Filipi 2 - Aŋwaʼanayn Uso Fey

Kristo swiʼiri inyo, Nwiye beʼere uŋwən

¹ Umugə mbən mə akə anó feyn nə Kristo, Yə zi ikay inen. Umugə u wuʼi ngwən inigere ngwən. Mbən yə akə ibumi nə Azugə Nwiye. Mbən yə nibə ghəy ichuŋ abú umbən unya. Mbən ni kənə abú wa feyn feyn akaʼa injən.

² Anigə mbən yə́ ghəy kwi iwuʼi sugi ungɨŋ inyi fiŋ akə umugə mbən mə kono aba akə fiŋ feyn, umugə mbən mə wuʼe u mbən unya aba akə fiŋ feyn, chomo aba akə anó feyn nibi kono aba anó feyn.

³ Ka mbən ghəy ngwən anó chomo ni kwi aba umbən mi mə nə ughəy. Ka mbən nibi ghəy ngwən anó chomo ni kwi mbən yə beʼere inyo. Asɨmə mbən ki swiʼiri inyo kono kwi ba chini chigə ngwən.

⁴ Ka mbən ney ngwən aba unó mbənə umə da ngwən, mbən ney unó mbənə umə nibə da ba chini.

⁵ Mbən ni ghəy unó anji zənə Yeso Kristo mə ighəy.

⁶ Yə́ mə́ nə́ inji Nwiye, Asɨmə cha yə kaba ma itey kwi iyə ichin ichin nə Nwiye.

⁷ Yə́ sayn ikwey ma, Swiʼiri inyo ma akə isob Mbə ibə́ uŋwən umugə umə ibə́ wa inyoŋ atəw, Yə́ zaʼa chomo ni wa inyoŋ atəw anigə ba zən uŋwən.

⁸ Umugə yə́ mə́ wa inyoŋ atəw nigə, Yə swiʼiri inyo, Wumini ŋu pey amaʼazənə yə beni iŋu ku. Yə ku azad abaʼara.

⁹ Anigə Nwiye si beʼere uŋwən ŋu sey asin zənə a chigə usin jum. Yə́ si nibi naʼa ukum abú uŋwən nu u chigə ikum jum.

¹⁰ Wa moʼ bə tiya ukum Yeso, Ba jum azobo, igun isəg foro aton asey Umbi zum utəw nwi asey.

¹¹ Ba jum mbi beni asaŋ asaŋ Kwi Yeso Kristo mə Asɨyisəg, Da ba jum wumini Nwiye Mbaʼ.

Ba mbənə u beni Kristo umbi mə bigə chomo ni uzayn zayn

¹² Umbəŋ unya nu a wuʼi kwaʼa azəd, umugə mbən mə wumine Nwiye amaʼazənə mə́ mə ni umbən, akinine nu cha aŋu ni umbən, mbən tana i wumini uŋwən. Nwiye si chi ngwən angəʼ, mbən ki faʼa abú uŋwən nə igoro foro iwumini.

¹³ Mbən kyay kwi, Nwiye yə faʼa ungɨŋ inen ighəy kwi mbən ghəy unó chuŋ mbənə u kaba, nibi iwuʼ imə ghəy unó wu.

¹⁴ Mbən ghəy unó jum nu cha mbən mə zuʼe kə nu cha mbən mə taŋara,

¹⁵ da ka ba ghayn uma unó iboŋ da ngwən, foro da mbən zayn chomo ni buŋ Nwiye nu cha ifana anó moʼ igun inen. Ifana unó yə akaʼa ba mbənə umə ghəy unó iboŋ nibə ighəy unó nu cha ukoʼoro. Mbən chomo akaʼa úŋwən ni bigə numugə itənə mə bigə ungɨŋ isəg.

¹⁶ Mbən yimə inayn zənə imə naʼa itəni boʼo ami mə komo iguwə da ngwən aney zənə Kristo mi wene zaʼa kwi cha a di nod aŋu ibuw, cha inyi afaʼa di chigə ma ibuw.

¹⁷ Kanə mə di iku inyi anəm ayə chomo nə unoʼ mbənə tuwi igun ghəy ifa. Da injən ibeni, ayi mə wuʼe aŋu azəd nə umbən.

¹⁸ Ichin ichin, mbən ki nibə wuʼe ngwən anji zənə amə wuʼe.

Pol ŋwaʼanayn da Timoti foro da Epafroditus

¹⁹ Asɨyisəg Yeso bə beni, a yi tom Timoti inen boʼo iwuʼi sugi ungɨŋ inyi fiŋ amaʼazənə u bə wene zaʼa pey yə ghayn unó iniŋ da ngwən.

²⁰ Cha wa chini iniŋ ni uŋwən nu u mə kaŋa kaba kwi mbən chomo anji chuŋ.

²¹ Ba jum mbə zi atəw aba akə unó mbənə umə kaba, aka u mbənə Yeso Kristo kaba.

²² Mbən kyay kwi Timoti tey kwi imə wa faʼa chuŋ. Chomo ni ŋwə̂ nə mbaʼ, yə si faʼ nə umugə ighayn ukən chuŋ.

²³ Mə kono kwi a yi tom uŋwən inen amaʼazənə a kyay inji zənə unó mi məŋi iniŋ.

²⁴ Mə kyay kwi Asɨyisəg bə beni, a yi yabi zaʼa inen umugə mboŋ.

²⁵ Mə kono kwi yə kaŋa boŋ kwi a tom Epafroditus inen. Uŋwən amə ungwa unya. Uŋwən faʼ nə umugə nibi ghayn ukən chuŋ nə umugə chomo ni sogwi chuŋ. Amə uŋwən nu mbən tom kwi uzaʼa were aŋu.

²⁶ U yə kaba kwi nji yə zaʼa zən ngwən umbən jum. Fiŋ yi toboro uŋwən damugə mbən si zəw kwi uŋwən mə́ sɨgə.

²⁷ Amə asiʼ kwi yə mə sɨgə sə baʼa iku. Asɨmə cha Nwiye diri ma aba uŋwən. Yə nibi idiri aŋu nji akənə nu achigə abugə mi sugi ungɨŋ inyi fiŋ.

²⁸ Anigə ayə kaŋa wuʼe aŋu icha uŋwən inen, da mbən zən uŋwən, iwuʼi sugi ungɨŋ itən fiŋ. Anigə inyi mə kənə ayi nim.

²⁹ Anigə mbən num uŋwən ni iwuʼi numugə mbən mə num ba mbənə u beni Asɨyisəg Kristo. Mbən naʼa iwumini abú ba mbənə u chomo nə uŋwən,

³⁰ damugə yə si ku numugə umə faʼa abú Kristo. Yə nibi si niy itəni ma da iwere aŋu nu cha amə ghəy mbən ghəy nigə.