Hibru 3 - Aŋwaʼanayn Uso Fey

Yeso chigə Mose

¹ Umbəŋ unya zayn zayn nu Nwiye nibi tiya, mbən tana ikono Yeso nu mba beni kwi uŋwən amə wa tom foro atəw igun ba mbənə umə faʼa ambəŋ Nwiye.

² Yə faʼ nə fiŋ jum abú Nwiye ŋunə yə choʼo uŋwən. Yə faʼ numugə Mose nibi faʼa akə fiŋ ma jum ungɨŋ na Nwiye.

³ Umbə naʼa iwumini abú Yeso chigə umugə umə naʼa abu Mose aba numugə umə naʼa iwumini abú wa ŋunə uchimi ina chigə mugə umə naʼa abú na zənə u chimi.

⁴ Ina jum amə wa mə chim, asɨmə wa ŋunə umə tana ughəy jum amə Nwiye.

⁵ Mose faʼ ungɨŋ na Nwiye nə fiŋ ma jum. Yə ghəy nigə aba ni wa faʼa. Yə ghayn da unó mbənə Nwiye mi ghayn akə amaʼazənə amə zaʼa. Ni ŋwə̂ afaʼa, yə mə inayn da unó mbənə Nwiye mi ighayn.

⁶ Asɨmə Kristo yə faʼ ni fiŋ ma jum ungɨŋ na Nwiye ni ŋwə̂ ma. Mba mə́ ba ma ighari mba bə yimə ita beni ikara nibi zi ita ikono aba igun ughəy mbənə ba mə kono iguwə iwumini.

Uchere abú ba mbənə cha udi beni ma inayn Nwiye

⁷ Azugə Zayn zayn yə ghayn kwi, “Akə̂choŋ, ngwə bə zəw igəg Nwiye,

⁸ Ka mbən ghəy ngwən itən fiŋ ika Numugə umbən umbaʼ imbey ka atəw ghəy nigə amaʼazənə mbə́ kwaʼara Nwiye ungɨŋ imbayn izomo.

⁹ Umbən umbaʼ imbey kwaʼara aŋu ungɨŋ imbayn zomo, Ka aba kwi mbən zən unó mbənə mə́ ghəy akə atuʼ ighum ikyugə.

¹⁰ Anigə isə itəm abú ingwaʼ wu ighayn kwi, ‘Fiŋ uma tə ka faba cha u di si kaŋa kyay itəŋ inji.’

¹¹ Mə isɨy itəm nigə meʼe aŋu ghayn kwi, Cha umi gha inyi ungɨŋ asin azwere zənə ami naʼ abú úŋwən.”

¹² Umbəŋ unya, mbən num zom kwi ka wa moʼ akaʼa injən mə ma ni fiŋ iboŋ nu cha i beni Nwiye, anigə sayn Nwiye ŋunə umə ikay.

¹³ Asɨmə mbən ni zi ikay abú wa feyn feyn uney jum. Numugə mbən mə tiya anəy wu kwi, “Akə̂choŋ” Mbən ni ghəy nigə da ka anó iboŋ moʼ tama ma ngwən, anigə ghəy itən fiŋ itu.

¹⁴ Mba yə akə anó feyn nə Kristo amaʼazənə mba bə yimə anó zənə mba beni nibi beni nigə ŋu pey akə inwi.

¹⁵ Ayə ungɨŋ aŋwaʼanayn kwi, “Akêchoŋ ngwə bə zəw inayn Nwiye, ighəy ayə kwi injə fiŋ tu Anji zənə umbən umbaʼ imbey ka atəw ighəy.”

¹⁶ Úŋwən mə mbi ngwa nu mbə zəw inayn Nwiye anigə ika atəw? Úŋwən uma jum awaʼa ka ba mbənə Mose num idu ungɨŋ Ijip?

¹⁷ Aka abú úŋwən nu Nwiye isə itəm akə atuʼ ighum ikyugə? Awaʼa aka abú ba mbənə mbə́ ghəy unó iboŋ? Amə mbi ngwa nu Nwiye mə isɨy itəm ni uŋwən akə ituʼ ighumi kyugə? Waʼa ka ma ba mbənə mbə ghəy unó iboŋ anigə igow iku ungɨŋ imbayn zomo?

¹⁸ Amə abú mbi ngwa nu Nwiye məʼe ma kwi cha umi noʼo inyi ingɨŋ asin azwere zənə yə́ mi naʼa abú úŋwən? Aka amə ba mbənə cha mbə wumini uŋwən?

¹⁹ Anigə mba si zən kwi amə cha uməg abú úŋwən inyi ungɨŋ asin azwere wu damugə amə cha ibeni abú úŋwən.