Hibru 1 - Aŋwaʼanayn Uso Fey

Nwiye chigə anjim Ŋwə̂ ma inayn abú ba

¹ Amə akə amaʼ imbey, Nwiye chigə anjim ba ukən inayn abú umba mbaʼ imbey ighari nanaʼ foro akə inji nanaʼ,

² asɨmə akə amaʼa zəŋ nu isəg mə sə ŋu nwi, yə si inayn ina anjim Ŋwə̂ ma ŋunə u zi akə ajəgə iku i tumə ughəy ujum. Yə́ chigə anjim ma itana isəg.

³ Ŋwə̂ wu yə tey umugə uzayn zayn Nwiye ibigə. Unó jum da uŋwən umbə tey umugə Nwiye məŋi. Yə aghəy kwi isəg chomo akə inji zənə i məŋi. Amə anjim inayn kaka ma nu imə aghəy kwi isəg chomo akə inji zənə i məŋi. Amaʼazənə yə́ si aghəy Nwiye səw unó iboŋ ba yə́ chomo aba abugə jəgi Nwiye ŋunə umə ni ikay jum.

Amede Ŋwə̂ wa

⁴ Nwiye aghəy Ŋwə̂ ma mede chigə mbə angəd umugə ukum ŋunə yə naʼ abú uŋwən u chigə ma akə uyi uma.

⁵ Amə abú angəd ngwat nu Nwiye si noʼ ghayn abú uŋwən kwi, “Ngwə mə uŋu ŋwə̂, Akə̂choŋ ayi mə ungwə Mbaʼ á?” Kə amə abú angəd ngwat nu Nwiye si ghayn kwi ayi mə mbaʼ uma uŋwən yə mə uŋu ŋwə̂?

⁶ Amaʼazənə Nwiye cha ŋwə̂ ma imbey ungɨŋ isəg, ka amə abú angəd nu yə ghayn kwi Angəd Nwiye jum u mbi wumini uŋwən.

⁷ Umugə yə mə inayn da mbə angəd yə ghayn kwi, “Yə́ ghəy umbi angəd nu iyeŋ nu ufə Umbi ba faʼa uchomo ni ineme uwəd.”

⁸ Asɨmə abə mə akə ŋwə̂ ma yə ghayn kwi, “Injə́ anó ufon o Nwiye ayə tənə akə ighari feyn, Ngwə yə mə tumə ba akə inji zənə ikoʼoro.”

⁹ Ngwə wuʼ unó mbənə ukoʼoro iban unó mbənə cha udi ikoʼoro. Anigə Nwiye ungwə Nwiye si izoʼ ayə ni ugəd da iwuʼi sugi ingɨŋ injə fiŋ. Yə zoʼ chigə inji zənə u zoʼo umbə unya.

¹⁰ Yə́ nibi ghayn kwi, Ungwə Asɨyisəg, ngwə tana isəg amaʼazənə yə ti Anigə itana azobo akə umbə ubugə.

¹¹ Ughəy mbəŋ mbi saʼa nim asɨmə ngwə yi tənə akə ighari feyn. Umbi nun chata ni unun ndwi,

¹² ngwə yi foy isəg nibi ifoy azobo numugə umə ifoy ndwi. Umbi koboro asɨmə ngwə yi tənə akə ighari feyn.

¹³ Amə abú angəd ngwat nu Nwiye si noʼo ghayn abú uŋwən kwi, “Chomo inyi aba abugə jəgi Pey aney zənə ami zi ubə ba abana iti inya ughəw?”

¹⁴ Anigə mbə angəd amə mbi ngwa? Aka mbə Angəd azugə amə nu faʼa, nu Nwiye tomo kwi ú were ba mbənə umi du angəʼ?