Hibru 7 - Aŋwaʼanayn Uso Fey

Mekizedek mə wa faʼa ambəŋ Nwiye

¹ Mekizedek ŋunə amə ufon a Salem, yə mə nibi wa afaʼa ambəŋ Achigə isəg Nwiye. Yə bomo nə Abraham Amaʼazənə Abraham mə wene zaʼa bêd nu yə zoŋ ichigə ifon ikyugə. Amaʼazənə mbə bomo nigə, Mekizedek naʼ aborobod abú uŋwən.

² Anigə Abraham ghaba u aghəy ujum mbənə yə num awu bêd akə usin ighum inaʼ asin feyn abú uŋwən. Ukum Mekizedek yə nə uton ubigə: Aton imbey akə ukum Mekizedek amə kwi, “Ufon ŋunə umə aghəy unó mbənə ukoʼoro.” Yə mə nibə ufon Salem. Aton chini akə ukum wu amə kwi, “Ufon ŋunə u mə aghəy kwi ba chomo akə aborobod.”

³ Cha mbə di ŋwaʼanayn ma anó moʼ da mbaʼ Mekizedek kə da ingwo ma kə da unebey ma. Cha u ŋwaʼanayn ma da aney zənə mbə́ ibə́ uŋwən, kə da aney zənə yə ku, anigə umugə uŋwən chomo ni Ŋwə̂ Nwiye, uŋwən mə wa faʼa ambəŋ Nwiye koŋ.

⁴ Mbən zən umugə Mekizedek mə wa kyayn. Abraham mbaʼ imbey abú ba Izre naʼa asin feyn akaʼa usin ighum akə ighəy mbənə yə num abêd abú uŋwən.

⁵ Ba akə aghaŋ Levi nu amə ba umə faʼa ambəŋ Nwiye umbə nə noʼo moʼ ungɨŋ unoʼo Mose nu umə ghayn kwi, mbən num asin feyn ungɨŋ ughəy ighum abú ba, anigə amə abú inya uma. Kanə di ma kwi úŋwən amə nibi buŋ akə aghaŋ Abraham.

⁶ Cha Mekizedek mə aghaŋ akə unebey Levi, asɨmə yə num aghəy feyn ungɨŋ u aghəy ighum abú Abraham. Yə num nigə inaʼ aborobod abú Abraham wa nu Nwiye si akaʼa uŋwən.

⁷ Yə zayn kwi wa ŋunə umə naʼa aborobod chigə wa ŋunə u mə num.

⁸ Iŋu akə ba faʼa ambəŋ Nwiye, amə ba nu umə num asin feyn ungɨŋ ughəy ighum nu amə ba umə ikuw. Iŋu akə Mekizedek, mbə́ ŋwaʼanayn kwi amə wa nu umə ikay nu umə num asin feyn ungɨŋ ughəy ighum.

⁹ Wa yi nibi ghayn kwi Levi wu nu yə mə́ num asin feyn ungɨŋ ughəy ighum nibi naʼa asin feyn ungɨŋ ughəy ighum anjim Abraham,

¹⁰ damugə Amaʼazənə Mekizedek bomo nə Abraham, Levi mə bugə ungɨŋ uchiŋi Abraham nu amə mbaʼ imbey ma.

Yeso mə́ ní Mekizedek

¹¹ Amə anjim unoʼo mose nu ba ungɨŋ unebey Levi mə faʼa ambəŋ Nwiye. Anigə adi mə kwi afaʼa ba mə faʼa ambəŋ Nwiye u mbənə mbə duw unebey Levi di mə boŋo, nji aton zənə mbə́ mi gha kaba wa faʼa chini ambəŋ Nwiye akə uwaŋ Mekizedek, nu akə ma akə uwaŋ Eron, amə kwi ingiya?

¹² Amə da umugə ubə koboro uwaŋ ba faʼa ambəŋ Nwiye, nu unoʼo mə nibə koboro.

¹³ Asɨyisəg ŋunə mbə ghayn unó mbəŋ da uŋwən yə du unebey chini. Cha wa moʼ ungɨŋ unebey ma di si noʼo faʼa ni wa faʼa ambəŋ Nwiye.

¹⁴ Yə du zayn kwi Asɨyisəg mə wa ungɨŋ unebey Judah. Cha Mose ghayn ma anó moʼ da ba faʼa ambəŋ Nwiye ungɨŋ unebey wu.

¹⁵ Anó zənə mba mə ghayn yə du zayn kwi wa faʼa chini ambəŋ Nwiye si du nu u chomo ni Mekizedek.

¹⁶ Uŋwən amə wa faʼa ambəŋ Nwiye akə ma damugə unoʼo unebey tey nigə. Uŋwən amə wa faʼa ambəŋ Nwiye anjim itəni zənə imə akə ikay zənə cha ghəy moʼ amə ghəy aniy.

¹⁷ Mbə́ ŋwaʼanayn ungɨŋ Aŋwaʼanayn Nwiye da uŋwən kwi, “Ngwə mə wa faʼa ambəŋ Nwiye koŋ, Akə uwaŋ Mekizedek.”

¹⁸ Mbə́ səne noʼo imbey iyad damugə mbə́ mə́ ibo foro damugə cha yə́ mə́ were ma wa.

¹⁹ Cha unoʼo Mose mə aghəy uma kwi anó moʼ ŋu mara. Anigə unoʼo mbənə ba niŋi fiŋ igun akinine boŋ chigə u mbənə mba niŋi fiŋ igun. Mba yi chigə anjim unó mbəŋ itinə iyad Nwiye.

²⁰ Nwiye məʼe ma amaʼazənə yə num Kristo akə wa faʼa ambəŋ Nwiye. Cha yə di məʼe ma amaʼazənə yə mə́ num ba chini ambəŋ Nwiye.

²¹ Nwiye meʼe ma amaʼazənə yə́ mə́ zi Yeso ghayn abú uŋwən kwi, “Asɨyisəg si meʼe ma, Cha umi kyaba fiŋ ma, ‘Ngwə mə wa faʼa ambəŋ Nwiye koŋ.’

²² Umugə Nwiye meʼe ma nigə, Yeso si aghəy kwi mba mə nə usó fey nu uboŋo chigə.

²³ Ba ambəŋ Nwiye imbey mə naʼa damugə cha iwu sayn ma úŋwən kwi u ŋu imbey nə ufaʼa uma.

²⁴ Asɨmə afaʼa Yeso ambəŋ Nwiye ayi tənə akə ighari feyn damugə uŋwən yi nibi tənə akə ighari feyn.

²⁵ Anigə Yeso yə nə ikay akə uma jum ni ichi ba mbənə u chigə anjim ma iŋu iyad Nwiye angəʼ, damugə kaba uŋwən uyi tənə akə ighari feyn da imə ichaʼara Nwiye igun uma.”

²⁶ Ukudu atəw abú ba faʼa ambəŋ Nwiye ŋunə si kaŋa ko ina. Uŋwən yə zayn, cha ibɨy moʼ igun ma kə cha anó iboŋ moʼ igun ma, cha uŋwən akaʼa ba unó iboŋ. Nwiye si nibi num uŋwən azobo.

²⁷ Cha uŋwən mə ma nə utəw kyayn mbi ambəŋ Nwiye, nu umi mə naʼa ughəy ifá unəy jum da unó iboŋ ma foro da unó iboŋ ba umbi. Yə si ghey nigə akə ighari feyn, numugə yə na nyə̂ inyo ma akə aghəy ifá.

²⁸ Unoʼo Mose mə tey kwi umbə choʼo ba nu amə gow unó ni utəw abú ba faʼa ambəŋ Nwiye, asɨmə inayn zənə Nwiye kaʼa imeʼe ma, nu yə zaʼa Amaʼazənə mbə́ si naʼa unoʼo wu, yə choʼo Ŋwə̂ ŋunə nu Nwiye aghəy u zayn akə ighari feyn.