Hibru 10 - Aŋwaʼanayn Uso Fey

Kristo naʼ itəni ma akə ghəy ifa akə ighari feyn

¹ Unoʼo Mose amə́ azəŋ akə u ghəy chuŋ mbənə umə ibugə zaʼa. Amə cha unoʼo wu nə u ghəy. Amə aton zənə ufaʼ mbənə mbə mə́ faʼ ituʼ ni ituʼ cha mbə di kyay isəw ba mbənə mbə mə kaba izaʼa abú Nwiye,

² abú mə kwi ufaʼ mbəŋ mbə ghəy ba zayn ifigi Nwiye, nji cha umə bugə ŋu imbey imə faʼa damugə mbə́ mi ghəy wa wu ni wumini Nwiye koŋ, nji cha fiŋ ma mi mə nə saʼa úŋwən akə unó iboŋ

³ asɨmə akə ufaʼ mbəŋ umə mə ghəy ituʼ ujum mbə́ mə́ beʼere amə utəw ba akə unó iboŋ ma

⁴ ayə nigə damugə cha inji amə ghəy animini ipoŋ kə ibɨgi anóʼ səw unó iboŋ ba.

⁵ Amə aton zənə amaʼazənə Yeso mə ŋu zaʼa akə ungɨŋ isəg yə ghayn abú Nwiye kwi cha ngwə mə kaba ayə kwi ba ni afaʼa nyə̂ inigə kə i naʼa uturi Nwiye asɨmə ngwə si tana inyə̂ inyo naʼ ineŋ kwi afaʼa inigə

⁶ cha ngwə mə wuʼe ayə afaʼa zənə umə tuŋe amə nyə̂ nə afaʼa zənə umə naʼa isəw unó iboŋ

⁷ anigə aghayn kwi o Nwiye aney umugə aŋu mə zaʼa ighəy anó zənə ngwə kaba umugə uŋwaʼanayn da aŋu ungɨŋ aŋwaʼanayn unoʼo

⁸ mbən gha kono kwi Yeso ghayn abú Nwiye kwi cha ngwə mə kaba ayə kwi ba ni afaʼ nyə̂ inigə kə i naʼa uturi Nwiye foro ni afaʼ zənə umə tuŋe amə nyə nə afaʼ zənə umə naʼa isəw unó iboŋ cha ngwə mə wuʼe ayə nə amoʼ ka di ma kwi unoʼo Mose ghayn kwi u naʼa uturi mbəŋ

⁹ yə nibi ghayn abú Nwiye kwi aney umugə aŋu mə zaʼa ighəy anó zənə ngwə kaba umugə Yeso ghayn ney yə tey kwi yə waʼ anun səw izi ufey

¹⁰ damugə anó zənə Nwiye mə́ kaba amə kwi Yeso afaʼ nyə inyo ma ighari feyn boʼo amə ghəy ngwa mba zayn ifigi Nwiye anigə isəw ngwa mba zayn akə ighari feyn

¹¹ ungɨŋ anun usəw, aney igun aney wa afaʼa ambəŋ Nwiye ujum, mbə mə itəm ifaʼ afaʼa ma yə mə nigə ighari nanaʼ asɨmə cha afaʼa wu mi cha unó iboŋ ba

¹² amaʼazənə Kristo si naʼa afaʼ ighari feyn i səw unó iboŋ yə chomo aba bugə jəgi Nwiye

¹³ anigə iti amaʼa wu Yeso yə nəmə kwi Nwiye niŋi ba bana ma asey u niŋe ughəw ma igun

¹⁴ Yeso si ghəy afayi ighari feyn anigə afaʼ wu ghəy ba mbənə umə wumini utəm ikoʼoro fiŋ Nwiye

¹⁵ Azugə zayn zayn ayə nibi ghayn inen kwi. Ayə ghayn asin moʼ kwi

¹⁶ Nwiye ghayn kwi amə usó fey ŋunə ami isɨŋ nə umbəŋ ba akə anəy wu. A yi zi umbəŋ unoʼo ungɨŋ fiŋ ma. Foro ungɨŋ ikono ma.

¹⁷ Azugə wu gha ghayn ighari chini kwi Nwiye ghayn kwi cha ami gha kono aŋu unó iboŋ ma ni igow unó ma.

¹⁸ Amaʼazənə Nwiye si nyaba unó iboŋ ba, ayi mə cha aton akə afaʼ isəw unó iboŋ.

Mba tinə ngwa iyad Nwiye

¹⁹ Anigə umbəŋ unya umugə cha mba mə́ nə goro ngwa inyi ungɨŋ asin zayn zayn Nwiye da animini Yeso,

²⁰ inji fey zəŋ ni imə naʼa itən yə si fiʼi ina anjim iwu ma anigə iwu wu pəŋi aba ndwi zənə yə mə kənə inji iŋu fiŋ Nwiye

²¹ anigə umugə mba mə ni atəw kyayn ambəŋ Nwiye ŋunə umə inayn ba Nwiye,

²² mbən ghəy mba tini ngwa iyad Nwiye ni fiŋ ujum izi ita ibeni ujum ungɨŋ ma mba ŋu nigə ni fiŋ tənə Yeso si səw izayn da ka imə saʼa uma ngwa. Mba nibi ŋu nigə ni nyə̂ inyo tənə usəw izayn ni uney zayn zayn.

²³ Mba zi ita fiŋ ka akə akaʼa zənə Nwiye si kaʼa ina ni cha mba mə goro ngwa damugə wa ŋunə u kaʼa cha umi noʼo tama ma

²⁴ mbənə ghəy mba kaba inji ni ghəy unó mbənə umi mə wyere ngwa umba jum imə tey iwuʼi ni imə ghəy unó chuŋ chuŋ abú ba umbi

²⁵ ka ba bo ngwa imə bumə ni ba Nwiye anji zənə ba moʼ mə ghəy asɨmə mba ni were wa feyn feyn ukono kwi amaʼa zənə Asɨyisəg mi gha zaʼa ayə sə tinə.

²⁶ Mba be si kyay kwi unó mbənə amə unó asiʼ anigə mba ŋu imbey imə bə ghəy unó iboŋ ni mba kyay kwi chama afaʼ moʼ ni ami gha kəbərə unó mbəŋ,

²⁷ da anó zənə ghəy zənə abúʼə amə igoro ungɨŋ ita inyo nu mugə mba mə nəmə aney zənə Nwiye mi saʼ isəg ni uwəd kyayn ŋunə imi zaʼa tuŋ ba mbənə umə bana Nwiye

²⁸ wa ŋunə uton isiy ikɨy tənə mbə naʼa anjim Mose anigə uzənə bigə kə uta ghayn kwi mbə́ zən noʼ yə ibiya uŋwən anigə umbi zwere uŋwən ni cha akənə.

²⁹ Anigə amí mə ngiya abú wa ŋunə umə ney Ŋwə̂ Nwiye ni kwi amə aghəy buw? Abú wa ŋunə umə numə animini zənə yə sɨŋ usó awu ni kwi amə aghəy moʼ cha afaʼa abú aŋwayn. Usó ŋunə yə ghəy uŋwən mə ŋwə Nwiye, abú uŋwən ŋunə umə tono Azugə Nwiye zənə amə ghəy wa kyay umugə Nwiye mə ghəy ichuŋ abú uŋwən. Mbən kono ukudu ingəʼ kyayn ŋunə umi mə abú wa wu.

³⁰ Anigə Nwiye yi zi usaʼa damugə kyayn kwi uŋwən ghayn kwi amə inyi asin igha iwiy unó iboŋ mbənə mbə ghəy yə nibi ghayn kwi Asɨyisəg yi saʼ ba ma.

³¹ Amə anó imə goro itəm ifigi Nwiye kwi usaʼa yə,

³² mbən kono uney mbənə u si chigə, amaʼa zənə uzayn zayn Nwiye bigə igun inen. Mbən zəw ingəʼ azəd anigə cha mbən di gow.

³³ Amə akə amaʼ moʼ mbə mə inayn unó iboŋ da ngwən asaŋ asaŋ ghəy mbən ki zənə ingəʼ. Akə amaʼ chini mbən wuʼ ngwən i bomə ba chini mbənə mbə́ mə́ jimə uŋwən inyiyə uŋwən.

³⁴ Mbən kə́nə́ akə ba mbənə mbə́ mə́ andəŋ. Mbən beni ni iwuʼi ngwən amaʼazənə mbə́ fene umbən ughəy ujum. Mbən ghəy nigə damugə mbən kyayn kwi mbən yə nə ghəy zənə aboŋo chigə umbi awu ni amə ghəy ami tənə koŋ.

³⁵ Anigə mbən yimə fiŋ mbən bo aŋwayn damugə uŋwən uchoʼo afaʼa yi mə kyayn.

³⁶ Mbən yimə fiŋ boʼo mbən ghəy anó zənə Nwiye kaba. Mbən bə ghəy nigə, nji Nwiye yə naʼ ghəy zənə yə kaʼa inen.

³⁷ Nwiye ghayn ungɨŋ aŋwaʼanayn ma kwi cha agha mi sá uŋwən ŋunə umə zaʼa uyi zaʼa cha umi tiŋə

³⁸ anigə, umbəŋ ba mbənə umə ghəy anó zənə akoʼo umbi chomo ikay anjim ibeni fiŋ uma asɨmə wa moʼ akaʼa úŋwən mbi beŋe fiŋ ma iton aŋu cha inyi fiŋ mi boŋ ma ni uŋwən

³⁹ umugə Nwiye ghayn cha mba mə ngwa ba mbənə u bəŋe fiŋ uma iton Kristo anigə nim. Mba beni Nwiye anigə yə chi ngwa angəʼ.