Hibru 4 - Aŋwaʼanayn Uso Fey

Azwere zənə Nwiye kaʼa abú ba ma

¹ Anó zənə Nwiye kaʼa ayə bugə awu. Yə ka kwi ba mbi nyi ungɨŋ asin azwere zənə u mi naʼa abú úŋwən. Anigə ba num azom da ka wa moʼ akaʼa ijən nim ma apan i nyi ungɨŋ asin azwere wu.

² Mba zəw ukən uchuŋ numugə ba mbənə mbə mə ambayn zomo nibi zəw. Úŋwən zəw ukən wu anigə cha yə yere úŋwən da mugə mbə́ zəw anigə cha u di beni.

³ Aba umba mbənə mba beni mba mi inyi ungɨŋ asin azwere wu. Nwiye sə itəm meʼe ma ghayn kwi cha umi noʼo inyi ungɨŋ asin azwere zənə ami naʼ abú úŋwən. Yə ghayn ney kanə afaʼa ma di si mey iti Amaʼazənə yə tana isəg.

⁴ Yə ghayn asin moʼ ungɨŋ Aŋwaʼanayn Nwiye da aney zənə a ŋu pey akə isambigə kwi, “Amaʼazənə Nwiye sí faʼa ufaʼa ma jum, yə́ zwere akə aney zənə a pey akə isambigə.”

⁵ Yə nibi ghayn ungɨŋ asin aŋwaʼanayn wu kwi, “cha umi noʼo inyi ungɨŋ asin zwere zənə ami naʼ abú úŋwən.”

⁶ Ba moʼ mbi nyi ungɨŋ asin azwere wu. Cha u mbənə mbə dey zəw ukən chuŋ mi nyi ungɨŋ asin azwere wu da izəw uma.

⁷ Nwiye yi sey aney moʼ nu umə tiya kwi, “Akə̂choŋ” Yə aghəy ney nu unəy nanaʼ Si chigə abú ba mbənə umə aghəy izəw, yə chigə anjim Dafid ighayn inay zənə yə ghayn. Inay wu amə kwi, “Akə̂choŋ” Amaʼazənə atuʼ nana Si chigə abú ba mbənə umə aghəy izəw, anigə yə chigə anjim ufon Dafid igha ghayn inayn zənə yə dey ighayn. Inayn wu amə kwi, “Akə̂choŋ ngwə mbə zəw inayn Nwiye Ighəy ayə kwi injə fiŋ itu”

⁸ Josua di bi cha úŋwən ungɨŋ asin azwere wu, nji cha Nwiye mi ni ghayn ma da aney zwere chini.

⁹ Anigə aney azwere wu koʼoro abú ba Nwiye, numugə Nwiye zwere.

¹⁰ Wa moʼ bə nyi ungɨŋ asin azwere zənə Nwiye kaʼa, u yi zwere akə ufaʼa ma aba anji zənə Nwiye zwere akə uma.

¹¹ Anigə mba zi ikay inyi ungɨŋ asin azwere wu boʼo ka wa moʼ sama numugə ba Izrel aghəy izəw abú Nwiye isam.

¹² Inayn Nwiye yə ikay. I yə aghəy anó zənə Nwiye kaba. I yə inya chigə ubey injim ibugə. Uyə wa inyi ungɨŋ iŋú pey asin zənə Azugə mə ŋuw bumə ni itəni. Uyə nibi ŋuw pey asin zənə ungəd awu mə kuŋ. Uyə saʼa ikoni ba nibə saʼa unó mbənə umə ungɨŋ fiŋ ma.

¹³ Cha aghəy moʼ akaʼa ughəy u mbənə Nwiye tana amə aghəy apaʼa abú uŋwən. Uyə zənə u aghəy ujum aba anji zənə uməŋi. Amə abú uŋwən nu mba mi ghayn unó ujum mbənə mba si aghəy.

Yeso chigə atəw kyayn ambəŋ Nwiye

¹⁴ Umugə mba mə nə amede atəw kyayn abú ba mbənə umə faʼa ambəŋ Nwiye nu amə Yeso Ŋwə̂ Nwiye ŋunə yə́ iŋú azobo, mba yimə anó zənə mba ghayn kwi mba beni awu da Yeso akə ikay.

¹⁵ Cha mba mə ngwa amə nə atəw kyayn ambəŋ Nwiye zənə cha amə kənə akə ngwa Amaʼazənə unó si chigə ngwa. Mba yə mə nə uŋunə debere si zweʼe uŋwən akə ikudi inji ujum umugə u mə zweʼe ngwa. Anigə cha u aghəy ma anó iboŋ moʼ.

¹⁶ Anigə mba num fiŋ zənə ikay itinə iyad atən ufon Nwiye ŋunə umə ghəy ichuŋ da uŋwən mi idiri ngwa nibi ghəy ichuŋ ina akə amaʼazənə ba mə kaba azwere.