Galetiya 1 - Aŋwaʼanayn Uso Fey

¹ A mə umugə Pol nu amə wa tom Kristo ŋwaʼanayn aŋwaʼanayn zəŋ. Akə ma ba inyoŋ atəw mbə choʼo aŋu kə cha ikay zənə mbə́ choʼo aŋu di noʼo ma abú wa. Ikay wu noʼo abú Yeso Kristo foro abú Nwiye Mbaʼ ŋunə yə́ zəmə uŋwən.

² Ba Kristo jum mbənə umə akə bumə aboʼo inyi cha achaʼara abú umbən mbənə mbə́ mə́ ungɨŋ ifere ba Kristo tənə imə aba abey Galesiya.

³ Nwiye ungwa Mbaʼ nə Asɨyisəg Yeso Kristo ghəy ichuŋ inen nibi naʼ aborobod inen.

⁴ Yeso Kristo naʼa inyo ma akə aghəy ifaʼ da umba unó iboŋ. Yə́ aghəy nigə da ichi ngwa ungɨŋ isəg iboŋ zəŋ nu unó iboŋ sugi ungɨŋ. Yə aghəy nigə anji zənə Nwiye Mbaʼ kaba.

⁵ Mba wumini Nwiye akə ighari feyn. A mə nigə.

Ukən chuŋ aba ufeyn

⁶ Yə chigə aŋu kwi mbən yabi waʼ Nwiye ŋunə yə́ tiya ngwən anjim ichuŋ zənə Kristo ghəy, anigə mbən yə sə beni amə boʼo ukən chuŋ chini.

⁷ Akə ma kwi, ukən chuŋ chini yə awu, asɨmə ba moʼ mbə́ bure umbən utəw. U mbə kaba ibeŋe ukən chuŋ da Yeso.

⁸ Asɨmə ka aba umba kə angəd nu uzaʼa azobo, wa moʼ akaʼa inja bə ghayn ukən chuŋ nu ukyaba akə uŋunə mba ghayn inen, Nwiye zi indon igun ma!

⁹ Anji zənə mba si dey ghayn imbey, ayə gha ghayn ighari chini inen kwi: Wa moʼ bə ghayn ukən chuŋ inen nu ukyaba akə uŋunə mbən si dey izəw ibeni, Nwiye zi indon igun ma.

¹⁰ A waʼa kaba kwi ba ghayn kwi mə boŋo, kə kwi Nwiye ghayn kwi mə boŋo? Mə di mə kaba ighəy kwi ba ghayn kwi mə boŋ, nji cha mə mi mə wa faʼa Kristo.

Inji zənə Pol beŋe si məŋi wa tom Kristo

¹¹ Umbuŋ unya, ayə kaba kwi mbən kyay kwi cha ukən chuŋ ŋunə amə ghayn noʼo ma abú ba inyoŋ atəw.

¹² Cha wa inyoŋ atəw moʼ ghayn ma ukən uŋu iniŋ, kə kwi amə wa inyoŋ atəw moʼ yə́ tey iniŋ. Amə Yeso Kristo ma ambuŋ yə́ tey iniŋ.

¹³ Mbən si zəw umugə mə́ mə ighəy unó Amaʼazənə mə́ zi fiŋ akə anó Nwiye ba Jû. Mbən zəw umugə mə́ mə nwini inya ughəw ba mbənə mbə́ mə́ ungɨŋ ifere ba Kristo kwaʼa akə ingəʼ. Mə́ nibi kab iniy ufere wu.

¹⁴ Mə́ mə ŋuw imbəy akə anó Nwiye ba Jû chigə ba Jû nanaʼ mbənə mbə́ mə́ akə itɨŋ ingwaʼ. Mə́ mə kaŋa zi atəw imə aghəy unó mbənə umba mbaʼ imbey aghəy.

¹⁵ Ki mbə sə ŋu ibə́ aŋu, Nwiye aghəy ichuŋ iniŋ ichoʼo aŋu nibi tiya aŋu kwi amə wa faʼa uma. Yə kaŋa iwuʼ

¹⁶ kwi u tey Ŋwə̂ ma iniŋ da aghayn ukən chuŋ da uŋwən abú ba mbənə akəma ba Jû. Cha mə di ŋu aŋu kwi wa moʼ naʼa ikɨy iniŋ.

¹⁷ Cha mə nibi ŋu aŋu á Yerusanem izən ba tom mbənə mbə́ dey mə awu ki umugə. Aba ighari wu, mə ŋu Arebiya ighari wene iŋu Damaskos.

¹⁸ Amaʼazənə ituʼ si chigə ita, mə ŋu á Yerusanem iŋu zən Pita. Mə pey yi chomo aboʼo uŋwən akə ika bigə.

¹⁹ Cha mə di zən aŋu wa tom chini chigə akə Jame ŋunə amə unya anóm Asɨyisəg Yeso.

²⁰ Nwiye kyay kwi anó zənə amə ŋwaʼanayn inen amə anóʼ asiʼ.

²¹ Mə́ noʼo awu iŋu ungɨŋ uba ubey mbənə umə Siriya foro Sinisiya.

²² Amaʼa wu, cha ba ungɨŋ ifere ba Kristo tənə imə Judiya di kyay ma aŋu.

²³ Mbə zəw aba unó mbənə ba chini mə ighayn kwi, “Anom ŋunə yə́ mə́ inwini ita inya ughəw yə́ sə́ ghayn anó da ibeni zənə yə́ mə́ kaba iniy.”

²⁴ Anigə mbə́ mə́ yere Nwiye da aŋu.