Galetiya 2 - Aŋwaʼanayn Uso Fey

Ba-tom mbi beni kwi Pol mə nibə wa utom

¹ Amaʼazənə ituʼ si chigə ighum cho kyugə, mə nibi gha ŋu a Yerusanem nə Banabas. Mə nibi num Tayitus ŋu nə uŋwən.

² Mə ŋu awu damugə amə Nwiye yə tey iniŋ kwi aŋuw. Mə ŋu pey yi toʼoro ukən chuŋ ŋunə mə ghayn abú ba mbənə akə ma ba Jû. Mə toʼoro aba abú ba mbənə umə cha ifere tənə imə Yerusanem. Mə aghəy nigə da afaʼa zənə amə faʼa nə afaʼa zənə mə si faʼ, ka unəy ma kwi amə afaʼa ibuw.

³ Cha mbə́ di ghayn uma kwi u ney ikad Tayitus ŋunə amə faʼa nə uŋwən. Ka yə mə wa Grik

⁴ Amə nigə ba moʼ nyaʼa zaʼa nyi ungɨŋ ungwa fere kaba izən inji zənə ma mə chomo numugə ba mə akə ibumi nə Kristo. Mbə mə kaba ghəy ngwa akə isob akə aton unoʼo Mose.

⁵ Cha mbá di beni ngwa anó zənə mbə́ mə́ ghayn ka ba piy. Da mbən beni ukən asiʼ ŋunə mba mə ghayn.

⁶ Cha ba mbənə ba mə iney kwi amə ba kyayn mə ney ma aŋu akə anó moʼ kwi kə wa moʼ kwi kə úŋwən amə ba kyayn akə akəma ba kyayn. Cha zigə mə ma anó moʼ iniŋ. Anó zənə a kyayn amə kwi cha Nwiye mə ney ma kwi wa moʼ amə wa kyayn cha umoʼ amə ma wa kyayn. Cha mbə zwey uma anó moʼ akə ukən ŋunə mə́ mə ghayn.

⁷ Asɨmə kwi, úŋwən zən kwi Nwiye si zi anó ni ghayn ukən chuŋ abú ba mbənə akəma ba Jû ungɨŋ umbuŋ ubugə, aba anji zənə yə́ zi anó ni ghayn ukən chuŋ abú ba Jû ungɨŋ ubugə Pita.

⁸ Úŋwən zən kwi Nwiye ŋunə u choʼo Pita tom kwi u faʼa akaʼa ba Jû nibi choʼo aŋu tom kwi a faʼa akaʼa ba mbənə akəma ba Jû.

⁹ Amaʼazənə Jams nə Pita foro Jon nu amə utəw ungɨŋ ifere wu zən afaʼa zənə Nwiye naʼa iniŋ, mbə́ chaʼara aŋu nə Banabas itey kwi mba yə akə anó feyn nə úŋwən. Mbə́ aghəy ney da mba ŋuw abú ba mbənə akəma ba Jû, úŋwən si ŋu abú ba Jû.

¹⁰ Anó zənə mbə ghayn ina aba kwi mba kono anó ni were ba ukwaŋ nu amə anó nu mə́ mə kaŋa kaba ighəy.

Pol kyayn abú Pita Antiyok

¹¹ Amaʼazənə Pita zaʼa Antiyok, mə kyayn abú uŋwən ifigi ba damugə yə aghəy anó nu cha adi koʼoro.

¹² Mə kyayn abú uŋwən damugə, ki ba mbənə Jams tomo sə zaʼa, Pita mə jəgə nə ba mbənə akəma ba Jû. Asɨmə Amaʼazənə mbə́ zaʼa, yə num inyo ma anjim cha yə mə gha jəgə ma nə úŋwən. Yə aghəy nigə damugə yə́ mə́ goro ba mbənə umə ghayn kwi u ney ikad ba jum mbənə umə ghayn kwi mbə beni Kristo.

¹³ Amaʼazənə yə mə aghəy uburi unó mbəŋ, ba Jû chini mə beni aboʼo uŋwən. Kaba Banabas mə nibə faba numugə yə beni aboʼo ba mbənə umə ighəy uburi unó mbəŋ.

¹⁴ Amaʼazənə mə zən kwi cha umə beni aboʼo asiʼ ŋunə umə ungɨŋ ukən chuŋ, mə ghayn abú Pita ifigi úŋwən uma jum kwi, “Ngwə mə wa Jû anigə ngwə yə aghəy unó ni wa ŋunə akəma wa Jû. Ngwə bə kə aghəy yə unó ni wa Jû nji ngwə si mə tinə ba mbənə akəma ba Jû kwi uni aghəy unó ni ba Jû ingiya?”

Ba jum mbi du angəʼ anjim mugə u zi fiŋ igun Kristo

¹⁵ Umugə Pol ghayn abú Pita kwi, “Mba mə buŋ isəy Jû, cha mba mə ba mbənə akəma ba Jû nu umə aghəy unó iboŋ.

¹⁶ Anó zənə mba kyay amə kwi, cha wa u təm ikoʼoro ifigi Nwiye akə nji zənə isiy unoʼo Mose. Wa təm ikoʼoro aba anji zənə u zi fiŋ igun Yeso Kristo. Anigə mba si təm ikoʼoro anjim mugə mba zi fiŋ igun Kristo akə ma umugə mba isiy unoʼo Mose. Cha wa təm ikoʼoro damugə isiy unoʼo Mose.

¹⁷ Mba mbə mə kaba itəm ikoʼoro numugə mba mə akə anó feyn ni Kristo, asɨmə mba zən kwi mba yə bugə aghəy unó iboŋ, yə waʼa tey kwi Kristo yə aghəy kwi ba ni aghəy unó iboŋ? Indəʼ!

¹⁸ A bə mə gha aghəy unó mbənə mə si ton, Nji yə tey kwi mə si gow unoʼo.

¹⁹ Mə́ mə inum unoʼo, anigə akinine mə si zən kwi cha unoʼo wu mə were uma aŋu. Anigə mə chomo ni wa ŋunə unoʼo si zwere da ami chomo ikay ni faʼa abú Nwiye. Mbə si komo aŋu azad baʼaray aboʼo Yeso.

²⁰ Anigə akə ma umugə amə ikay. Wa ŋunə umə ikay mə Kristo ŋunə umə ungɨŋ iniŋ. Itəni zənə imə iniŋ akinine amə da mugə a zi fiŋ igun Ŋwə̂ Nwiye ŋunə u wuʼi aŋu anigə inaʼ inyo ma akə ghəy ifaʼ da aŋu.

²¹ Cha mə di ton kwi Nwiye yə ghəy ichuŋ. Asɨmə wa bə mi təm ikoʼoro da mugə umə isiyə unoʼo, nji Kristo ku ibuw.”