Galetiya 6 - Aŋwaʼanayn Uso Fey

Wa moʼ bə mə zəw ingəʼ, mbən were uŋwən

¹ Umbəŋ unya, wa moʼ akaʼa injən bə ghəy anó iboŋ, umbən mbənə mbən mə ghəy unó mbənə Azugə kaba, mbən ghəy kwi uŋwən təm. Asɨmə, mbən ghəy nigə akə aborobod. Mbən weŋ ngwən da ka akwaʼara nibi nyi ma igun inen.

² Wa moʼ bə mə zəw ingəʼ, mbən were uŋwən. Mbən bə ghəy nigə, nji mbən si num noʼo ŋunə Kristo naʼa inen.

³ Wa moʼ Mbə kono kwi imə wa moʼ nu cha uŋwən mə ma wa moʼ nji uŋwən yə tama inyo ma.

⁴ Wa feyn feyn ney inji unó ma. Imə boŋo, uni komo iguwə kwi iyə ghəy unó chuŋ ka umə məgə ma inyo ma boʼo wa chini,

⁵ damugə wa feyn feyn yə nə ikomo ma ibeʼe.

⁶ Wa moʼ ŋunə ú mə́ itey inayn Nwiye abú uŋwən, u naʼa aba akə ughəy chuŋ jum mbənə umə abú uŋwən abú wa ŋunə yə mə itey inayn wu abú uŋwən.

⁷ Mbən mə tama ngwən itən inyo, cha wa mə baʼara ma Nwiye. Wa yi ijaŋ aba aghəy zənə u kono

⁸ Wa moʼ bə kono aghəy zənə nyə̂ inyo ma kaba, ghəy zənə umi ijaŋ amə iwu. Wa bə kono ghəy zənə Azugə mə kaba, ghəy zənə umi ijaŋ amə itəni zənə cha imi noʼo mey.

⁹ Ka mba bó ngwa imə ghəy ichuŋ. Mba bə ki ibó ngwa, mba yi ijaŋa ughəy nanaʼ amaʼazənə amaʼ yi bə koʼo.

¹⁰ Anigə, mba bə mə nə apan, mba ghəy ichuŋ abú ba jum, amara mə ba u mbənə u beni Kristo.

U chede ŋunə u si nwi nə achaʼara

¹¹ Mbən zən umugə a num umbəŋ ubugə iŋwaʼanayn aŋwaʼanayn zəŋ inen akə ighɨ aŋwaʼanayn kyayn!

¹² Ba mbənə umə kaba imə tinə ngwən u ney ikad inen, umbə kaba itey asaŋ asaŋ kwi mbə boŋ. U mbə ghəy nigə da ka ba nwini ma inya ughəw ma anji zənə umə ghayn kwi, aba anjim umugə Yeso ku azad baʼara nu ba mi du angəʼ.

¹³ Kaba ba mbənə umə ghayn kwi u ney ikad ba, cha úŋwən mə isiy ma unoʼo. Asɨmə umbə kaba kwi u ney ikad inen boʼo umi mə komo iguwə kwi uŋwən si ghəy uney ikad inen.

¹⁴ Amə da umugə, cha ami noʼo komo aŋu iguwə, anigə kwi ayə komo da anó iwu ungwa Asɨyisəg Yeso Kristo azad abaʼara ghəy. Umugə Yeso Kristo ku azad abaʼara, anigə cha aghəy moʼ igun isəg amə nə anó moʼ ighəy iniŋ. Cha aŋu nə anó moʼ ighəy nə ughəy igun isəg.

¹⁵ Kə mbə ney ikad wa, kə cha udi ney ikad wa cha zigə nə anó moʼ ighəy. Anó kyayn zənə amə awu amə kwi ma si ba fey.

¹⁶ Nwiye zi aborobod nibi idiri ba mbənə unum ukɨ uŋu. U nibi ghəy nigə igun ba Nwiye jum.

¹⁷ Inoʼ akə̂choŋ, ka wa moʼ naʼa ingəʼ iniŋ, damugə unwini mbənə umə igun iniŋ tey kwi ubugə amə sob abú Yeso.

¹⁸ Umbəŋ unya, Ungwa Asɨyisəg Yeso Kristo ghəy ichuŋ inen. A mə nigə.