Hibru 6 - Aŋwaʼanayn Uso Fey

¹ Mba sayn unó mbənə mba sí dey kweme da Kristo, anigə ŋu imbey ni kweme u mbənə usi kara. Mba sayn anó imə ghayn abú ba kwi u beŋe fiŋ uma akə unó mbənə umə zwere ba nibi izi fiŋ igun Nwiye.

² Ka mba mə ghayn ngwa da anó ni num une, da anó ni iniŋi ubugə igun ba, da anó nu ba mi zəmə, foro da anó nu Nwiye mi saʼa ba koŋ.

³ Nwiye bə beni, mba yi sayn unó mbəŋ ni ŋuw amə imbey.

⁴ Ayə kaŋa isiy kwi ba beŋe iti fiŋ gha wene ŋu abú Nwiye nu mbə si dey zən uzayn zayn Nwiye, nu mbə sí zwere ughəy mbənə mbə́ zaʼa azobo nu Nwiye naʼa ina ni uneʼe. Anigə Azugə zayn zayn mə ungɨŋ uma.

⁵ Mbə nibi kaŋa zweʼe umugə inayn Nwiye mə boŋo nibi zən uyere unó mbənə umi du akə Amaʼazənə amə zaʼa.

⁶ Ubə si ton Nwiye, nji ayi kwaʼa ka igha aghəy kwi u beŋe fiŋ uma, damugə umbə gha komo Ŋwə̂ Nwiye azad abaʼaray nibə naʼa indere atəw abú uŋwən asaŋ asaŋ.

⁷ Nwiye yi zi aborobod igun isey zənə imbəŋ mə choʼo igun, ba mbənə umə kono ughəy wu abú úŋwən umbi ijəg.

⁸ Cha asin zənə amə ijó kə iniʼ injɨŋ mə awu mə were ma anó moʼ. Nwiye yi zi achem igun asin wu anigə umbi nwi tuŋ akə uwəd.

⁹ Umbəŋ unya nu a wuʼi kwaʼa azəd, kanə mba mə inayn ney, mba kaŋa kyay akə asiʼ da ngwən kwi, mbən yə nə ughəy mbənə uboŋo chigə, nu amə ughəy mbənə umi ghəy mbən duw angəʼ.

¹⁰ Nwiye yə aghəy aba unó nu ukoʼoro. Cha uŋwən mi nyaba unó mbənə mbən si ighəy. Cha umi inyaba iwuʼi zənə mbən tey abú uŋwən akə inji zənə mbən mə were uma nibə ŋu imbey imə bugə were.

¹¹ Mba yə kaba kwi wa feyn feyn injən akaʼa u ŋuw imbəy aba nigə ni faʼa akə fiŋ jum iŋu pey akə inwi, da mbən mi aghəy unó mbənə mbən niŋi itən ikono igun.

¹² Cha mba mə kaba ngwa kwi mbən ni aghəy azigə. Mbən ni aghəy amə unó mbənə ba mbənə anjim ibeni nə iyimi fiŋ umə ighəy. Mbən bə aghəy nigə, mbən yi mə nə aghəy zənə Nwiye si kaʼ.

Anó zənə Nwiye kaʼa yə́ təm

¹³ Amaʼazənə Nwiye kaʼa Abraham, Yə kaŋa meʼe ma abú inyo ma kwi i yi aghəy anó zənə u si kaʼa. Yə aghəy nigə damugə amə cha wa moʼ uchigə uŋwən.

¹⁴ Yə kaʼa nigə ighayn kwi, “A yi kwaʼa zi aborobod igun inigə ighəy kwi buŋ akə injə aghəŋ unebey unaʼ.”

¹⁵ Abraham yimə fiŋ ni nəmə anigə yə mə nə aghəy zənə Nwiye kaʼa abú uŋwən.

¹⁶ Amaʼazənə ba mə meʼe uma, umbə meʼe uma akə ukum wa uŋunə u chigə úŋwən. Amaʼazənə usi meʼe ma, anó taŋa zənə yə mə abú úŋwən ayi imey.

¹⁷ Amaʼazənə Nwiye mə kaba aghəy kwi azayn abú ba mbənə yə kaʼa úŋwən kwi cha imi noʼo kyaba ayi anó zənə yə kaʼa, uyi meʼe ma akə ukum ma.

¹⁸ Unó nu cha umi noʼo kyaba umbə ubigə nu cha Nwiye mi noʼo figə ma unó da úŋwən. Anigə u mba mbənə mba nod ŋu paʼa aton ma mba yi yimə fiŋ da imə nə aghəy zənə mba niŋi ikono mə nəmə.

¹⁹ Anó zənə mba mə nəmə amə aghəy zənə inja itəni təm igun nu cha aghəy moʼ mi nyiʼiri. Ayi aghəy kwi mba ŋu asin wumini zənə amə anjim ndwi zənə ukara ungɨŋ imbəŋ Nwiye.

²⁰ Nu amə asin zənə Yeso nyi ungɨŋ da ngwa. Uŋwən si məŋi atəw kyayn ambəŋ Nwiye akə ighari feyn akə uwaŋ Mekizedek.