Hibru 12 - Aŋwaʼanayn Uso Fey

Nwiye mə ungwa Mbaʼ

¹ Umugə unóŋ uzənə kyayn kad ngwa zi ugha, anigə mba waʼ unó jum mbənə ukən inji ina, nibi waʼ unó iboŋ mbənə ukod ngwa. Mba yimə fiŋ inod inoro zənə imə imbey ina.

² Mba niŋe inja aghɨ aba igun Yeso ŋunə inji ibeni ti nibi nwi aba igun ma. Yə nyiʼi fiŋ azad abaʼara damugə yə kyay iwuʼi zənə yə mə imbey abú uŋwən. Cha yə di num ma indere atəw zənə mbə́ kom uŋwən azad baʼara kwi amə anó moʼ, anigə uŋwən yə aba abugə jəgi Nwiye u chomo.

³ Mbən kono inji zənə yə yimə fiŋ abú ba unó iboŋ mbənə mbə́ mə́ bana uŋwən. Mbən nibi yimə fiŋ da ka mbən ibo ngwən anigə ibugə.

⁴ Umugə mbən mə maʼa iberd nə unó iboŋ, cha mbən di si maʼ ŋu pey ngwən asin zənə imi zwere ngwən.

⁵ Mbən waʼa si nyaba inayn Nwiye zənə yə zi ikay inen kwi mbə mə buŋ ma? Inayn wu amə kwi, “Uŋu ŋwə̂ imə num ayə akə azaba anó amaʼazənə Asɨyisəg mə taʼa ayə. Ka injə fiŋ ibo ma amaʼazənə Asɨyisəg mə inayn inigə,

⁶ Damugə Nwiye yə taʼa ba jum mbənə u wuʼi. U yə nyi ba jum mbənə u beni kwi amə u ŋu ŋwə̂.”

⁷ Mbən yimə fiŋ da unó jum ni kwi umbə nyi ngwən. Damugə amə nigə Nwiye mə nyi ngwən ni buŋ ma. Ŋwə̂ moʼ waʼa awu nu cha mbaʼ ma mə nyi uŋwən amaʼazənə u gow anó?

⁸ Nwiye bə ton inyi ngwən anji zənə umə nyi buŋ ma chini, nji cha mbən mə kwaʼa ngwən buŋ ma. Mbən mə buŋ nu cha mbaʼ.

⁹ Anó chini amə kwi, mba yə nə umbaʼ igun isəg nu umə nyi ngwa, anigə mba yə wumine úŋwən. Abə mə nigə ka ba mi num ita inyo asəy abú ungwa mbaʼ ŋunə unaʼa azugə ina da mba mi chomo ikay.

¹⁰ Umba mbaʼ akə igun isəg umbə nyi ngwa akə inji zənə ikoʼoro abú úŋwən. Umbə ghəy nigə aba akə ŋwə̂ amaʼ moʼ. Asɨmə Nwiye yə nyi ngwa da iwere ngwa. U yə ghəy nigə da mba chomo akə uzayn zayn ni uŋwən.

¹¹ Anó zənə umə nyi ngwa cha amə boŋo ma ina akə amaʼ moʼ, ayə nya azəd. Asɨmə maʼa moʼ bə si chigə, ayə ghəy kwi ba mbənə mbə nyi úŋwən u ghəy unó mbənə ukoʼoro nibi ghəy kwi u chomo akə aborobod.

¹² Anigə mbən zən kwi mbən beʼere umbən bugə mbənə usi ibo, nibi zənə kwi mbən sa umbən utəw nwi mbənə u si ibo.

¹³ Mbən tana inji nu iyeŋ igun itəm da cha ba mbənə ughəw ma gunə umi buʼere uma ughəw ma. Inji wu ti ghəy kwi ughəw wu ka.

Uchede abú wa ŋunə u ton Nwiye

¹⁴ Mbən zi ikay ighəy kwi mbən chomo akə aborobod ni ba jum nibi zən kwi mbən chomo akə uzayn zayn, damugə cha wa moʼ mi zən Asɨyisəg nu cha umə akə uzayn zayn.

¹⁵ Mbən zən kwi ka wa moʼ sam ma ichuŋ zənə Nwiye mə ighəy. Nibi zən kwi ka wa moʼ chomo ma nə ufəʼ nwi nwi ŋunə umə ghəy kwi ba nanaʼ ki zən ingəʼ, nu umə nə une iboŋ.

¹⁶ Nibi zən kwi, ka wa moʼ mə ghəy ma ufibiri unó, nibi zən ka kwi wa moʼ mə chomo ma nu cha umə goro Nwiye numugə Esawu yə ghəy. Yə fənə asin ma ni ŋwə̂ imbey akə ighari ghəy feyn.

¹⁷ Mbən kyay kwi amaʼa njim, amaʼazənə yə mə kaba inum aborobod mbaʼ ma, mbaʼ ma ton damugə amə cha nji abú Esawu ikyaba anó zənə yə si ghəy, ka di ma kwi yə kab aborobod wu nə anəm aghɨ ma.

¹⁸ Cha mbən di si pey numugə ba Izre pey, akə ugum nu ba fere nu amə ugum ŋunə uwəd mə bəŋe igun, cha mbən di si pey asin imbiri nu imbayn fid. Cha afim kaka di si nyiʼiri ngwən.

¹⁹ Cha mbən di si zəw igəg itaŋa kə nibi zəw inayn zənə u ghayn. Amaʼazənə Nwiye nayn, ba mbənə mbə́ zəw bugə kwi ka ugha inayn ma,

²⁰ damugə amə cha nji abú úŋwən iyimə fiŋ izəw inayn zənə Nwiye nayn. Inayn wu ghayn kwi, “Ka aba nyə zənə ibira ugum ŋu, u tum nyə wu akə itey izwere”

²¹ Ghəy zənə mbə́ zənə ghəy kwi igoro yimə úŋwən. Yə ghəy Mose ghayn kwi, “Mə ibo igoro ibiya aŋu.”

²² Mbən si zaʼa igun ugum Zayon. Mbə si zaʼa Yerusanem ŋunə umə azobo, nu amə asin Nwiye ŋunə umə ikay. Mbən si zaʼa abú mbə́ angəd achuʼ nə chuʼ, nu uforo mə wuʼi uma.

²³ Mbən si zaʼa abú ufere buŋ imbey Nwiye mbənə u si ŋwaʼanayn ikum uma azobo. Mbən si zaʼa abú Nwiye ŋunə umə saʼa ba jum, Mbən si zaʼa abú azugə ba mbənə Nwiye si ghəy u təm ikoʼoro iboŋ imara.

²⁴ Mbən si zaʼa abú Yeso ŋunə umə zaʼa nə usow fey. Mbən si nibi zaʼa abú anəm zənə mbə́ tuwi. Anəm wu yə inayn unó chuŋ chigə anəm Abel.

²⁵ Mbən num azom kwi ka mbən ton ngwən uŋwən ŋunə umə inayn inen. Abə mə kwi cha ba mbənə mbə ton wa ŋunə yə mə chere úŋwən aki igun isəg di du angəʼ, anigə mba mi nod ingiya abú ŋunə umə chere ngwa azobo?

²⁶ Igəg ma ghəy usin nyiʼere asɨmə akinine, yə si ka kwi, “Cha ami gha ighəy kwi aba isəg nyiʼere ighari chini, a yi ghəy kwi azobo nibi nyiʼere fən.”

²⁷ Inayn wu kwi, “ighari chini” Tey kwi ughəy mbənə u tana akə umbi ubugə umbi nyiʼere boʼo ughəy mbənə cha nji amə ghəy unyiʼere umbi tənə.

²⁸ Anigə mba naʼa yə beni ayə abú Nwiye numugə mba mə nə anó ufon nu cha ghəy moʼ amə ghəy anyiʼiri. Mba wumine Nwiye akə inji zənə iboŋo abú uŋwən. Mba wumine uŋwən nibi goro uŋwən,

²⁹ damugə ungwa Nwiye amə uwəd nu umə tuŋe ughəy.