Hibru 2 - Aŋwaʼanayn Uso Fey

Nwiye si ghəy anó kyayn umugənə uchi ngwa angəʼ

¹ Mba kyiʼi izi utəw akə unó mbənə mba zəw da ka mba faba ngwa.

² Ukən ŋunə mbə angəd ghayn abú umba mbaʼ imbey amə ukən asiʼ anigə ba jum mbənə cha mbə́ di ghəy uma anó zənə mbə́ ghayn ungɨŋ ukən awu kə u mbənə cha mbə́ ghəy uma unó wu, Nwiye zi ingəʼ atəw uma anji zənə yə koʼoro.

³ Anigə mba mi nod ibugə ngiya amaʼazənə cha mba zi ngwa utəw akə anó kyayn zənə Nwiye mi chi ngwa angəʼ e? A mə Asɨyisəg ma amboŋ yə ti imə ghayn da anó ni chi ngwa angəʼ. Ba mbənə mbə́ zəw nibi ghayn boʼo mba kyay kwi amə asiʼ kwi Nwiye yi chi ngwa angəʼ.

⁴ Nwiye ghəy anwini anó, ighəy yere unó ukudu ku. Yə ghəy Azugə zayn zayn ghaba ineʼe akə inji zənə uŋwen kaba.

Wa ŋunə umə were ngwa kwi mba duw angəʼ

⁵ Cha Nwiye di sey ma amə mbə angəd kwi mbi tumə isəg fey zənə imə zaʼa ni mba mə inayn da iŋwen.

⁶ Asɨmə mbə ŋwaʼanayn asin moʼ ungɨŋ Aŋwaʼanayn Nwiye kwi, “O Nwiye wa inyoŋ atəw mə ngiya nu ngwə mə kono uŋwən? Wa nyoŋ atəw nu amə ghəy ibuw mə ngiya nu ngwə mə para uŋwən?

⁷ Ngwə ighəy kwi angəd chigə wa aba akə ŋwə̂ maʼa moʼ, ngwə ghəy kwi wa mə nə uzayn zayn foro iwumini.

⁸ Ngwə izi u ghəy ujum aton inya ughəw ma.” Amaʼazənə Nwiye zi u ghəy ujum aton ma, cha yi di yə sayn ma ghəy moʼ nu cha aton ma. Kanə cha mba mə zənə ngwa ughey jum aton ma akinine

⁹ Asɨmə mba yi zən Yeso ŋunə Nwiye ghəy kwi akə ŋwə̂ amaʼ moʼ mbə angəd nyaʼa chigə uŋwən kere. Akinine Nwiye zoʼ uŋwən ni uzayn zayn fori ni iwumini damugə yə́ zəw ingəʼ iku da ngwa boʼo anjim ichuŋ Nwiye u yi iku asin ba jum.

¹⁰ Nwiye ghəy kwi u wumini ba nyoŋ atəw anji zənə umi wumini uŋwən. Yə koʼ abú Nwiye ghəy kwi wa ŋunə umi chi ba angəʼ təm ikoʼoro anji zənə umi zəw ingəʼ. Amə Nwiye tana ughəy jum, ughəy bə nibə awu anjim ma.

¹¹ Yeso ŋunə umə ghəy ba zayn ni ba mbənə u si ghəy u zayn uŋwən uma jum amə buŋ mbaʼ feyn. Amə aton zənə cha idere atəw abú Yeso i tiya uŋwən kwi, “Umbəŋ unya.”

¹² Uŋwən ghayn abú Nwiye kwi, Ayi ghayn anó da ayə abú umbəŋ unya. Ayi yere ayə ungɨŋ ifere uma.

¹³ Yə gha ghayn kwi “Ayi zi inyi fiŋ ungɨŋ ma.” Ighayn ighari chini kwi, “Aney umugə ŋu nə buŋ mbənə ngwə naʼa iniŋ.”

¹⁴ Umugə buŋ mbəŋ mə nə nyə̂ inyo foro nə anəm, Uŋwən mə nibə wa nyoŋ atəw da anjim iwu ma uyi niy uŋwən ŋunə umə ni ikay izwere ba. Uŋwən ŋunə umə zwere ba amə debere.

¹⁵ Uyi niy nigə chi ba mbənə anó ni ibugə iwu ghəy u chomo nə isob akə ichomo ma jum.

¹⁶ Yə du zayn kwi cha Yeso di were ma amə mbə angəd asɨmə yə were amə buŋ akə aghəŋ Abraham.

¹⁷ Amə aton zənə yə beŋe ichomo nə unya ma akə unó ujum, boʼo uŋwən mi mə atəw kyayn ambəŋ Nwiye. Uyi idiri ba nibi ifaʼ abú Nwiye nə fiŋ ma jum. U yi ghəy nigə da Nwiye mi waʼ unó iboŋ ba.

¹⁸ Damugənə uŋwən zəw ingəʼ Satan kwaʼara uŋwən. Amə aton zənə yə kyay umugə iwere ba mbənə umə́ ungɨŋ akwaʼara.