Hibru 11 - Aŋwaʼanayn Uso Fey

Imə ni ibeni fiŋ abú Nwiye

¹ Ibeni amə ikyay akə asiʼ kwi mba yi mə nə ughəy mbənə mba zi ita ikono wu ni nəmə. Amə nibi kyay kwi mba yi mə nə ughəy mbənə cha mba mə zənə.

² Amə anjim ibeni ba imbey nu Nwiye tey abú uŋwən kwi iyə wuʼe yi.

³ Amə anjim beni nu mba kyay kwi Nwiye tana isəg aba akə inayn ma. Amə kwi yə num ughəy mbənə cha mba mə zənə itana u mbənə mba mə zənə awu.

⁴ Amə anjim ibeni nu Abel naʼ ghəy ifa abú Nwiye nu a boŋo chigə iyi Kayin. Amə anjim ibeni ma nu Nwiye ghayn kwi uyə ghəy unó mbənə ukoʼoro. Nwiye ghayn nigə damugə yə beni ughəy mbənə yə naʼa. Abel ku asɨmə anjim ibeni ma, uyə bugə nayn.

⁵ Amə ibeni yə ghəy kwi Nwiye num Enok ikay azobo nu cha uku ma. Cha wa moʼ zən ma uŋwən damugə Nwiye si num uŋwən. Ayə ungɨŋ Aŋwaʼanayn Nwiye kwi uŋwən mə ghəy fiŋ Nwiye boŋo.

⁶ Abə mə chama ibeni, cha nji amə ghəy wa ghəy fiŋ Nwiye boŋ damugə wa ŋunə u kaba iŋu iyad Nwiye yi beni kwi Nwiye yə awu nibi kwi uyi choʼo afaʼa abú ba mbənə umə kaba uŋwən akə fiŋ uma jum.

⁷ Amə ibeni yə ghəy kwi Noah wumini Nwiye anigə itana abaŋ ugwi zənə yə chi unebey ma angəʼ. Yə ghəy nigə damugə Nwiye si para uŋwən da unó mbən cha umi zən. Amə ibeni ma yə ghəy kwi Nwiye zi usaʼa igun ba igun isəg. Anigə Nwiye num kwi uŋwən yə ghəy unó nu ukoʼoro anjim ibeni.

⁸ Amə ibeni yə ghəy kwi Abraham wumini Nwiye amaʼazənə yə tiya uŋwən kwi u duw iŋu asin zənə u mə ŋu naʼ abú uŋwən. Yə du ni ŋuw ka di mə kwi cha yə kyay ma asin zənə yə mə ŋuw, awu.

⁹ Amə ibeni yə ghəy kwi u ŋuw chomo ungɨŋ abey zənə Nwiye kaʼ kwi iyi naʼ abú uŋwən. Yə ŋu chomo awu numugə wa isoʼ mə chomo ungɨŋ abey chini. Yə chomo ungɨŋ asɨgə numugə Azik nə Yakob nibi chomo. Umbi nibi jəg ughəy mbənə Nwiye kaʼa abú Abraham.

¹⁰ Abraham mə nəmə inyi ungɨŋ abey zənə Nwiye si tana anigə ichim nə atiy nu cha ami noʼo saʼa.

¹¹ Amə ibeni yə ghəy kwi Abraham nu yə si nun foro Sera nu yə si chigə asin ibə́ umə ni ŋwə̂. Yə ghəy kwi umə ni ŋwə kanə yə di si nun, damugə yə beni kwi wa ŋunə u kaʼa uŋwən uyi ghəy anó zənə yə kaʼa.

¹² Anigə Abraham ka yə di si məŋe nə awu wa, buŋ ma gha zaʼa nanaʼ ni itəni tənə imə azobo ighari chomo nə asɨkwaʼ tənə ami iyad ugwi nu cha umi kyay taŋ.

¹³ Úŋwən uma jum niŋi ibeni uma igun Nwiye pey ama zənə mbə ku. Mbə ku nu cha mbə di si məŋə ni ughəy mbənə Nwiye kaʼa abú úŋwən. Mbə́ zən ughəy wu agha sa anigə mbə wuʼ azəd. Mbə zən nigə ikyay kwi úŋwən amə ba isoʼ nu umə chigə ichigi ungɨŋ isəg.

¹⁴ Ba mbənə umə ghayn ukudu unó uŋu si ghəy azayn kwi umbə kaba abey zənə amə iyi uma.

¹⁵ Cha mbə mə kono uma abey zənə mbə duw awu, mbə́ di mə kono, nji mbə mi gha wene ŋu awu.

¹⁶ Mbə mə kaba amə abey zənə aboŋo chigə iyi awu, nu amə abey zənə amə azobo. Amə cha inded atəw abú Nwiye amaʼazənə mbə tiya uŋwən kwi Nwiye uma. Cha yə dire ma damugə yə si tana abey abú uŋwən.

¹⁷ Amə ibeni yə ghəy kwi Abraham naʼa Azik akə ghəy ifa akə amaʼazənə Nwiye zweʼe uŋwən. Amə abú uŋwən nu Nwiye kaʼ unó mbəŋ, anigə yə tana inyo ma inaʼ ŋwə̂ wu abú uŋwən akə ghəy ifa.

¹⁸ Nwiye si ghayn abú uŋwən kwi, amə anjim ungwə ŋwə Azik nu ngwə mi mə ni aghaŋ unebey zənə mə́ si kaʼ inaʼ nigə.

¹⁹ Abraham beni ungɨŋ fiŋ ma kwi ŋwə̂ ma Azik ubi ku Nwiye yə ni ikay igha zəmə uŋwən. Akə anó zənə yə du yə chomo ni kwi Abraham gha num Azik iwu.

²⁰ Amə ibeni yə ghəy kwi Azik zi aborobod igun Yakob nibi zi igun Isawu da unó mbənə umi zaʼa idu.

²¹ Amə ibeni yə ghəy kwi amaʼazənə Yakob mə sə ŋu iku, u zi aborobod igun buŋ anom Josef ufeyn feyn. Yə ziʼi ma igun imbaŋ ma iwumini Nwiye.

²² Amə ibeni yə ghəy kwi amaʼazənə Yesep mə sə ŋu iku, yə ghayn da mugə ba Izre mi du ungɨŋ Ijip nibi ghayn damugə umi twayn uŋwən.

²³ Amə ibeni yə ghəy kwi amaʼazənə mbə́ ibé Mose mbaʼ ma nə ingo ma noy uŋwən akə aməg ta, damugə mbə́ zən kwi ŋwə̂ wu təm. Cha mbə goro uma anó zənə ufon Ijip sobo.

²⁴ Amə ibeni yə ghəy kwi amaʼazənə Mose si kwey, ka u tiya ma uŋwən akə ŋwə̂ ukwere Fero.

²⁵ Mose wuʼ izəw ingəʼ ni ba Nwiye chigə umugə umi mə wuʼ ma ungɨŋ unó iboŋ mbənə nyə̂ inyo mə kaba.

²⁶ Yə zən kwi anó ni zəw ingəʼ da wa ŋunə Nwiye zoʼo boŋ chigə imbon zənə imə Ijip damugə yə mə ney amə uchoʼo afaʼa ŋunə umə zaʼa imbey.

²⁷ Amə ibeni yə ghəy kwi Mose duw ungɨŋ Ijip nu cha u goro ma kwi ufon Ijip yi isə itəm. Yə ton iwene damugə yə zən uŋwən ŋunə cha ba mə zənə.

²⁸ Amə ibeni yə ghəy kwi, Mose num kwi ba Jû ni jəg Ufere Izaʼara Chigə Igun nibi ghəy kwi u zoʼ anəm atəw ubunu da angəd ŋunə umə zwere ba ka zwere ma buŋ anom imbey uma.

²⁹ Amə ibeni ghəy kwi ba Izre kwene ungɨŋ Iba Ibaŋa ni kwi amə igun isəy zomo. Asɨmə amaʼazənə ba Ijip kaba ighəy nigə, mbə koŋ.

³⁰ Amə ibeni yə ghəy kwi ugu ukam Jeriko buʼe asəy amaʼazənə ba Izre num unəy sambigə iyeŋ ighab.

³¹ Amə ibeni yə ghəy kwi ka aney isəg ŋunə mbə mə tiya akə Rahab ku ma aboʼo ba mbənə mbə́ mə́ ighəy izəw. Cha yə ku ma damugə yə num ba Izre mbənə mbə zaʼa iji ney Jeriko anji chuŋ.

³² Aghayn ŋu pey akayn? Cha amaʼ iniŋ ighayn da Gideon, da Barak, da Samson, da Jefta, da Dafid, da Samwel, foro da ba ukən Nwiye.

³³ Amə ibeni uma yə ghəy kwi umoʼ maʼa iberd nə ubey ifon chini ichigə, umoʼ saʼa ba akə inji zənə ikoʼoro, umoʼ mə nə unó mbənə Nwiye kaʼa abú úŋwən, u moʼ kəbərə ichəw abú ifuŋ.

³⁴ Mbi moʼ niy uwəd ka ka, mbi moʼ nod iwu u zwere uŋwən nə ubey, mbi moʼ si ibo asɨmə Nwiye naʼa ikay abú úŋwən, mbi moʼ maʼa iberd anigə ighəy akama usogwi ungɨŋ abey chini nod.

³⁵ Amə anjim ibeni ighəy kwi mbə ayey num umbi unya mbənə mbə si ku ni ki ugha zəmə. Amə da ibeni fiŋ yə ghəy kwi ayey num unya ma mbənə mbə si ku Nwiye gha zəmə úŋwən. Mbə chi mbi moʼ ana indəŋ asɨmə mbə ton kwi cha mbi mi du asaŋ, da mbi mbə ku, mbi yi gha zəmə anigə ijəg itəni zənə iboŋo chigə.

³⁶ Mbə́ mə́ baʼara mbi moʼ, swayn mbi moʼ akə gwat kod mbi moʼ akə ukara zi andəŋ.

³⁷ Mbə́ tum umbi moʼ akə atəy, isɨŋ umbi moʼ akə asó, izwere mbi moʼ akə ubey berd. Mbi moʼ zi igob injə nibi zi igob ibɨgi gha yeŋ. Mbi moʼ mə ba ukwaŋ, mbə nwini inya ughəw mbi moʼ nibi nyi mbi moʼ kwaʼa anji iboŋ.

³⁸ Cha isəg zəŋ di boŋ ama abú úŋwən. Mbə mə gha yeŋ ungɨŋ imbayn zomo nibə yeŋ igun ugum. Mbə mə chomo ungɨŋ isum foro ungɨŋ ibəg tənə imə ungɨŋ isəy.

³⁹ Nwiye beni ba mbəŋ jum da ibeni uma. Asɨmə cha mbə num uma ughəy mbənə Nwiye kaʼa abú úŋwən.

⁴⁰ Nwiye si tana unó nu aboŋo chigə ina. Anigə amə kwi aba akə ibumi nu umba nu umi boŋo chigə.