Hibru 5 - Aŋwaʼanayn Uso Fey

¹ Umbə choʼ utəw kyayn jum ambəŋ Nwiye amə akaʼa ba uma. Ubə choʼo uŋwən kwi uŋwən faʼa abú Nwiye da utəw ba ma. Uyə naʼa ture Nwiye nibə naʼa ughəy ifá da Nwiye waʼa unó iboŋ uma.

² U yə aghəy unó akə aborobod abú ba mbənə u fana anó, damugə cha u kyay uma anó zənə umə ighəy. Umugə úŋwən mə fana anó, amə nibə nigə uŋwən mə nibə fana unó akə inji nanaʼ.

³ Numugə umə nibi fana anó, u yi naʼa aghəy ifá da unó iboŋ ma nibi naʼ da umbi ba chini.

⁴ Cha wa moʼ mə igun ba ambəŋ Nwiye damugə u wuʼi iwumini wu. Aba Nwiye mi choʼo uŋwən numugə yə choʼo Eron.

⁵ Ichini chin cha Kristo mə kaba iwumini imə atəw igun mba ambəŋ Nwiye, Asɨmə Nwiye ghayn abú uŋwən kwi, “Ngwə mə uŋu Ŋwə̂, Akə̂choŋ mə si məŋi ungwə Mbaʼ.”

⁶ Yə nibi ghayn ungɨŋ asin aŋwaʼanayn chini kwi, “Ngwə mə wa faʼa ambəŋ Nwiye koŋ, Akə uwaŋ Mekizedek.”

⁷ Amaʼazənə Yeso mə igun isəg, yə mə chaʼara Nwiye nibə ghayn unó abú Nwiye ŋunə yə chi uŋwən iwu. Yə chaʼara nigə nə idey akə kaka foro nə isɨy aghɨ. Nwiye zəw achaʼara ma damugə yə num inyo ma asey iwumini Nwiye.

⁸ Kanə yə di mə Ŋwə̂ Nwiye, yə kweme anó imə wumini Nwiye akə inji zənə yə zəw ingəʼ.

⁹ Amaʼazənə Nwiye si aghəy jum unó mbənə yə mi ighəy, yə beŋe si aghəy kwi ba jum mbənə u wumini uŋwən u duw angəʼ akə ighari feyn.

¹⁰ Anigə Nwiye choʼo uŋwən kwi amə atəw igun ba ambəŋ Nwiye akə uwaŋ Mekizedek.

Ka mbən beni ngwən kwi ijən ibeni bó

¹¹ Mba yə nə unó nanaʼ ighayn da anó zənə Yeso mə wa faʼa ambəŋ Nwiye ni Mekizedek, asɨmə ayə isey itoʼoro inen, damugə cha mbən mə yaba kyay unó mbənə umə itey inen.

¹² Njí akinine mbən mi mə sə itey unó. Mbən yə kaba kwi wa moʼ ni tey unó mbənə mbən si dey kweme da inayn Nwiye, mbən yə bugə ni buŋ kuŋe mbənə umə nugə ibən nu mbən mi mə ijəgə ughəy kaka.

¹³ Wa ŋunə umə bugə nugə ibən ni ŋwə̂ bo cha umi kyay unó mbənə umə ungɨŋ inayn Nwiye da unó mbənə u təm ukoʼoro.

¹⁴ Ughəy jəgə mbənə u kara amə abú ba kyayn mbənə u si kweme unó ma anigə ikyay ikoboro unó chuŋ nə umbi iboŋ.