Hibru 13 - Aŋwaʼanayn Uso Fey

Inji zənə ighəy kwi Nwiye ni wuʼi ma ni umba

¹ Mbən ŋú imbey ni wuʼe ngwən umbən umbən anji zənə unya mə wuʼe inyo uma.

² Ka mbən waʼa ngwən anó ni inum ba isoʼ injən akaʼa damugə ba moʼ ghəy nigə inum angəd aku ma nu cha udi kyay.

³ Mbən kono ba mbənə umə na indəŋ ni ki mbən yə na indəŋ aboʼo úŋwən. Mbən kono ba mbənə u mə nyi úŋwən ni ki mbən yə zəw ingəʼ nə úŋwən.

⁴ Ba jum yimə inama ni iwumini. Mbən mə ghəy ngwən ufibiri unó. Anom chomo aba nə uyey ma, ayey nibi chomo aba nə unom ma damugə Nwiye yi saʼa ba mbənə umə ghəy ufibiri unó nibi sa u mbənə umə neŋe uyey kə unom wa chini.

⁵ Ka mbən zi ngwən adoʼ akə ukab. Mbən beni kwi ghəy zənə amə inen yə koʼ, damugə Nwiye si ghayn kwi “Cha ami noʼ sayn ngwən Kə nibi waʼa ngwən.”

⁶ Anigə mba ŋu imbey ni ghayn akə ita fiŋ jum kwi, “Asɨyisəg yə were aŋu Anigə cha ami mə goro. Amə anó ngiya amə ghəy wa inyoŋ atəw ghəy iniŋ?”

⁷ Mbən kono ba mbənə mbə́ mə́ cha ngwən. Amə úŋwən mbə́ mə́ nibə ghayn inayn Nwiye inen. Mbən kono inji zənə mbə́ mə́ chomo, anigə ikweme umugə zi fiŋ igun Nwiye.

⁸ Yeso Kristo yə ichin ichin umugə yə mə iyugə, umugə umə akə̂choŋ umugə umi tənə akə ighari feyn.

⁹ Ka mbən beni ngwən kwi ikudi isoʼ unó ujum mbənə ba mə itey beŋe itən fiŋ akə inji asiʼ. Amə ichuŋ Nwiye imi ghəy kwi itən fiŋ kara, akə ma anó da iwumini unoʼo da ghəy jəgi. Cha unoʼo mbəŋ mə were ma ba mbənə u beni aboʼo iŋwən.

¹⁰ Mba yə nə adiŋi nu cha ba mbənə umə faʼa ungɨŋ adiŋi wu mə uma nə ikay ijəg ghəy moʼ zənə u tuŋi igun adiŋi wu.

¹¹ Utəw kyayn ambəŋ Nwiye mə num anəm nyə̂ ŋú nyi asin zayn zayn chigə. U yə naʼa akə ghəy ifa isəw unó iboŋ. Asɨmə u mbə tuŋe nyə̂ wu anjim asin zənə umə chomo.

¹² Amə anji zənə Yeso nibi zəw ingəʼ anjim ukam da ba zayn anjim anəm ma.

¹³ Anigə mba ŋuw abú uŋwən anjim asin zənə mba mə chomo, nibi num indere atəw zənə mbə́ zi igun ma.

¹⁴ Cha mba mə ngwa nə asin nu atəne akə ighari feyn aki igun isəg. Mba yə nəmə amə asin zənə ami zaʼa.

¹⁵ Anigə mba chigə anjim ma iŋú imbey inaʼ ughəy ifa ni yere Nwiye, anigə mba num ita ichəw ibeni kwi uŋwən mə Asɨyisəg iwumini uŋwən.

¹⁶ Ka mbən waʼa ngwən anó imə ighəy ichuŋ. Ka mbən nibi waʼa ngwən anó imə ghaba ughəy mbənə umə inen damugə amə ikudi ighəy ifa itəŋ uboŋo abú Nwiye.

¹⁷ Mbən ni wumine ba mbənə umə cha ngwən, nibə ghəy unó mbənə umə ghayn inen. U bə nəmə ngwən nu cha umə zwere. Umbi ghayn unó mbənə u si ghəy abú Nwiye. Mbən bə mə wumine úŋwən, umbi faʼ nə iwuʼi akəma nə akənə damugə cha akənə mi yere ngwən.

¹⁸ Mbən ni bə chaʼara Nwiye igun ina. Mba kaŋa kyay kwi ita fiŋ tə zayn. Mba yə nibə kaba ighəy unó jum akə inji zənə ikoʼoro.

¹⁹ Ayə kwaʼa boʼo ubugə inen kwi mbən chaʼara Nwiye kwi u yabi cha aŋu inen.

Achaʼara Nwiye nwi

²⁰ Nwiye ŋunə umə naʼa aborobod, uŋunə yə zəmə ungwa Asɨyisəg isəg Yeso ŋunə, amə anəmə injəg kyayn anjim a nəm usó fey ŋunə yə sɨŋe, nu tənə akə ighari feyn,

²¹ u naʼa u ghəy uchuŋ ujum inen da mbən ghəy anó zənə ukaba. Yə chigə anjim Yeso Kristo ighəy unó mbənə u boŋo abú uŋwən ungɨŋ inen. Mba wumine Yeso akə ighari feyn. Amə nigə.

Inayn zənə isi nwi

²² Umbəŋ unya, mə boʼo ubugə inen kwi mbən num inayn zənə a zi ikay inen awu akə fiŋ chuŋ, damugə cha ŋwaʼanayn zəŋ aŋwaʼanayn inen mə isaʼa ma.

²³ Mbən kyay kwi mbə́ si chi ungwa unya Timoti a ndəŋ. U bə yaba zaʼa pey akəŋ, ayi zaʼa izən ngwən nə uŋwən.

²⁴ Mbən chaʼara ba jum mbənə umə cha ngwən nibi chaʼara ba Nwiye jum. Umba unya mbənə umə Itali nibi chaʼara ngwən.

²⁵ Nwiye ghəy ichuŋ akaʼa umbən jum. Amə nigə.