Filipi 4 - Aŋwaʼanayn Uso Fey

Pol akɨ ba Kristo mbənə umə Filipi

¹ Umbuŋ unya, mə wuʼe ngwən nibə kaŋa kab kwi a zən ngwən. Mbən yə aghəy kwi inyi fiŋ boŋo. Mbən yə nibə choʼo afaʼa akə afaʼa zənə mə faʼa. Umbuŋ unya nu a wuʼi kwaʼa azəd, mbən təm ikay numugə mbən mə akə anó feyn ni Asɨyisəg.

² Ayə boʼo ubugə inigə ungwə Eudiya, nibə boʼo inigə ungwə Sintike kwi mbən chomo akə anó feyn numugə mbən mə ba Asɨyisəg.

³ Ayə nibə ghayn inigə, ungwə ŋunə ngwə faʼa nə umugə akə fiŋ jum, kwi ngwə were ayey mbəŋ u chomo akə aborobod, damugə úŋwən, Klemen foro ba chini si faʼ akə ikay nə umugə ighayn ukən chuŋ. Ikum uma itə ungɨŋ aŋwaʼanayn zənə uŋwaʼanayn ikum ba mbənə umi jəgi itəni.

⁴ Mbən ghaʼa ngwən ighari jum numugə mbən mə akə anó feyn nə Asɨyisəg Kristo. A yə gha ghayn inen kwi: Mbən ghaʼa ngwən.

⁵ Mbən tey abú ba jum kwi mbən yə nə iboro fiŋ. Asɨyisəg yi yabi zaʼa.

⁶ Ka mbən mə tumə ngwən inyo da anó moʼ, asɨmə mbən chaʼara Nwiye da unó jum, boʼo ubugə akə ughəy jum mbənə mbən mə kaba. Nibə naʼa yə beni ayə abú uŋwən.

⁷ Mbən bə aghəy nigə, nji aborobod Nwiye nu a chigə akə iwe ba inyoŋ atəw kyay mara yi aghəy kwi ka itən fiŋ boro ma, nibi aghəy kwi ka itən ikono toboro ma ngwən numugə mbən mə akə anó feyn nə Kristo.

⁸ Umbuŋ unya, anó nu asi nwi amə kwi, anó moʼ be boŋ, anó moʼ bə mə awu amə tey kwi ba yere, mbən niŋi itən ikono igun unó wu. Ano nu amə iyi asiʼ, anó nu ba mi wumini, anó nu a koʼoro, anó nu azayn, anó nu ba wuʼi, anó nu aboŋo chigə, anó nu atey kwi ba yere, mbən niŋi itən ikono igun unó wu.

⁹ Mbən aghəy unó mbənə mə tey inen mbən beni. Mbən aghəy unó mbənə mbən zəw iniŋ nibi zən aŋu aghəy. Anigə Nwiye ŋunə umə naʼa aborobod yi mə nə umbən.

Pol naʼ yə beni ayə abú ba Kristo mbənə umə Filipi

¹⁰ Iwuʼi kyay yə ungɨŋ inyi fiŋ numugə amə akə anó feyn nə Asɨyisəg, damugə amaʼ si kaŋa sa nu mbən mə iwere aŋu. Mbən kaŋa iwuʼ iwere asɨmə cha apan inen.

¹¹ Cha amə ghayn aŋu ney damugə amə kaba ayə moʼ. Ayə ghayn damugə mə si kweme kwi, ka amə akə anó ingiya, ughəy mbənə umə iniŋ mbə koʼ.

¹² Mə kyay inji zənə a chomo Amaʼazənə a bəw aghəy moʼ foro Amaʼazənə amə nə ughəy nanaʼ, Mə si kweme inji zənə amə aghəy chomo anji chuŋ kə amə anó ingiya kə anji ingiya, kə ajəg anji chuŋ kə a chomo injəy, kə amə mə ukab kə cha aŋu nə ukab.

¹³ Mə kyay umugə ni ighəy unó jum anjim ikay zənə Kristo naʼa iniŋ.

¹⁴ Asɨmə mbən ghəy ichuŋ numugə mbən were aŋu akə inyi ingəʼ.

¹⁵ Umbən ba Filipi kaŋa kyay kwaʼa anji chuŋ kwi amaʼazənə mə́ noʼo Masedoniya imə ghayn ukən chuŋ, cha ufere chini were ma aŋu, aba umbən mbən were aŋu.

¹⁶ Ka aba Amaʼazənə mə́ mə Tesalonika, mbən cha awere iniŋ chigə akə ighari feyn.

¹⁷ Cha amə ghayn aŋu ney damugə amə kaba kwi mbən naʼa ughəy iniŋ. Mə́ kab amə kwi Nwiye tu ngwən numugə mbən mə were aŋu.

¹⁸ Ayə nə ughəy jum mbənə mə́ mə kaba mbə naʼ chigə. A yə nə ughəy jum mbənə mə́ mə kaba akinine nu Epafroditus si naʼ ukab ŋunə mbə tomo iniŋ. Ukab wu chomo nə aghəy ifa zənə amə nyoʼoro ifuyi chuŋ anigə ighəy kwi fiŋ Nwiye boŋo.

¹⁹ Uŋu Nwiye yi naʼa ughəy jum mbənə mbən mə kaba. U yi chigə anjim Yeso Kristo inaʼ inen ungɨŋ imbon nanaʼ zənə imə abú uŋwən.

²⁰ Ba wumini Nwiye ungwa Mbaʼ koŋ koŋ. Amə nigə.

Achaʼara nu asi nwi

²¹ Mbən chaʼara ba Kristo jum. Mba jum mba yə akə anó feyn nə Kristo numugə mba niŋi fiŋ igun ma. Ba Kristo mbənə umə akəŋ aboʼo inyi nibi chaʼara ngwən.

²² Ba Nwiye jum chaʼara ngwən, amara mə umbənə umə faʼa ungɨŋ itoʼ Kayisa.

²³ Asɨyisəg Yeso Kristo ghəy ichuŋ inen umbən jum.