Galetiya 5 - Aŋwaʼanayn Uso Fey

Kristo si chi ngwa aton isob

¹ Kristo si chi ngwa aton isob, da ka mba gha chomo ngwa aton isob. Mbən təm ikay da ka wa moʼ gha ghəy ma kwi mba gha beni isob aton unoʼo.

² Mbən zwaray! Umugə Pol ayə ghayn inen kwi, mbən mbə́ beni kwi unəy itən ikad, nji anó zənə Kristo aghəy da ngwən chigə ibuw.

³ Ayə ghayn abú ba jum mbənə u beni kwi u ney ikad uma kwi umbi isiy unoʼo jum.

⁴ U mbən mbənə mbən kaba itəm koʼoro damugə mbən mə isiy unoʼo, mbən səne injən inyo aboʼo Kristo. Mbənə ton ichuŋ zənə Nwiye ghəy inen.

⁵ Mba yə kaŋa nəmə kwi Nwiye ghəy mba təm ikoʼoro anjim mugə mba zi fiŋ igun ma. U yi ghəy nigə anjim azugə ma.

⁶ Numugə ma mə akə anó feyn nə Kristo, anigə cha anó iney ikad wa kə anó ni cha udi ney ikad wa mə ma nə anó moʼ ighəy. Anó kyayn amə umugə mba zi fiŋ igun Kristo iwuʼ uŋwən.

⁷ Mbən mə́ kaŋa ighəy unó chuŋ. Amə ngwa təmənə ngwən kwi ka mbən beni ngwən aboʼo asiʼ?

⁸ Akəma Nwiye ŋunə u tiya ngwən kwi mbən mə umbi ba ghəy kwi ka mbən beni ngwən aboʼo asiʼ.

⁹ Ba mbə ghayn kwi, “Aba ŋwə̂ asin afuro u yə aghəy kwi ingəŋ jum koʼ”

¹⁰ A yə bugə zi fiŋ igun inen numugə mba mə akə anó feyn nə Asɨyisəg kwi cha mbən mi num ikono chini chigə akə izənə a naʼa inen. Nwiye yi saʼ wa ŋunə umə bure ngwən. Izi usaʼa igun ma, ka nə di ma ngwa.

¹¹ Umbuŋ unya, a bə ghayn kwi mbən ney ikad ba, nji aton nu ba mə inwini itəŋ inya ughəw amə da ingiya? A bə mə kwi mə kaŋa ighəy nigə, nji cha anó zənə amə ghayn da mugə Yeso ku azad abaʼaray mə ma nə anó moʼ ighəy.

¹² Amə́ da ba mbənə umə iburə ngwən, ayə kaba kwi u ŋuw imbey ni isaʼ inyo ma uma uma.

¹³ Umbuŋ unya, Nwiye tiya ngwən kwi mbən mə umbi ba. Da ka mbən gha beni ngwən isob abú unoʼo. Cha anó zənə cha mbən beni aboʼo isob tey kwi mbən yə aghəy unó mbənə nyə̂ inyoŋ kaba. Ayə kaba amə kwi iwuʼi aghəy kwi mbən faʼa abú umbən unya,

¹⁴ damugə unoʼo jum si bumə akə noʼo feyn. Noʼo wu feyn amə kwi, “Ngwə wuʼə wa ŋunə umə tinə ma inji iyad numugə ngwə wuʼə injə nyə̂ inyo.”

¹⁵ Ka mbən chomo ngwən ni nyə̂ nya nya nu imə nomo nibə koro nyə̂ chini. Mbən weŋ ngwən nji mbən yi niy ngwən umbən umbən.

Mbən beni aboʼo Azugə Nwiye chigə umugə mbən beni aboʼo ughəy mbənə nyə̂ inyo mə kaba

¹⁶ Anó zənə amə ghayn amə kwi, mbən chomo akə inji zənə Azugə kaba. Ka mbən mə aghəy ngwən unó mbənə nyə̂ inyo mə kaba.

¹⁷ Ayə ghayn ney damugə, unó mbənə nyə̂ inyo mə kaba mə u mbənə cha Azugə mə kaba. Umbənə Azugə mə kaba, amə u mbənə cha nyə̂ inyo mə kaba. Úŋwən uma ubigə mbə zoŋo da mba aghəy unó mbənə u kaba.

¹⁸ Asɨmə mbən bə sə aghəy aba unó mbənə Azugə mə kaba nji cha unoʼo ni ikay igun inen.

¹⁹ Unó mbənə nyə̂ inyo mə kaba mbə du zayn. Amə anó ni mə jəgə isəg, imə ighəy ufibiri unó, imə aghəy unyimi unó,

²⁰ anó ni iwumini unwiye ibuw ibuw, anó ni ikwabay ikwa, anó ni aghəy abana, anó ni aghəy adey, anó ni isə itəm, anó ni aghəy kwi aba ungwə mə nə ughəy, anó ni ghaba ba, anó ghey ibumi kukuŋe,

²¹ anó imə ighəy imbəw, anó ni inugə unoʼ ibigə, anó ni zi adoʼ akə aghəy wa, nugə unó ibigə ighəy uzow unó, nə unó chini u chomo ni umbəŋ. Ayə chede ngwən akinine numugə mə si dey chede kwi, cha ba mbənə umə ighəy ukudu unó ŋunə mi jəgə uma anó ufon Nwiye.

²² Asɨmə unó mbənə azugə mə kaba amə anó ni iwuʼ ba, anó ni mə ghaʼa ayə, anó ni chomo akə aborobod, anó ni yimə fiŋ, anó ni mə nə iboŋo fiŋ, anó ni mə ighəy ichuŋ, anó ni izi fiŋ igun ba,

²³ anó ni num inyo asəy nə anó ni yimə inyo. Cha noʼo moʼ tono ma unoʼ mbəŋ.

²⁴ Ba Yeso Kristo si komo nyə̂ inyo ma nibi komo unó mbənə nyə̂ inyo mə kaba nibə iwuʼ azad abaʼaray.

²⁵ Amə Azugə aghəy kwi mba mə ikay, anigə mba aghəy unó mbənə Azugə mə kaba.

²⁶ Ka mba mə komo ngwa iguwə, kə ghəy kwi ba chini usɨy itəm, kə ighəy adey.