ma aba amaʼazənə wa wu si ku. Cha umə ghəy uma amaʼazənə wa wu mə bugə ikay.

¹⁸ Amə aton azənə amə cha nji ighayn kwi anun usow si təm nu cha anəm.

¹⁹ Amaʼazənə Mose si ghayn unoʼo jum abú ba jum, yə num anəm ipoŋ nə anəm ibɨgi. Yə́ num nigə itobo ungɨŋ une. Inum hissop nə indap baŋa nu utana akə inyoŋ injəg zi ungɨŋ anəm wu nu u begiri akə une isá igun aŋwaʼanayn zənə unoʼo mə awu ungɨŋ nibi isá igun ba wu jum.

²⁰ Yə isá nigə ghayn kwi, “Zəŋ amə anəm nu atey kwi Nwiye si isɨŋ usó fey nə mbən.”

²¹ Amə ichin ichin kwi, yə nibi isá anəm wu igun asɨgə nibi isá igun ughəy jum mbənə mbə́ mə́ wumini Nwiye awu.

²² Amə asiʼ kwi ayə ungɨŋ unoʼo kwi abúʼə aba kere nji anəm yə ghəy ughəy jum zayn. Ubi ki tu ma anəm, cha Nwiye mi waʼ ma unó iboŋ ba.

Yeso naʼa inyo ma ni ghəy ifá da Nwiye waʼa unó iboŋ ba

²³ Yə koʼoro kwi mbən zayn azəŋ akə ughəy mbənə umə azobo akə ughəy ifa mbəŋ. Asɨmə ughəy mbənə umə azobo mbə kaba amə ughəy ifá mbənə u boŋo chigə umbəŋ.

²⁴ Cha Kristo di nyi ma ungɨŋ asin wumini zənə ba nyoŋ atəw tana akə ubugə. Yə nyi amə azobo da ichomo ifigi Nwiye da ngwa.

²⁵ Cha yə naʼa ma inyo ma akə ghəy ifá ighari nanaʼ, numugə atəw kyayn ambəŋ Nwiye mə nyi ungɨŋ asin Zayn Zayn chigə ituʼ jum nə anəm nu akə ma iyi uma.

²⁶ Adi mə kwi u yə ghəy nigə, nji uyi zəw ingəʼ ighari nanaʼ iti amaʼazənə Nwiye tana isəg. Asɨmə numugə amə nigə, yə si buw akə ighari feyn ki isəg mə sə ŋu nwi da iwaʼ unó iboŋ numugə yə naʼ inyo ma akə ghəy ifá.

²⁷ Umugə Nwiye si num kwi wa yi ku aba ighari feyn anigə u saʼ uŋwən.

²⁸ Amə nibə ichin ichin nu yə naʼa Kristo nə ghəy ifaʼ akə ighari feyn da u beʼe unó iboŋ ba nanaʼ. U yi gha zaʼa akə ighari iŋu pey akə ibigə. Akə ma kwi Nwiye waʼ unó iboŋ ba, u yi zaʼa da ichi ba angəʼ. Anigə amə ba mbənə umə nəmə uŋwən nə fiŋ jum.