Galetiya 3 - Aŋwaʼanayn Uso Fey

Anó ni izi fiŋ igun Kristo nə anó ni isiy unoʼo

¹ Wey! Umbən ba Galesiya mbən mə uneŋ! Amə ngwa fɨ ngwən? Mbən si kaŋa itey mbən zən umugə mbə́ kom Yeso Kristo.

² Mbən təm a biri anó feyn zəŋ inen. Nwiye waʼa naʼa Azugə zayn zayn inen damugə mbən aghəy unó mbənə umə ungɨŋ unoʼo akə damugə mbən beni anó zənə mbən zəw da ukən chuŋ i beni?

³ Mbən mə kaŋa uneŋ ingiya? Mbən ti imə beni boʼo Kristo amaʼazənə Azugə Nwiye zaʼa igun inen, anigə mbən mə kaba imaray akə injən ikay?

⁴ Unó nanaʼ mbənə mbə aghəy injən akaʼa awaʼa chigə atəw ukow? Indəʼ cha mbə́ di chigə ibuw.

⁵ Nwiye waʼa naʼa Azugə inen nibi naʼa uyere unó akaʼa injən, yə waʼa aghəy nigə damugə mbən aghəy unó mbənə umə ungɨŋ unoʼo akə amə da mugə mbə beni unó mbənə mbən zəw da Kristo?

⁶ Mbən koni Abraham. Ayə ungɨŋ Aŋwaʼanayn Nwiye kwi, “Yə beni Nwiye, anigə Nwiye num kwi uŋwən təm ikoʼoro.”

⁷ Anigə mbən kyay kwi ba mbənə u zi fiŋ igun Nwiye amə buŋ akə aghaŋ Abraham.

⁸ Aŋwaʼanayn Nwiye si ghayn imbey kwi Nwiye yi aghəy kwi ba mbənə akə ma ba Jû təm ikoʼoro anjim mugə u zi fiŋ igun ma. Anigə yə́ si nibi ghayn ukən chuŋ da Abraham kwi, “Uŋwən yi chigə anjim ma zi aborobod igun ba jum.”

⁹ Abraham beni Nwiye anigə Nwiye zi aborobod igun ma. Nwiye yi nibi zi aborobod igun ba mbənə u zi fiŋ igun ma.

¹⁰ Indon yə igun ba mbənə u zi atəw imə ighəy aba unó mbənə umə ungɨŋ unoʼo. A yə ungɨŋ Aŋwaʼanayn Nwiye kwi, “Indon yə igun ba jum mbənə cha udi num unó jum mbənə umə ungɨŋ aŋwaʼanayn unoʼo foro igun wa ŋunə cha umə ighəy.”

¹¹ Akinine yə zayn kwi cha wa moʼ mi təm ikoʼoro ifigi Nwiye damugə yə isiy unoʼo. Ayə ungɨŋ Aŋwaʼanayn Nwiye kwi, “Ba mbənə umə aghəy unó mbənə ukoʼoro umbi chomo ikay anjim umugə u zi fiŋ igun Nwiye.”

¹² Cha anó ni isiy unoʼo mə ma nə anó moʼ ighəy nə anó ni izi fiŋ igun Nwiye. Ayə ungɨŋ aŋwaʼanayn Nwiye kwi, “Wa ŋunə umə ighəy unó mbənə umə ungɨŋ unoʼo ighari jum, yi chomo ikay da iŋwən.”

¹³ Kristo ziya umba utəw akə indon zənə unoʼo zi igun ina. Yə ghəy nigə inji zənə yə beʼe indon da ngwa. A yə ungɨŋ Aŋwaʼanayn Nwiye kwi, “Indon yə igun ba jum mbənə u tiŋe akə azad.

¹⁴ Yeso Kristo aghəy ney da aborobod zənə Nwiye kaʼa abú Abraham nyi igun ba mbənə akəma ba Jû. Anji zənə amə nigə, Azugə zənə Nwiye kaʼa ayi nyi igun na anjim mugə mba zi fiŋ igun ma.”

Cha unoʼo di kyaba uma anó zənə Nwiye kaʼa

¹⁵ Umbuŋ unya, ayi num anwini akə unó mbənə ba inyoŋ atəw mə aghəy unəy jum. Ba bə si beni anó isɨŋ uso, cha wa amə aghəy ughayn kwi cha uso wu mi təm. Kə izwey anó moʼ akə uso wu.

¹⁶ Nwiye kaʼa unó mbəŋ abú Abraham nibi kaʼ abú ŋwə̂ akə aghaŋ ma. Cha Aŋwaʼanayn Nwiye di ghayn ma kwi, “Abú buŋ akə aghaŋ ma” Nu amə ba nanaʼ. Yə ghayn amə kwi, “Abú ŋwə̂ akə aghaŋ ma” Anigə amə Kristo.

¹⁷ Anó zənə amə ghayn amə kwi, “Nwiye isɨŋ uso nə Abraham anigə ikaʼ kwi iyi isiy uso wu. Anigə unoʼo mbənə mbə naʼa ituʼ akɨ kyugə nə ighumi ta anjim cha umi chigə uso wu anigə iniy, anigə ighəy kwi anó zənə Nwiye kaʼa achigə ibuw.

¹⁸ Nwiye bə mə naʼa ughəy abú ba amə anjim mugə umə isiy unoʼo, nji cha ami məŋi ma anji zənə yə kaʼa. Yə naʼa ughəy abú Abraham aba anji zənə yə kaʼa.”

¹⁹ Nwiye si naʼa unoʼo da ingiya? Yə zwey unoʼo aboʼo uso damugə ba mə gow unó. Unoʼo mbi mə awu pey Amaʼazənə ŋwə̂ ŋunə Nwiye kaʼa unó wu abú uŋwən mi zaʼa. Nwiye chigə anjim mbə angəd inaʼ unoʼo abú Mose kwi unaʼa abú ba. Anigə Mose yə ungɨŋ ugha Nwiye nə ba.

²⁰ Cha ma wa ungɨŋ ugha amaʼazənə abə ma aba wa feyn mə isɨŋe uso. Nwiye yə abəma zeʼe.

Aton akə unoʼo

²¹ Unoʼo waʼa ton anó zənə Nwiye kaʼa? Indəʼ! Noʼo moʼ di mə awu nu umə naʼa itəni, nji anó ni itəm ikoʼoro ifigi Nwiye mi zaʼa anjim mugə ba mə isiy unoʼo.

²² Asɨmə ayə ungɨŋ Aŋwaʼanayn Nwiye kwi, isəg jum yə aton unó iboŋ. Anigə unó mbənə Nwiye kaʼa anjim mugə ba zi fiŋ igun Yeso Kristo u yi naʼ abú ba mbənə u beni.

²³ Asɨmə, ki anó nu zi fiŋ igun Kristo sə zaʼa, unoʼo ghəbə ngwa ma chomo ni kwi ba yə andəŋ. Mba chomo nigə pey Amaʼazənə Nwiye tey anó ni zi fiŋ igun Kristo.

²⁴ Unoʼo mə tumə ngwa pey amaʼazənə Kristo zaʼa. Yə zaʼa da mba təm ikoʼoro ifigi Nwiye anjim umugə mba zi fiŋ igun ma.

²⁵ Asɨmə akinine nu anó ni zi fiŋ igun Kristo si zaʼa, cha ngwa aton unoʼo mbənə umə tumə ngwa.

²⁶ U mbən jum amə buŋ Nwiye anjim umugə mbən zi fiŋ igun Yeso Kristo.

²⁷ U mbən jum mbən yə akə anó feyn nə Kristo numugə mbən num une akə ukum ma. Mbən chomo akinine ni uŋwən.

²⁸ Anigə cha ikyaba akə wa Jû nə wa ŋunə akəma wa Jû. Cha ikyaba akə isob ni wa ŋunə akəma isob. Cha ikyaba akə anóm nə ayey damugə ba jum si məŋi wa feyn numugə mba mə akə anó feyn nə Kristo.

²⁹ Mba bə mə ba Kristo, anigə kwi mba mə buŋ akə aghaŋ Abraham. Numugə mba mə buŋ akə aghaŋ Abraham, anigə amə kwi mba yi jəg ughəy mbənə Nwiye kaʼa.