Filipi 3 - Aŋwaʼanayn Uso Fey

Inji zənə ibeni mi ghəy kwi ba təm ikoʼoro

¹ Umbəŋ unya, iŋu nwi, a yə ghayn inen kwi mbən wuʼe ngwən numugə mbən mə akə ibumi nu Asɨyisəg. Cha amə isey ma aŋu igha ŋwaʼanayn unó mbənə mə si dey ŋwaʼanayn inen. A yi ghəy nigə da ka ingəʼ nyi ma igun inen.

² Mbən wey ngwən ni ba mbənə u mə ghəy unó iboŋ. Mbə chomo ni bəw. U mbə yeŋ yə ghayn kwi uni iney ikad ba.

³ Amə umba nu u ney ikad akə asiʼ. Azugə Nwiye yə were ngwa kwi mba wumini Nwiye. Mba yə wuʼe ngwa numugə mba mə akə ibumi nə Yeso Kristo. Anigə cha ba zi ngwa ita fiŋ akə unó mbənə ba nyoŋ atəw umə ighəy.

⁴ Ka di ma kwi mə́ mə nə aton izi fiŋ akə unó mbənə ba nyoŋ atəw mə ighəy. Wa moʼ bə kono kwi iyə nə aton izi fiŋ akə unó mbənə ba nyoŋ atəw mə ighəy, nji ayə nə aton chigə uŋwən.

⁵ Mbə ney nyi ikad amaʼazənə mə́ mə uney ifəyn. Uŋu mbaʼ mə wa Izre ungɨŋ unebey Benjamən, mə noʼ mə kwaʼa wa Hibru asiʼ. I beni aboʼo unoʼo, ayə ungɨŋ ibumi ba Farasay.

⁶ Mə zi atəw akə unó moʼ, mə́ mə nwini inya ughəw ba Kristo. I təm akə inji zənə unoʼo tey, cha wa di si noʼo ghayn ma anó iboŋ moʼ da aŋu.

⁷ Mə kono kwi mə́ mə jəgə injəm akə unó mbəŋ, asɨmə akinine mə si zən kwi amə inimi. Amə inimi da ichuŋ zənə Kristo ghəy iniŋ,

⁸ Asiʼ ŋunə umə awu amə kwi unó jum wu nim da anó kyay zənə a boŋo chigə. Anó kyay wu amə umugə a kyay uŋu Asɨyisəg Yeso Kristo. Mə si zən kwi unó wu jum amə indoro da a chomo ni Kristo. Da uŋwən mə waʼ ughəy jum,

⁹ anigə bumə si məŋi akə anó feyn nə uŋwən. Cha adi təm ikoʼoro aŋu damugə ghəy unó mbənə umə ungɨŋ unoʼo. Mə tem ikoʼoro anjim mugə a niŋi fiŋ igun Kristo. Nwiye ghəy kwi atəm ikoʼoro anjim mugə a niŋi fiŋ igun Kristo.

¹⁰ Ayə kaba kyay Kristo. A yə nibə kaba ikyay ikay zənə imə abú Kristo amaʼazənə Nwiye zəmə uŋwən. Ayə kaba i zəw ingəʼ numugə yə nibi zəw. A yə nibə kaba iku numugə yə́ kuw,

¹¹ da abə tey, a nibi zəmə.

Anó ni mə noro kwi imə nə uneʼe

¹² Cha amə ghayn aŋu kwi mə si ghəy unó mbəŋ jum, kə kwi mə si boŋ imara, asɨmə ayə faʼa da imə nə úŋwən. Yeso Kristo yi ghəy kwi amə wa uma da imə nə ughəy mbəŋ ujum.

¹³ Umbəŋ unya, cha adi ghayn aŋu kwi ayə nə ughəy wu, asɨmə anó zənə ami ghəy amə kwi: Mə si waʼa unó mbənə usi chigə anigə ayə kaba iyimi umbənə umə zaʼa imbey.

¹⁴ A yi mə yimə ŋuw imbey akə nwi da imə nə uneʼe ŋunə Nwiye chigə anjim Yeso Kristo isey iniŋ azobo.

¹⁵ Umba jum mbənə mba mə ba Kristo nu mba si kara mba niŋi ita ikono akə ifeyn da ukudu unó mbəŋ. Asɨmə ba moʼ bə mə ni ikono chini, Nwiye yi ghəy kwi azayn inen.

¹⁶ Amə kwi mba yimə unó mbənə mba si dey kyay.

¹⁷ Umbəŋ unya, mbən num aŋu akə unó jum mbənə amə ghəy. Mbə num anwini akə ba mbənə umə ghəy unó mbənə mba mə ghayn.

¹⁸ Mə si ghayn inen ighari nanaʼ, anigə ayə nibə ghayn inen akinine nə asɨy inyi aghɨ kwi ba nanaʼ mbə awu nu u chomo ni ba abana Kristo nu cha umə beni ni zəw aton zənə yə kuw azəd abaʼaray.

¹⁹ Ba mbəŋ umbi nwi ungɨŋ uwəd nu cha umi nimə, anigə unwiye uma amə ughəy mbənə nyə̂ inyo uma mə fana. Cha indere atəw mə ibiya úŋwən, umbə wuʼi uma anə unó mbənə mbə mi naʼ amə indere atəw abú uŋwən. Umbə kono aba unó igun isəg.

²⁰ A mə da ngwa, inja abey ayə azobo. Mba yə nəmə kwi Asɨyisəg Yeso Kristo nu umi chi ngwa angəʼ mi zaʼa akuŋ.

²¹ Uŋwən yi kyaba ita nyə̂ inyo tənə imə ikuw, anigə ghəy ma mə nə nyə̂ inyo ichomo ni ima zənə yə́ zəmə nə iŋwən. U yi ghəy nigə anjim ikay zənə ighəy kwi u tumə ughəy jum.