Galetiya 4 - Aŋwaʼanayn Uso Fey

¹ Anó zənə amə ghayn amə kwi, amaʼazənə a jəgə iku mə bugə kweʼe, cha kyaba akə uŋwən nə isob kanə ughəy jum amə uma.

² U yi chomo aton ba mbənə umə iney uŋwən, nibi chomo aton u mbənə umə iney ughəy ma pey amaʼazənə mbaʼ ma siy.

³ Amə ichin ichin ina. Anigə amə kwi amaʼazənə mba mə buŋ kuŋe, mba mə́ isob aton uzugə mbənə umə tumə isəg.

⁴ Asɨmə amaʼazənə amaʼ si koʼ, Nwiye tom Ŋwə̂. Mbə́ ibə́ uŋwən u chomo ni wa inyoŋ atəw. Yə nibi ikwey ungɨŋ unoʼo,

⁵ da iziya utəw ba mbənə umə aton unoʼo. Yə ghəy nigə damugə mba mə buŋ Nwiye.

⁶ Numugə mba mə buŋ, Nwiye si cha Azugə Ŋwə̂ ma ungɨŋ ita fiŋ. Azugə wu yi kaŋa dey ghayn kwi, “Mbaʼ, uŋu Mba!”

⁷ Anigə cha ngwə di ni məŋi amə isob, mbən mə buŋ. Numugə ngwə mə ŋwə̂, anigə ngwə mə jəgə iku.

Fiŋ a toboro Pol da ba Galesiya

⁸ Amaʼa imbey, cha mbən kyay Nwiye. Anigə mbən mə́ isob abú ughəy mbənə akəma unwiye ibuw ibuw.

⁹ Asɨmə akinine nu mbən si kyay Nwiye, kə awaʼa ghayn kwi akinine nu Nwiye si kyay ngwən, mbən mə kaba igha iŋu aboʼo uzugə mbən cha ikay abú ŋwən cha umə ighəy anó moʼ, nu umə tumə isəg, mbən mə kaba igha məŋi isob abú uŋwən?

¹⁰ Mbən yə wumini uney moʼ, iwumini aməg moʼ, iwumini amaʼ moʼ, nibə iwumini ituʼ moʼ.

¹¹ Ifiŋ yə toboro aŋu da ngwən. Yə chomo ni kwi umbəŋ ufaʼa jum da ngwən ayə chigə atəw ukow.

¹² Umbəŋ unya, ayə boʼo ubugə inen kwi mbən chomo ni umugə i du aton unoʼo. Damugə mə si nibi chomo ni mbən nu cha amə isiy unoʼo Mose. Cha mbən gow ngwən anó moʼ iniŋ.

¹³ Mbən kaŋa kyay amə isɨgə yə ghəy a zaʼa ghayn ukən chuŋ inen akə ighari imbey.

¹⁴ Kanə di ma kwi, inji zənə mə́ mə isɨgə toboro ngwən, cha mbən ton ni itebe aŋu. Asɨmə mbən num aŋu numugə umə inum angəd Nwiye, kə numugə umə inum Yeso Kristo.

¹⁵ Mbən mə́ wuʼə ngwən amaʼa wu azəd, ingiya si gha ghəy? Umugə mə́ mi ghayn kwi inji di mə awu, nji mbən mi ghəy unó jum iniŋ kaba chi injən aghɨ na iniŋ.

¹⁶ Mə waʼa ni beŋe akə wa bana damugə aghayn asiʼ inen?

¹⁷ Ba mbi mə kaba ibeŋ ukən chuŋ da ikaba kwi mbən beni anó zənə umə ghayn. Asɨmə cha zigə mi were ma ngwən. Umbə kaba ighaba ngwən aboʼo iniŋ da mbən beni unó mbənə umə ghayn.

¹⁸ Yə boŋ kwi mbən ni zəw anó zənə umə ghayn amaʼazənə aton wu bə boŋo. Zigə yə boŋ kwi uni ghəy nigə ighari jum akə ma aba akə amaʼazənə amə nə umbən.

¹⁹ Umbəŋ buŋ nu a wuʼi kwaʼa azəd, ayə zəw ubuʼ nə ayey ŋunə u mə nomo ibə́. A yi zəw nigə pey amaʼazənə mbən mi chomo ni Kristo.

²⁰ Mə kaŋa kab kwi nji mə́ mi mə umbən akinine da a kyaba inji zənə amə inayn damugə inyi fiŋ yə kaŋa toboro aŋu da ngwən.

Anwini akə unó Haga nə Sera

²¹ U mbən mbənə mbən mə kaba ichomo aton unoʼo, mbən ghayn iniŋ, cha mbən kyay anó zənə amə ungɨŋ unoʼo?

²² A yə ungɨŋ Aŋwaʼanayn Nwiye kwi, Abraham mə́ nə ujoŋ bigə. Ufeyn yə ibə́ nə ayey nu amə isob. Ufeyn yə́ ibə́ nə ayey nu akəma isob.

²³ Mbə ibə́ ŋwə̂ ŋunə ingo ma mə isob numugə umə́ ibə́ buŋ chini. Asɨmə mbə ibə́ uŋunə ingo ma akəma isob akə nji zənə Nwiye kaʼa.

²⁴ Mba məgə anó zəŋ akə ingiya? Ayey mbəŋ ubigə itəm akə uso ibigə. Ayey ŋunə yə ibə́ ŋwə̂ ma u beni isob amə Haga. Yə təm akə uso ŋunə mbə isɨy igun Ugum Sinayni.

²⁵ Haga təm akə ugum Sinayni á Arebiya. Uŋwən chomo ni Yerusanem damugə uŋwən yə akə isob nə ba uma.

²⁶ Asɨmə cha Sera mə ma isob. Uŋwən itəm akə Yerusanem ŋunə umə azobo. Uŋwən mə ungwa ingo.

²⁷ A yə ungɨŋ Aŋwaʼanayn Nwiye kwi, “Wuʼe ayə ungwə ayey ŋunə cha ngwə ibə́ Kyugay ikyi ikyay akə ikay, ungwə ŋunə cha ngwə di zəw ubuʼ ŋwə̂, Ayey ŋunə unom ma waʼa uŋwən u yi ibə́ buŋ nanaʼ Chigə ayey mbənə umə nə unom.”

²⁸ Umbəŋ unya, umbən ni Azik mə buŋ Nwiye anji zənə uŋwən si kaʼ

²⁹ Akə amaʼa wu, ŋwə̂ zənə mbə́ ibə́ uŋwən numugə umə ibə́ buŋ chini nwini inya ughəw Ŋwə̂ ŋənə Azugə Nwiye ghəy kwi ubə́ uŋwən. Amə ichin ichin numugə amə akinine.

³⁰ Amə ungɨŋ Aŋwaʼanayn Nwiye kwi ingiya? Ayə ungɨŋ kwi, “Fuw isob wu nə ŋwə̂ ma. Damugə cha ŋwə̂ isob mi foro ma da ijəg ughəy ŋwə̂ ŋunə cha ingo ma mə ma isob.

³¹ Anigə umbəŋ unya, cha mba mə ngwa buŋ ayey ŋunə amə isob. Mba mə buŋ ayey ŋunə akəma isob.”