Hibru 8 - Aŋwaʼanayn Uso Fey

Yeso mə atəw kyayn ambəŋ Nwiye

¹ Anó kyayn zənə amə ungɨŋ anó zəŋ amə kwi, mba yə nə atəw kyayn ambəŋ Nwiye, uŋwən yə azobo aba bugə jəgi atən ufon Nwiye Achigə isəg.

² Uŋwən yə faʼa ungɨŋ asin zayn zayn nu amə asɨgə asiʼ. Nu amə Asɨyisəg chimi akə ma ba nyoŋ atəw u chimi.

³ Umbə choʼo utəw kyayn ujum ambəŋ Nwiye kwi unaʼa aturi Nwiye nibi naʼ aghəy ifá abú Nwiye. Anigə yə koʼ kwi wa faʼa ambəŋ wu mə nibi nə aghəy moʼ inaʼ.

⁴ Uŋwən di mə wa akə igun isəg, nji cha uŋwən mi mə ma wa faʼa ambəŋ Nwiye damugə ba faʼa ambəŋ Nwiye umbə́ awu imə naʼa uturi Nwiye anji zənə unoʼo Mose tey.

⁵ Unó mbənə úŋwən mə aghəy asin iwumini wu amə aziŋ akə u mbənə umə azobo. Amaʼazənə Mose mə kaba ichim asɨgə, Nwiye chere uŋwen kwi, “Zən kwi ngwə tana ughəy jum akə nji zənə mə tey inigə igun ugum.”

⁶ Asɨmə akinine afaʼ zənə Nwiye naʼa abú Yeso chigə yi uma. Aba numugə uso ŋunə uŋwən tana akaʼa Nwiye nə ba nibi chigə anun uso damugə uyə nə unó nu u boŋo chigə u mbənə umə akə anun uso.

⁷ Adi mə kwi cha anó iboŋ moʼ ungɨŋ uso imbey, nji amə mi cha ma aton akə uso ŋunə uniŋi akuŋ.

⁸ Asɨmə Nwiye zən ibɨy akaʼa ba uma, anigə ighayn kwi, “Asɨyisəg ghayn kwi, unəy mbi zaʼa Nu ami isəy uso fey nə Ba Izrel foro ba Judah.

⁹ Cha usó wu mi chomo ma ni usó ŋunə mə́ isəŋ nə Umbaʼ uma imbey. Akə anəy zənə mə yimi úŋwən akə ubugə ichi ungɨŋ Ijip. Cha mbə mə aghəy uma unó mbənə mbə́ mə́ ungɨŋ uso ŋunə Mə isəŋ nə úŋwən Anigə cha mə́ mə zi aŋu atəw akə unó Mbənə mbə́ mə ighəy.

¹⁰ Asɨyisəg ghayn kwi, uso fey ŋunə ami Isəŋ nə ba Izrel amə kwi, Akə unəy mbənə umə zaʼa, Ayi zi umbəŋ unoʼo ungɨŋ utəw uma Nibi ŋwaʼanayn ungɨŋ fiŋ uma. Ayi mə Nwiye uma, Anigə úŋwən mbi mə umbəŋ ba.

¹¹ Cha wa moʼ mi tey unó abú uzi, Kə nibi ghayn abú unya ma kwi, Kyay Asɨyisəg Damugə úŋwən uma jum umbi kyay aŋu. Iti akə ukuŋkuŋe iŋú pey akə ukyayn.

¹² Ayi waʼ unó iboŋ uma. Cha ami gha ikono aŋu ifana unó ma.”

¹³ Umugə Nwiye mə ghayn da usow fey, yə tey kwi amaʼ anun uso yə si chigə. Ghəy zənə asi inun nu amaʼa ma si chigə, ayi yabi nim.